ارىستاعى جارىلىستان قازا تاپقان ءۇشىنشى ادام 32 جاستاعى اسكەري قىزمەتكەر بولعان. بۇل تۋرالى قازاقپارات حابارلادى.
وبلىستىق قوعامدىق دەنساۋلىق باسقارماسىنىڭ ءباسپاسوز قىزمەتىنىڭ حابارلاۋىنشا, كوز جۇمعان جىگىت ابدىكۇل نۇرلان ۇلى احمەتوۆ ارىس قالاسىنىڭ تۇرعىنى. 1987 جىلى تۋعان. ۇيلەنگەن, بالاسى بار.
«ول سول جەردەگى اسكەري بولىمدە جۇمىس ىستەگەن. جارىلىس بولعان كەزدە اۋىر جاراقاتتانىپ, اۆياتسيالىق مەديتسينالىق قۇتقارۋ قىزمەتىمەن تۇركىستان وبلىستىق كلينيكالىق اۋرۋحاناسىنا جەتكىزىلگەن. ەس-ءتۇسسىز جاتقان ناۋقاسقا جانساقتاۋ بولىمىندە بارلىق قاجەتتى ساۋىقتىرۋ شارالارى جاسالدى. وكىنىشكە وراي, ول كوز جۇمدى», دەدى ءباسپاسوز حاتشىسى ميرا سۇيلەيمەنوۆا.
سونداي-اق باسقارمانىڭ مالىمەتىنشە قازىرگى تاڭدا 74 ادام اۋرۋحانالاردا ەم قابىلداۋدا. ولاردىڭ 4-ەۋىنىڭ جاعدايى اۋىر دەپ باعالانۋدا. ارالارىندا كىشكەنتاي بالالار دا بار.