«شىعارماشىلىق مۇمكىندىكتەر الەمى» اتتى رەسپۋبليكالىق فەستيۆالىنە ەلىمىزدىڭ حالىقارالىق, رەسپۋبليكالىق, وبلىستىق بايقاۋلار مەن فەستيۆالداردىڭ لاۋرەاتتارى, ديپلومانتتارى, جاس انشىلەر, بيشىلەر, شىعارماشىلىق ۇجىمدار مەن وقۋ وزاتتارى جينالدى.
سەگىزىنشى اۋىسىمدا «بالداۋرەندىك» بالالاردىڭ شىعارماشىلىق قابىلەتتەرىن جانداندىرۋ جانە دامىتۋ ماقساتىندا «شابىت» شىعارماشىلىق بايقاۋى, «ەكى جۇلدىز» جوباسى جانە «كۇمبىرلە, سازدى دومبىرا» مۋزىكالىق-تانىمدىق كەشى, «CreativeFEST» competition بايقاۋى مەن كوپتەگەن قىزىقتى ءىس-شارالار وتكىزىلدى.
«بالداۋرەندە» جىل سايىن ۇلتتىق قۇندىلىعىمىزدى دارىپتەيتىن, اسىل مۇرالارىمىزدى, سالت-ءداستۇرىمىزدى دامىتۋ ماقساتىندا ءارتۇرلى تاقىرىپتىق اۋىسىمدار وتكىزىلىپ وتىرادى. ەندەشە, اتالعان اۋىسىمدا وتكىزىلگەن ءىس-شارالاردىڭ ءبىرى رەتىندە ۇلتتىق دومبىرا كۇنىنە ارنالعان «كۇمبىرلە, سازدى دومبىرا» مۋزىكالىق-تانىمدىق كەشى تۋرالى ايتۋعا بولادى.
ءتول ونەرىمىزدى دامىتۋعا ارنالعان كەش اۋىسىمعا جينالعان ونەرلى بالالاردان قۇرالعان «بالداۋرەن» وركەسترىنىڭ ورىنداۋىنداعى قۇرمانعازىنىڭ كۇيى «بالبىراۋىنمەن» اشىلدى. بۇل كەش اسقاق جىر, سۇلۋ سىرلى كۇي, قاناتتى شەشەندىك ءسوز, ۇلاعاتتى تەرمە سىندى تۇنبا بۇلاقتاي ءتول ونەرىمىزدى ناسيحاتتاپ, ءتىلىمىزدى, ءدىلىمىزدى جانداندىرىپ, ونەر قۇدىرەتى – دومبىرانىڭ ۇكىسىن جەلبىرەتىپ, اسقاقتاتتى.
ءىس-شارا بارىسىندا ەلىمىزدىڭ دارىندى, شىعارماشىل بالالارى ءوز ونەرلەرىن كورسەتىپ قانا قويماي, ۇلتتىق ونەرىمىزگە بايلانىستى تانىمدىق سۇراق-جاۋاپتارعا بەلسەندىلىكپەن قاتىستى. كەش سوڭىندا بالالار ارنايى سىيلىقتارمەن, گراموتالارمەن ماراپاتتالدى.
اينۇر ەردەنوۆا,
«بالداۋرەن» روسو ءباسپاسوز حاتشىسى