ايتا كەتۋ كەرەك, مۇنداي قويما ەلىمىزدىڭ ەكى قالاسىندا – الماتى مەن تارازدا عانا بار. كاسىپكەر ونى «اگرارلىق نەسيە كورپوراتسياسى» اق تاراپىنان بەرىلگەن قاراجات ەسەبىنەن تۇرعىزعان. ساقتاۋ قويماسىنىڭ سىيىمدىلىعى – 2000 توننا. قازىر مۇندا ساقتالىپ تۇرعان ءونىمنىڭ دەنى وڭىردەگى الما وسىرۋشىلەرگە تيەسىلى.
قويمانىڭ زاماناۋي جاراقتاندىرىلۋىنىڭ ناتيجەسىندە جەمىس-جيدەك ونىمدەرى مەيلىنشە بابىنا كەلتىرىلىپ, قىستا دا جاساڭ كۇيىندە ساقتالادى. ارقايسىسىنىڭ توڭازىتاتىن, ىلعال بولەتىن, اۋىر زاتتاردى بويىنا ءسىڭىرىپ الاتىن ەرەكشەلىكتەرى بار 12 كامەرا ءونىمدى بۇزباي ساقتايدى. قويما ەتيلەن گازىن كومىرقىشقىل گازىمەن الماستىراتىن قۇرىلعىلارمەن دە جابدىقتالعان. ادەتتە المادان ەتيلەن گازى بولىنەدى دە ارنايى قۇرىلعى كومەگىمەن كومىرقىشقىل گازىنا اينالدىرىلادى. سونىڭ اسەرىمەن جەمىس «ۇيىقتاۋ رەجىمىنە» كوشىرىلەدى, بۇل 7-8 اي بويى جالعاسادى. كاسىپكەردىڭ ءوزى تۇرعىزعان ساقتاۋ قويماسى ارقىلى جەرگىلىكتى الما ونىمدەرى بيىل ايتارلىقتاي تومەن باعامەن ساتىلىپ جاتقانىن دا ايتا كەتكەن ءجون.
كوشكىنباي قۇلمانبەتوۆ اۋماعى ءبىر جارىم گەكتارلىق ساقتاۋ الاڭىندا كوكونىس پەن جەمىس-جيدەك ساقتاۋمەن شەكتەلمەي, ونى وڭدەۋ ءىسىن قولعا الۋدى دا ويلاستىرۋدا. مۇندا كەپتىرىلگەن جەمىستەر, قالبىرلانعان جانە ۇنتاق تۇرىندەگى جەمىس ونىمدەرى شىعارىلماق.
ك.قۇلمانبەتوۆ ادام ءۇشىن ەڭ پايدالى داعدى – جەرگىلىكتى جەردە وسىرىلگەن ەكولوگيالىق تازا ازىق-ت ۇلىك ونىمدەرىن پايدالانۋ ەكەنىنە سەنىمدى.
– بىزدە تۇتىنۋ مادەنيەتى قالىپتاسپاي وتىر. بارلىق اۋرۋلاردىڭ ەمى, جالپى تىرشىلىگىمىزدىڭ ارقاۋى – اس. تۇرعىنداردىڭ دەنساۋلىعىن قورعايتىن باسقا ەمەس, ءوزىمىز. ءبىز بولاشاقتا وسى وڭىردە وسىرىلگەن كوكونىس پەن جەمىس-جيدەك ونىمدەرىنەن ەمدىك, كوسمەتيكالىق دارۋمەندەر دايىنداپ, ونىڭ كومەگىمەن ادامداردىڭ ەمدەلۋىنە ايتارلىقتاي كومەگىمىزدى تيگىزە الامىز, – دەيدى ول.
سەرىكتەستىكتىڭ باسشىسى وسىلاي كوكونىس پەن جەمىس-جيدەك ونىمدەرىنە حالىقتىڭ قىستا دا تارىقپاي, داستارقاندارىنان جەڭسىك استى ۇزبەۋىنە سەپتەسىپ وتىر.
بايماحانبەت احمەت,
جۋرناليست
تاراز