ەلورداداعى سپورتتىق مەرەكە تاڭعى ساعات 09.00-دە ورتالىق ساياباعىندا باستالدى. مەرەكەگە قر مادەنيەت جانە سپورت ۆيتسە-ءمينيسترى ەلدوس رامازانوۆ, قر ۇوك سپورت ديرەكتسياسىنىڭ ديرەكتورى ەلسيار قاناعاتوۆ قاتىستى. ال ەڭ باستى قاتىسۋشىلار قاتارىندا ەلىمىزدىڭ جاس سپورتشىلارى بار.
«بارشاڭىزدى حالىقارالىق وليمپيادا كۇنىمەن قۇتتىقتايمىن. قازاقستان اتالعان مەرەكەنى وسىمەن 26-شى رەت تويلاپ وتىر. ءبىزدىڭ ەلىمىزدە وليمپيادالىق سپورت تۇرلەرى قارقىندى دامىپ كەلەدى. سپورتشىلارعا قاجەتتى قولداۋ تۇگەلدەي كورسەتىلۋدە. بۇل كۇننىڭ باستى ماقساتى – حالىق اراسىندا وليمپيادالىق قوزعالىس قۇندىلىعىن, سپورت پەن سالاۋاتتى ءومىر سالتىن ناسيحاتتاۋ. مەرەكەگە كىشكەنتاي سپورتشىلاردىڭ قاتىسىپ جاتقانى قۋانتادى. بارشاڭىزعا سپورتتا بيىك بەلەستەردى باعىندىرۋدى تىلەيمىن», - دەدى قر مادەنيەت جانە سپورت ۆيتسە-مينيسترى ەلدوس رامازانوۆ.
«بۇگىن بۇكىل ەل بولىپ حالىقارالىق وليمپيادا كۇنىن اتاپ ءوتىپ جاتىرمىز. ۇوك پەن تيمۋر اسقار ۇلى ق ۇلىباەۆتىڭ, سونداي-اق, قر مادەنيەت جانە سپورت مينيسترلىگىنىڭ بەلسەندى قولداۋىنىڭ ارقاسىندا ەلىمىزدەگى وليمپيادالىق قوزعالىس تەز قارقىن الۋدا. بۇل سپورتتىق مەرەكەنى بۇكىل الەم حالقى تويلاۋدا. كەلەسى جىلى توكيودا وليمپيادا ويىندارى وتەتىنىن بىلەسىزدەر. بۇگىن ءبىزدىڭ مەرەكەگە جاپونيا ەلشىلىگىنىڭ وكىلدەرى قاتىسىپ, الداعى تورتجىلدىق دوداسى مەن جاپون حالقىنىڭ داستۇرلەرى تۋرالى قۇندى مالىمەتتەر بەردى», - دەپ اتاپ ءوتتى قر ۇوك سپورت ديرەكتسياسىنىڭ ديرەكتورى ەلسيار قاناعاتوۆ.
كەلەسى جازعى وليمپيادا ويىندارى توكيودا وتەدى. سول سەبەپتى, ەلىمىزدەگى وليمپيادا كۇنىن تويلاۋعا قازاقستانداعى جاپونيا ەلشىلىگى دە اتسالىستى. ولار يادو بويىنشا جەتىنشى دان يەگەرى نوبۋكادزۋ ءونيسيدى ارنايى شاقىرتىپ, شەبەردىڭ ونەرىن بارشاعا پاش ەتتى. سونداي-اق, مەرەكەلىك ءىس-شاراعا قاتىسۋشىلار جاپون حالقىنىڭ مادەنيەتى مەن داستۇرلەرىنەن حابار الىپ, الداعى ويىنداردىڭ اتموسفەراسىن جاقىنداتا ءتۇستى. جاپوندىق شەبەرلەر كيمونو كيۋ مەن جاپون كالليگرافياسىنان بىرقاتار شەبەرلىك ساعاتتارىن وتكىزدى.
«مەن مۇنداي مەرەكەلىك ءىس-شاراعا قاتىسقانىم ءۇشىن وتە قۋانىشتىمىن. شىن جۇرەكتەن بارشاڭىزدى قۇتتىقتايمىن. الداعى جىلى جاپونيادا وليمپيادا ويىندارى وتەدى. سول سىنعا قاتىسۋ ءۇشىن سىزدەردىڭ جانە ءبىزدىڭ ەلدىڭ سپورتشىلارى ايانىپ قالمايتىنى انىق. وليمپياداعا قاتىسۋدىڭ ءوزى ۇلكەن قۋانىش ەكەنى ءسوزسىز. سىزدەرگە ساتتىلىك تىلەيمىن. بۇگىن ءبىز سىزدەردى ەلىمىزدىڭ مادەنيەتىمەن تانىستىرۋ ءۇشىن بىرقاتار شەبەرلىك ساعاتتارىن وتكىزدىك», - دەيدى جاپونيانىڭ قازاقستانداعى توتەنشە جانە وكىلەتتى ەلشىسى تاتسۋحيكو كاساي مىرزا.
مەرەكەنى تويلاۋعا جينالعان قوناقتار Fitness Park Nur-Sultan كومانداسىنىڭ نۇسقاۋشىلارىمەن بىرگە ارنايى دەنە شىنىقتىرۋ وتكىزدى. ال مەيرام اياقتالار تۇستا بوكس, دجيۋ-دجيتسۋ, زۋمبا, يوگا جانە كروسس-فيتتەن شەبەرلىك ساعاتتارى ۇيىمداستىرىلدى.
«مۇنداي مەرەكە بارىن ەكى جىل بۇرىن ەستىدىم. ءبارى كەرەمەت ءوتتى. ۇيىمداستىرۋ وتە جوعارى دەڭگەيدە. اسىرەسە, بالاقايلاردىڭ كوڭىل-كۇيى تاماشا. دەنە شىنىقتىرۋ دا وتە كوڭىلدى ءوتتى. وليمپيادا ويىندارى دەگەنىمىز نە؟ مەنىڭشە, بۇل بۇكىل الەمنەن جينالعان چەمپيوندار دوداسى. مەنىڭ دە وليمپيادا قاتىسقىم كەلەدى. سپورت مەنىڭ ءومىرىم. سەگىز جىلدان بەرى كوركەم گيمناستيكامەن شۇعىلدانامىن. قازىر جاسىم 11-دە. نۇر-سۇلتان, تاراز, الماتىدا وتكەن تۋرنيرلەرگە قاتىستىم», - دەيدى جاس گيمناست داميليا يسانوۆا.
ال وڭتۇستىك استانامىزدا ءداستۇرلى ۆەلوجارىس ءوز دەڭگەيىندە ۇيىمداستىرىلدى. جارىسقا قاتىسۋشىلار تورايعىروۆ پەن سايىن كوشەلەرىنەن باستاپ ورتالىق ستاديونعا دەيىنگى ارالىقتى ءجۇرىپ ءوتتى. ايتا كەتەرلىگى, ۆەلوشاباندوزدار تەك قانا ۆەلوجولاقتا جارىسقان سوڭ, كوشە قوزعالىسىنا شەكتەۋ بولعان جوق. جارىس اياقتالعان سوڭ قاتىسۋشىلار اراسىندا سىيلىقتار ويناتىلدى.
وليمپيادا كۇنىنە قاتىسۋشىلاردىڭ بارلىعى حالىقارالىق وليمپيادا كوميتەتىنىڭ پرەزيدەنتى توماس باح پەن قازاقستان رەسپۋبليكاسى ۇلتتىق وليمپيادا كوميتەتىنىڭ باسشىسى تيمۋر ق ۇلىباەۆتىڭ قولى قويىلعان ديپلومدارمەن ماراپاتتالدى.
مەرەكەنى ۇيىمداستىرۋعا نۇر-سۇلتان مەن الماتى قالالارىنىڭ اكىمدىگى قولداۋ كورسەتتى.
ايتا كەتەلىك, حالىقارالىق وليمپيادا كوميتەتى 1948 جىلى سانكت-موريتسەدە وتكەن حوك-تىڭ 42-ءشى سەسسياسىندا 23 ماۋسىمدا حالىقارالىق وليمپيادا كۇنىن وتكىزۋ تۋرالى شەشىم قابىلدادى. بۇل كۇننىڭ تاڭدالۋى دە بەكەر ەمەس. 1894 جىلدىڭ 23 ماۋسىمىندا حوك قۇرىلعان بولاتىن. ءدال سول كۇنى وليمپيادالىق قوزعالىستىڭ نەگىزىن سالۋشى, بارون پەر دە كۋبەرتەن حالىقارالىق اتلەتيكالىق كونگرەسس الدىندا تاريحي بايانداما جاسادى.