سارسەنبى, 15 مامىر 2013 2:31
قازاق «سىنىقتان باسقانىڭ ءبارى جۇعادى» دەيدى. سول ماتەل ءدال قازىر ءبىزدىڭ بەلگىلى قاشقىن مۇحتار ءابىلازوۆتىڭ باسىنا دا ءدال كەلگەلى تۇر.
ەندى مۇنى تاراتىپ ءارى ءتۇسىندىرىپ بايانداپ كورەيىك. وسى كۇندەرى كوپتەگەن شەتەلدىك ساياساتكەرلەر مەن ساراپشىلار بتا-بانكتىڭ بۇرىنعى باسشىسىنىڭ تىرلىگى تۇگەلدەي رەسەيدەن شىققان اتاقتى وليگارح بوريس بەرەزوۆسكيدىڭ تاعدىرىنا ۇقساپ كەلە جاتقانىنا نازار اۋدارا باستادى. راسىندا, ەكەۋىندە ءبىر-ءبىرىمەن ۇقساس نارسەلەر كوپ-اق.
سارسەنبى, 15 مامىر 2013 2:31
قازاق «سىنىقتان باسقانىڭ ءبارى جۇعادى» دەيدى. سول ماتەل ءدال قازىر ءبىزدىڭ بەلگىلى قاشقىن مۇحتار ءابىلازوۆتىڭ باسىنا دا ءدال كەلگەلى تۇر.
ەندى مۇنى تاراتىپ ءارى ءتۇسىندىرىپ بايانداپ كورەيىك. وسى كۇندەرى كوپتەگەن شەتەلدىك ساياساتكەرلەر مەن ساراپشىلار بتا-بانكتىڭ بۇرىنعى باسشىسىنىڭ تىرلىگى تۇگەلدەي رەسەيدەن شىققان اتاقتى وليگارح بوريس بەرەزوۆسكيدىڭ تاعدىرىنا ۇقساپ كەلە جاتقانىنا نازار اۋدارا باستادى. راسىندا, ەكەۋىندە ءبىر-ءبىرىمەن ۇقساس نارسەلەر كوپ-اق. تىپتى تەرىلەرىنىڭ تۇستەرى ءسال ءوزگەشەلەۋ دەمەسەڭ, بۇلاردىڭ ءتۇرلەرى مەن بەت پىشىندەرى دە ءبىر-ءبىرىنە كەلىڭكىرەيدى. البەتتە, مۇنى ايتىپ وتىرعان ءبىز ەمەسپىز. بۇعان سالماق سالىپ, ساراپ جاساپ وتىرعاندار كۇندىز-ءتۇنى وسىنداي قادامدارعا قاراپ, باعامدار شىعارىپ وتىرعاننان باسقا شارۋاسى كەم ارنايى ماماندار.
مىنە, ولار مىنانى ايتادى. ەڭ الدىمەن بۇلاردىڭ ەكەۋى دە بيزنەسكە عىلىمي ورتادان كەلدى. ەكەۋى دە العاشقى قادامدارىنان باستاپ كاپيتالدارىن ءارتۇرلى قيتۇرقى ارەكەتتەرگە قۇرىلعان الاياقتىق ارقىلى جانە وزدەرىنىڭ بەلگىلى ءبىر كەزەڭدەردەگى قىزمەت باپتارىن اسىرا پايدالانۋلارى نەگىزىندە قۇراستىرىپ الدى. ەكەۋى دە مۇنىمەن شەكتەلمەي, قالتالارى تولعان شاقتان باستاپ ساياساتقا باستارىن تىعىپ كوردى. ەكەۋى دە بۇدان پالەندەي ساياسي ۇپاي جيناي قويمادى. ەكەۋى دە الدەكىمدەردەن الداپ-ارباپ العان دۇنيەلەرىن قىزعىشتاي قورىپ جۇرگەن كەزدەرىندە سوتتالىپ تا كەتە جازدادى. وسى جۇرگەندەرىندە ەكەۋى دە ۇرلاعان-جىرلاعان اقشالارىنىڭ باسىم بولىگىن شەتەلدەردەگى بانكتەر مەن وفشورلىق ايماقتارداعى كاسىپورىندارعا قاراي زىتىرا بەردى. ەكەۋى ءوز ەلدەرىنىڭ ازاماتتارى بولا ءجۇرىپ, كەيدە ساندارى مەن اتتارىنان باسقانى بىلاي قويعاندا, وزدەرى دە جاڭىلىپ قالاتىنداي كاسىپورىندى سامساتىپ اشىپ تاستادى. ەكەۋى دە سول جاڭبىردان كەيىنگى ساڭىراۋقۇلاقتاي جامىراپ شىعا كەلگەن مەكەمەلەرىن باسقارۋعا جەر-جاھاننىڭ ءار تۇكپىرىندەگى ويدان-قىردان قاشقان ءوزى سياقتى الاياقتاردى ءدوپ تاۋىپ الىپ, قونجيتىپ قويدى.
بۇلاردىڭ ءبىر-بىرلەرىنە ۇقساي قويمايتىن ءبىر عانا مارشرۋتى بار. ول – مۇحتار ءابىلازوۆتىڭ رەسەي استاناسى –ماسكەۋ قالاسىنىڭ ءدال تۇبىنەن تاعى ءبىر جاڭا ادەمى قالا سوقپاقشى بولىپ, ول جاقتان جەر الىپ, رەسەي بانكتەرىن الداپ سوعىپ, تاقىرعا وتىرعىزىپ كەتكەنى. ال بوريس بەرەزوۆسكي قازاقستانعا ءدال ولاي ەتىپ ءاتىزىن سالا قويعان جوق-تى. سوعان قاراعاندا, ءبىزدىڭ قۋ انا قۋدان دا اسىپ ءتۇسىپ تۇر-اۋ, شاماسى.
اقىر سوڭىندا بۇلاردى قاتتى ۇقساتاتىن تاعى ءبىر تىرلىك – ەكەۋى دە ابدەن بولىپ-تولىپ العان سوڭ, الداعى قىرىق ومىرلەرىنە دەيىن مولىنان جەتەتىن ەسەپسىز مول بايلىقتى جيناپ بىتكەن سوڭ, ءوز ەلدەرىندە وزدەرىن قوياتىن قولايلى جەر تاپپاعان سوڭ ءبىر-اق ساتتە ءبارىن تارك ەتىپ, شەكارا اسىپ, شەت ەلگە كەتىپ قالدى. مىنە, تاپ وسى شەتەلىڭىزدە دە ولاردىڭ الدىنان ءبىر عانا جول كورىندى: بۇلاردىڭ ەكەۋى دە ۇلىبريتانيانىڭ استاناسى – لوندون قالاسىن تاڭداپ الدى! بۇل قالاعا ولاردىڭ ەكەۋى دە «ەۋروپا دەموكراتياسى» دەگەن قورعاۋشىلار توبىنىڭ كومەگىمەن جەتىپ الدى.
مىنا عاجاپتى قاراڭىز, تەمزانىڭ جاعاسىنداعى جايلى قالاعا كەلىپ العان سوڭ كوپ ۇزاماي بۇلاردىڭ ەكەۋى دە وزدەرىنىڭ بۇرىنعى ارىپتەستەرىمەن جاپپاي سوتتاسۋعا بەت الدى. تاعى ءبىر ۇقساستىق: بۇلاردىڭ ەكەۋى دە ءبىر سوتتان كەيىن ءبىر سوتتا ۇتىلا باستادى.
ماسەلەن, بەرەزوۆسكيدىڭ ءولىمىنەن ءسال عانا بۇرىن ءابىلازوۆ لوندون جوعارعى سوتىندا بتا-بانكتىڭ بەرگەن تالاپ ارىزى بويىنشا قارالعان ىستە وڭباي ۇتىلىپ, بۇرىنعى مەكەمەسى ەسەبىنە 2 ملرد. دوللار كولەمىندەگى اقشانى قايتارۋعا ءتيىس بولدى. تاپ وسىنداي ۇتىلىستى بوريس ابراموۆيچ تە بىرنەشە رەت باسىنان كەشتى. بۇلاردىڭ ەكەۋى دە سوندا وزدەرى وسىعان دەيىن «ادىلەتتىڭ الماس قىلىشى» دەپ اتاپ جۇرگەن لوندون جوعارعى سوتىنىڭ شەشىمدەرىنە قاتتى قايران قالىپ, جاعالارىن ۇستادى. ءابىلازوۆ لوندوننىڭ ءتورىندەگى ءوزى ايىندا ءبىر رەت ءتۇگەل ارالاپ شىعۋعا دا شاماسى كەلمەيتىن 40-تان استام بولمەسى بار, بىرنەشە قاباتتى كەڭ سارايىن ءبىر كۇندە تاستاپ, ۇلىبريتانيا اۋماعىنان سىرتقا كەتىپ قالدى. ال بەرەزوۆسكي سوتتىڭ ءوز ىسىنە قاتىستى قاۋلىسىن قولىنا ۇستاپ تۇرىپ: «ماعان بۇل شەشىمگە پۋتيننىڭ جەكە ءوزى قول قويعان سياقتى بولىپ كورىنەدى», دەگەن تاريحي ءسوزىن ايتۋعا ءماجبۇر بولدى.
ەڭ سوڭىندا بوريس بەرەزوۆسكي ومىردەن كەتەر الدىندا ءوزى سەكىلدەنىپ جۇرگەن ادامنىڭ ءومىر جولى قالاي اياقتالاتىنىن, سول جول ادامدى قانداي ەتىپ شىعاراتىنىن ابىلازوۆكە كورنەكى ۇگىت قۇرالى سەكىلدى ەتىپ كورسەتىپ بەردى. ءالبەتتە, بوريسكە قاراعاندا, مۇحتاردىڭ جاسى ءبىراز كىشى. ءدال ول سەكىلدى كوپ نارسەسىنەن ءالى ۇتىلىپ تا كورگەن جوق. بىراق ونىڭ ەندىگى جولى تەك ۇتىلىستاردان قۇرالاتىنىنا ەش كۇمان بولماسا كەرەك.
ءبىزدى ءبىر-بىرلەرىنە ۇستىندارى ۇقسايتىن جانداردىڭ تىرلىكتەرى وسىنداي ويلارعا جەتەلەدى.
قۇرىش نۇرىمبەت.