كاۋاش حيشامنىڭ الەۋمەتتىك جەلىلەردە جاريالانعان بەينە ۇندەۋىندە ايتىلعانداي, ول تەڭىز ۆاحتالىق قالاشىعىنداعى سسەر كومپانياسىنىڭ قىزمەتكەرلەرى اراسىنداعى جانجال تۋرالى بىلگەن بويدا, جاعدايدى رەتتەۋ ءۇشىن اتىراۋ وبلىسىنا كەلگەن.
- مەن ەلي داۋدتىڭ ءىس-ارەكەتى ءۇشىن بارلىعىنان كەشىرىم سۇراعىم كەلەدى. سسس باسشىلىعى مەن قىزمەتكەرلەرىنىڭ اتىنان بۇل سسس-ءدىڭ ساياساتىنا, قۇندىلىقتارى مەن قاعيداتتارىنا سايكەس كەلمەيتىن كەلەڭسىز وقيعا بولعانىن ايتقىم كەلەدى.
مەن وسى وقيعا تۋرالى بىلگەننەن كەيىن ونىمەن اراداعى كەلىسىم-شارت بۇزىلىپ, جۇمىستان بوساتىلدى.
ءبىز وسى جاعدايعا قاتىستى تولىق ىشكى تەرگەۋ جۇمىستارىن جۇرگىزىپ, قاجەتتى شارالاردى قابىلدايتىن بولامىز. قولىمدى جۇرەگىمە قويىپ, سسس-ءدىڭ باۋىرلاس قازاقتارعا ەرەكشە قۇرمەتپەن قارايتىنىن ايتقىم كەلەدى. مەن بولعان ءجايت ءۇشىن تاعى دا كەشىرىم سۇرايمىن. وسى وقيعا تۋرالى ەستىگەن بويدا دەرەۋ اتىراۋعا جاعدايدى رەتتەۋ ءۇشىن ۇشىپ شىقتىم. بۇگىنگى تاڭدا تەڭىزدەگى جاعداي تۇراقتى, ءولىم-ءجىتىم, اۋىر دەنە جاراقاتتارى بولعان جوق, - دەدى كاۋاش حيشام ءوزىنىڭ بەينە ۇندەۋىندە.
ەسكە سالساق, 29 ماۋسىم كۇنى تەڭىز كەنىشىندە اتالعان كومپانيا جۇمىسشىلارى نارازىلىققا شىعىپ, 30 ادام دەنە جاراقاتىن العان بولاتىن. قازىر ۆەدومستۆوارالىق كوميسسيا وقيعانىڭ ءمان-جايىن انىقتاپ جاتىر.
اتىراۋ