قازاقستاننىڭ تۇركياداعى ەلشىلىگى مەن كايسەري ونەركاسىپتىك پالاتاسى بىرلەسە تۇرىك ينۆەستورلارى ءۇشىن بيزنەس-سەمينار ۇيىمداستىردى.
ءىس-شاراعا جيھاز ونەركاسىبى, قۇرىلىس ماتەريالدارى, جەڭىل ونەركاسىپ, ماشينا جاساۋ جانە ت.ب. سالالاردا جۇمىس جاسايتىن كايسەريدەگى الدىڭعى قاتارلى 20 كومپانيانىڭ جەتەكشىلەرى قاتىستى.
جيىن بارىسىندا قازاقستانداعى بيزنەس جۇرگىزۋدىڭ شارتتارى, مەملەكەتتىك قولداۋ شارالارى, ەەو, ورتالىق ازيا جانە قىتاي نارىقتارىنا ەكسپورتتىق الەۋەتى بار باسىم سالالارداعى جوبالاردى ىسكە اسىرۋ مۇمكىندىكتەرى, احقو اياسىندا ىنتىماقتاستىق جانە باسقا دا ءتۇرلى ماسەلەلەر تالقىلاندى.
شارا ناتيجەسىندە ەكىجاقتى كەزدەسۋلەر وتكىزىلدى, ونىڭ بارىسىندا كايسەريدەگى بىرقاتار كومپانيالار قازاقستانداعى تۇرمىستىق تەحنيكا, جيھاز ءوندىرىسى, تەرەزە-ەسىكتەر مەن قوسالقى زاتتار شىعارۋ مۇمكىندىگىن قاراستىرۋ ماقساتىندا ينۆەستيتسيالىق ىنتىماقتاستىقتى ورناتۋعا قىزىعۋشىلىق تانىتتى.
سونداي-اق, اتالعان جيىن قورىتىندىسى بويىنشا ينۆەستيتسيالىق جوبالاردى ىسكە اسىرۋ شارتتارىمەن تىكەلەي تانىسۋ جانە ىنتىماقتاستىق باعىتتارىن بەلگىلەۋ ماقساتىندا الداعى ۋاقىتتا تۇرىك ينۆەستورلارىنىڭ قازاقستانعا ساپارىن ۇيىمداستىرۋ جۇمىسىن قاراستىرۋ بويىنشا جاقىن ارادا كەزدەسۋ وتكىزۋ تۋرالى كەلىسىمگە قول جەتكىزىلدى.