قازىر ونىڭ قۇس قوراسىندا الەمدە سيرەك ۇشىراساتىن كەپتەردىڭ بىرنەشە ءتۇرى بار. «ارقايسىسىنىڭ قۇنى ءبىر قويعا تەڭ», دەپ ۆاسيلي ستاركوۆتىڭ قالجىڭداپ قوياتىنى بار. دەسە دە ءازىل استارىندا شىمشىمداي شىندىق جاتقانىن اڭعارۋ قيىن ەمەس. ماسەلەن, كەپتەردىڭ «سالپىقانات» دەپ اتالاتىن ءتۇرى قاراساڭ كوز تويمايتىن ادەمى. سونىسىن سەزەتىندەي ءوزىن پاڭ, ماڭعاز ۇستايتىنىن قايتەرسىڭ! ءتۇرلى كورمەلەرگە قاتىسىپ, ولجا سالىپتى. ءبىر ماۋسىمدا بەس-التى بالاپان باسىپ شىعارىپ, ءبىر اپتاداي سۇتپەن قورەكتەندىرەدى ەكەن. ءسۇتى ىرىمشىك سەكىلدى قويمالجىڭ بولادى. ءبىر ءتاۋىرى, كەپتەرلەردىڭ كۇتىمى جەڭىل, ازىق تالعامايدى. كاسىپكەردىڭ ايتۋىنشا, اعزاسىنان ءسۇت بولەتىن قۇستار ساناۋلى عانا.
ۆاسيلي دەكوراتيۆتى كوگەرشىندەردەن باسقا ءبودەنە, ساندىك تاۋىق تا ءوسىرۋمەن شۇعىلدانادى. وسىدان ءبىرنەشە جىل بۇرىن وڭتۇستىك جاقتان ەكى تاۋىس اكەلىپ, بيىل العاش رەت جۇمىرتقا باسىپ, بالاپان ءوربىتىپتى. ەندى قىرعاۋىل ءوسىرمەك ويى بار.
تورتكۇل دۇنيەدە كوگەرشىننىڭ ءبىر مىڭنان استام ءتۇرى كەزدەسەدى. وكىنىشتىسى سول, ءبىز سياقتى ەگدە تارتقان جاندار بولماسا, اسىلتۇقىمدى قۇستاردى وسىرۋگە, كوبەيتۋگە جاستار جاعى قىزىعۋشىلىق تانىتا بەرمەيدى. قيىنسىنا ما, الدە مويىندارى جار بەرمەي مە, بىلمەيمىن. مەنىڭ پايىمىمشا, قورشاعان ورتاعا, تابيعاتقا دەگەن جاناشىرلىق كوزقاراس اڭ-قۇستاردى ايالاۋدان, ماپەلەۋدەن باستالادى. قاتىگەز, تاسباۋىرلىقتان جيرەندىرىپ, باۋىرمالدىققا, مەيىرىمدىلىككە تاربيەلەيتىن وزىندىك مەكتەپ ەكەنىن ۇعىناتىن مەزگىل جەتتى. وسى جاعىنا جەتە ءمان بەرىلسە, قۇبا-قۇپ بولار ەدى دەيدى كەيىپكەرىمىز ءماسەلەنىڭ ءبىر ۇشىعىن شىعارىپ.
سولتۇستىك قازاقستان وبلىسى