بۇگىن قر ۇكىمەتىنىڭ الاڭىندا وتكەن بريفينگ بارىسىندا قر ءبىلىم جانە عىلىم ءمينيسترى ا. ايماعامبەتوۆ از قامتىلعان وتباسىلاردىڭ بالالارىن الەۋمەتتىك قولداۋدىڭ قابىلدانىپ جاتقان شارالارى تۋرالى ايتىپ بەردى.
ا. ايماعامبەتوۆ 2019–2020 وقۋ جىلىنا قر ۇكىمەتى مەملەكەت باسشىسىنىڭ تاپسىرماسى بويىنشا كوپ بالالى وتباسىلاردىڭ بالالارى مەن اتاۋلى الەۋمەتتىك كومەك الۋشىلارعا قوسىمشا 5 مىڭ گرانت بولەتىنىن ايتتى. اتالعان ءبىلىم بەرۋ گرانتتارى جالپى سيپاتتاعى ترانسفەرت ارقىلى جەرگىلىكتى اتقارۋشى ورگاندارعا بەرىلەدى. گرانتتار بيىلعى 1 قىركۇيەكتەن باستاپ بولىنەدى. نەگىزگى شارت — ۇبت تاپسىرعان جانە ونىڭ ناتيجەسى بويىنشا ۇلتتىق جوو-لارعا — كەمىندە 65 بالل, «پەداگوگيكالىق عىلىمدار» باعىتى بويىنشا — كەمىندە 60 بالل, باسقا جوو-لارعا — ەڭ ازى 50 بالل جيناعان تۇلەكتەر بولۋى ءتيىس.
گرانتتار ۇبت ناتيجەسى بويىنشا كونكۋرستىق نەگىزدە تاعايىندالادى. وبلىستاردىڭ, رەسپۋبليكالىق ماڭىزداعى قالالاردىڭ جانە ەلوردانىڭ اكىمدەرى كونكۋرستىق كوميسسيالار قۇرادى. سونىمەن قاتار, گرانتتار بولىنەتىن دايىندىق باعىتتارىنىڭ ءتىزىمىن جەرگىلىكتى اتقارۋشى ورگاندار ءوڭىردىڭ جوعارى ءبىلىمى بار ماماندارعا دەگەن سۇرانىسىن ەسكەرە وتىرىپ, دەربەس انىقتايدى. ءبىلىم گرانتىنىڭ يەگەرلەرى ءۇشىن 20 949 تەڭگە مولشەرىندە شاكىرتاقى قاراستىرىلعان. جاو ءبىلىم بەرۋ گرانتتارىنىڭ يەگەرلەرىنىڭ ءتىزىمى جەرگىلىكتى بۇقارالىق اقپارات قۇرالدارىندا جاريالانادى.
ا. ايماعامبەتوۆ الدىمەن گرانتتار جالپى بولىنەتىنىن ايتتى. بيىل 53 700 گرانت بەرىلەدى. شامامەن 1 تامىزدا گرانت يەگەرلەرىنىڭ ءتىزىمى بەلگىلى بولادى. بۇدان كەيىن گرانت الماعان, الايدا ازاماتتاردىڭ الەۋمەتتىك ءالسىز توبىنا جاتاتىندار ءوز وتىنىمدەرىن بەرە الادى. قوسىمشا ءبىلىم گرانتتارىن تاعايىنداۋ كونكۋرسىنا وتىنىمدەردى قابىلداۋ 5-10 تامىز ارالىعىندا بولادى. گرانت بەرۋ – 25 تامىزعا دەيىن.
«ازاماتتار ساناتى انىقتالدى, شەگى بار, ەندى دايىندىقتىڭ بەلگىلى باعىتتارى بويىنشا قانداي باللدار جيناعانىنا بايلانىستى بولادى, ياعني سارالانادى. مۇندا ەشقانداي دا جەمقورلىق قاۋىپتەرىنە جول بەرىلمەيدى», — دەپ تۇيىندەدى مينيستر.