تۇركىستان وبلىسىنىڭ اكىمى ومىرزاق شوكەەۆ, قر قورعانىس ءمينيسترى نۇرلان ەرمەكباەۆ جانە قر توتەنشە جاعدايلار جونىندەگى كوميتەت توراعاسى ۆلاديمير بەككەر ارىس قالاسىنداعى توتەنشە جاعدايعا قاتىستى ورداباسى اۋدانى, اقجول اۋىلى, جامبىل مەكتەبىندە بريفينگ وتكىزدى. ولار حالىقتى الاڭداتقان ساۋالدارعا جاۋاپ بەرىپ, ناقتى مالىمەتتەرمەن ءبولىستى.
«قازىرگى تاڭدا شۇعىل شارالار قولعا الدىق. جارىلىس ماسشتابىن كورگەن سوڭ, بىردەن تۇرعىنداردى ەۆاكۋاتسيالاپ, جەلدىڭ باعىتىنا قاراي ءۇش لاگەر جاساقتادىق. ارىس قالاسىن ساعات سايىن ارالاپ, كەزدەسكەن تۇرعىنداردى قۇتقارۋ وپەراتسياسىن جۇرگىزۋدەمىز», دەدى ءو. شوكەەۆ.
ارىس قالاسىنداعى جارىلىستان وڭىرگە رادياتسيالىق قاۋىپ جوق. بوگەن سۋقويماسى تۇراقتى باقىلاۋعا الىنعاندىقتان, سۋ باسۋ قاتەرى بار دەگەن اقپارات تا قاۋەسەت ەكەنىن مالىمدەيمىز.قازىرگى تاڭدا ارىس قالاسىنداعى ءتارتىپتى قاداعالاۋ ءۇشىن 345 پوليتسيا قىزمەتكەرى جۇمىس ىستەسە, قوسىمشا ۇلتتىق گۆارديانىڭ 500 ساربازى كومەككە كەلگەن.
سونداي-اق وقيعا ورنىندا 75 ارنايى كولىك, 51 شۇعىل جاردەم ەكيپاجى قىزمەت ەتۋدە. 105 اۆتوكولىك تۇرعىنداردى ەۆاكۋاتسيالاۋعا جۇمىلدىرىلعان.
تۇركىستان وبلىسى مەن شىمكەنت قالاسى بويىنشا تجد تاراپىنان 359 قىزمەتكەر, 40 بىرلىك ارنايى تەحنيكا جۇمىس ىستەۋدە.
تۇرعىنداردىڭ نەگىزگى بولىگى قالادان وزدەرى كەتكەن. سوڭعى ساعاتتا 1616 ادام ەلدىمەكەننەن كوشىرىلدى. ورداباسى اۋدانى, تورەارىق اۋىلىنداعى تاۋكەحان مەكتەبىندە ەۆاكۋاتسيادا وتباسىنان كوز جازىپ قالعان بالالار جينالۋدا. ولاردىڭ فوتوسۋرەتتەرى تۇركىستان وبلىسىنىڭ رەسمي پاراقشاسىندا جاريالانادى. دەنساۋلىق ساقتاۋ باسقارماسىنىڭ مالىمەتىنشە, زارداپ شەككەندەر سانى – 31. اۋىر جاراقات سالدارىنان 1 ادام قايتىس بولدى. بۇل مالىمەت ءالى دە ناقتىلانۋ ۇستىندە.