بۇل تۋرالى تۇركىستان وبلىسىنىڭ اكىمى ومىرزاق شوكەەۆ ارىس قالاسىندا تىكەلەي ەفيردە وتكەن ءباسپاسوز بريفينگىندە ايتتى.
«ارىستا 45 مىڭ تۇرعىن بار. جارىلىستاردىڭ كولەمىن, ماسشتابىن كورگەن سوڭ, تۇگەل قالانى ەۆاكۋاتسيالاۋ تۋرالى شەشىم قابىلدادىق. تەزدەتىپ قۇلاقتاندىرۋ قۇرالدارى ىسكە قوسىلدى. اۆتوبۋستار اكەلىنىپ, قالادان تۇرعىنداردى تەز ارادا قاۋىپسىز وڭىرگە شىعارۋعا ارەكەت جاسالدى. قازىرگى ۋاقىتتا ارىستا ءار ساعات سايىن كوشەلەردى ارالاپ, ارنايى كولىكتىك كولوننالار جىبەرىپ, تۇرعىنداردىڭ بارلىعىن شىعارىپ جاتىرمىز. كوپشىلىگى قالادان شىقتى دەپ ايتۋعا بولادى. ەندى پوليتسيامەن جانە اسكەريلەرمەن بىرىگىپ, قالانىڭ ءىشىن پاترۋلدەۋگە كىرىستىك. قالانىڭ شەتتەرىن قورشاپ, بلوك پوستتار ورناتتىق», دەدى اكىم.
ونىڭ ايتۋىنشا, حالىق جەلدىڭ باعىتىنا قاراي ەۆاكۋاتسيالانعان. ولاردى ورنالاستىراتىن 3 نۇكتە بەلگىلەندى.
«ارىستا ەشكىم قالمادى دەۋگە بولادى. ساعات سايىن قالا ءىشىن تەكسەرىپ ءجۇرمىز. جەرتولەدە تىعىلىپ وتىرعان ادامدار بولسا, قالا اۋماعىنان شىعارۋعا تىرىسامىز», دەدى ءو. شوكەەۆ.