وڭىردەگى ەگىن شارۋاشىلىعى دەسە ەسكە شاربۇلاق اۋىلدىق وكرۋگىندەگى «ساپا-2002» شارۋا قوجالىعى تۇسەدى. بيىل دا جىلداعى شارۋاقورلىعىنان جاڭىلماعان قوجالىق القاپتاعى التىن استىقتى توكپەي-شاشپاي جيناپ الۋعا كىرىستى. اگروتەحنيكالىق تالاپتاردى تياناقتى اتقارعان كاسىپورىن 2000 گەكتارعا جۋىق القاپقا ەگىلگەن ارپا مەن بيدايدى جيناۋعا 10-عا جۋىق اگروتەحنيكا تارتىپ, 20 شاقتى ادامدى ەڭبەككە جۇمىلدىردى.
– القاپقا بيدايدىڭ 24 سورتىن سەپكەنبىز. الدىن الا بولجام بويىنشا ءار گەكتارىنان 30-35 تسەنتنەر ءونىم الامىز دەپ وتىرمىز. الداعى ۋاقىتتا 3 سورت تۇقىمىن (التىن ماساق, كونديتەر, ءشوپ) كوبەيتىپ, وندىرىسكە قويماقپىز. ماقساتىمىز سارىاعاشتىڭ عالىمدارىمەن كەلىسىمشارتقا تۇرىپ, تۇقىم ساپاسىن ودان دا ساپالى ەتۋ, – دەيدى «ساپا-2002» جشس ديرەكتورى نۇرجان ءاشىروۆ.
شارۋالار اۋا رايى قولايسىزداۋ بولعانىمەن قامباعا تۇسەر ءونىم بىلتىرعىدان كەم بولمايتىنىن ايتۋدا. سەبەبى اگروتەحنيكالىق شارالار دەر كەزىندە جاسالىپ, مەملەكەت تاراپىنان بەرىلەتىن ارزان جانار-جاعارماي مەن مينەرالدى تىڭايتقىشتار ۋاقتىلى بەرىلگەن. اۋدان اكىمى تولەگەن تەلعاراەۆتىڭ ايتۋىنشا, اۋدان بويىنشا ەگىن ورۋعا قاجەتتى 218 كومباين, 125 تاسىمالداۋشى تەحنيكا, 103 تراكتور تىركەمەلەرى ساقاداي ساي. «دجوندير» كومپانياسى ۇسىنعان سۋ جاڭا تەحنيكالار شارۋالاردىڭ قاجەتىن تولىق وتەۋگە ءتيىس.
ايتا كەتەرلىگى, اعىمداعى جىلى تۇركىستان وبلىسى بويىنشا اۋىل شارۋاشىلىعى داقىلدارىنىڭ ەگىس كولەمى 823 مىڭ گەكتارعا جەتتى. بۇل وتكەن جىلمەن سالىستىرعاندا 9,8 مىڭ گەكتارعا ارتىق. وبلىس بويىنشا بيداي 178,7 مىڭ گەكتارعا ەگىلدى. الدىن الا بولجام بويىنشا 218,6 مىڭ گا ماساقتى داقىلداردىڭ ءار گەكتارىنان ورتاشا ەسەپپەن 21,2 تسەنتنەردەن ءونىم الۋ جوسپارلانۋدا. استىق ورۋعا قولدا بار 1012 كومبايننىڭ 90-95 پايىزى ورۋ, جيناۋ جۇمىستارىنا پايدالانىلىپ جاتىر.
كۇنى بۇگىنگە دەيىن188 مىڭ توننا كارتوپ, 418 مىڭ توننا كوكونىس, 125 مىڭ توننا باقشا داقىلدارى جينالعان. قازىرگى تاڭدا ىشكى سۇرانىستان ارتىق كولەمى نۇر-سۇلتان, الماتى قالالارى مەن باسقا وبلىستارعا جانە شەتەلگە ەكسپورتتالۋدا.
وبلىستىق اۋىل شارۋاشىلىعى باسقارماسى تاراتقان اقپاراتقا سۇيەنسەك, كۇنگەيلىك ەڭبەكقور ديقاندار جىل سوڭىنا دەيىن كارتوپ, كوكونىس, باقشا ونىمدەرىنەن 2,7 ملن توننا ءونىم جيناۋدى جوسپارلاپ وتىر.
قازىعۇرت – شاربۇلاق