«مەملەكەت باسشىسى قاسىم-جومارت توقاەۆ ساباقتاستىق نەگىزىندە تۇڭعىش پرەزيدەنت - ەلباسى نۇرسۇلتان نازارباەۆتىڭ الەۋمەتتىك ستراتەگياسىن جالعاستىرىپ, حالىقتىڭ وزەكتى ماسەلەلەرىن شەشۋگە باعىتتالعان ىرگەلى شارالاردى قابىلداۋدا. پرەزيدەنت الەۋمەتتىك تۇرعىدان از قامتىلعان ازاماتتارىنىڭ بورىش جۇكتەمەسىن ازايتۋ شارالارى تۋرالى جارلىققا قول قويدى», دەپ پرەمەر-مينيستر وسى قابىلدانعان شەشىمنىڭ ارقاسىندا الەۋمەتتىك تۇرمىسى تومەن ازاماتتارعا كومەك كورسەتىلەتىنىن جەتكىزدى.
مەملەكەت باسشىسىنىڭ تاپسىرماسى بويىنشا ۇكىمەت حالىقتىڭ ەڭ وزەكتى الەۋمەتتىك ماسەلەلەرىن شۇعىل تۇردە شەشۋگە ارنالعان جانە حالىقتىڭ ءال-اۋقاتىن ارتتىرۋ ماقساتىندا جەدەل شارالار توپتاماسىن ازىرلەدى. اتاپ ايتقاندا, وسى شارالاردىڭ ىسكە اسۋىنىڭ ناتيجەسىندە اعىمداعى جىلدىڭ اياعىنا دەيىن جۇمىسسىز 300 مىڭنان استام ادام «باستاۋ بيزنەس» جانە «جاس كاسىپكەر» باعدارلامالارى بويىنشا كاسىپتىك ءبىلىم بەرۋ ارقىلى جۇمىسقا ورنالاستىرۋ شارالارىمەن قامتىلادى.
سونىمەن قاتار, جەكە كاسىپكەرلىكتى ۇزاق مەرزىمدى كرەديتتەر جانە گرانتتار ۇسىنۋ ارقىلى دامىتۋ شارالارى, الەۋمەتتىك كومەك ۇسىنۋدىڭ تيىمدىلىگىن ارتتىرۋ, از قامتىلعان وتباسىلارعا جالدامالى باسپانا قۇرىلىسىنىڭ كولەمىن ەكى ەسە ءوسىرۋ (جىلىنا 20 مىڭ پاتەر), جۇمىس ىستەيتىن جاستارعا جالدامالى ءۇيدىڭ قۇرىلىسىن ءۇش ەسەگە ارتتىرۋ (جىلىنا 1 مىڭ پاتەردەن 3 مىڭ پاتەرگە دەيىن) شارالارى قولعا الىنادى. سونداي-اق از قامتىلعان وتباسىلاردىڭ بالالارىنا كەشەندى الەۋمەتتىك قولداۋ شارالارى ۇيىمداستىرىلادى, ونىڭ ىشىندە بيىل 5 مىڭ ءبىلىم گرانتتارىن ءبولۋ, قوعامدىق كولىكتە تەگىن جول ءجۇرۋىن قامتاماسىز ەتۋ بار.
«وسى ماڭىزى ۇلكەن شارالاردى ىسكە اسىرۋ ءۇشىن «2019-2021 جىلدارعا ارنالعان رەسپۋبليكالىق بيۋدجەت تۋرالى» زاڭعا وزگەرىستەردى ەنگىزۋ قاجەت. وسىعان بايلانىستى, بيۋدجەتكە ەنگىزىلەتىن وزگەرىستەردى قاراستىرۋ ءۇشىن پارلامەنت سەسسياسىن جۇمىسىنىڭ مەرزىمىن ۇزارتۋ ماسەلەسىن قاراستىرۋدى سۇرايمىن», دەدى اسقار مامين.
پارلامەنت دەپۋتاتتارى VI شاقىرىلىمىنداعى ءتورتىنشى سەسسيا جۇمىسىن 2019 جىلعى 5 شىلدەگە دەيىن ۇزارتۋ تۋرالى شەشىمدى ءبىراۋىزدان قابىلدادى.