وبلىس باسشىسى الدىمەن بوكەنباي باتىر كوشەسىندەگى اعاشتاردى جانە كوگالداردى سۋارۋ جۇمىستارى بويىنشا جۇزەگە اسىرىلعان جاڭا جوبانى كوردى. سۋارۋ جۇمىسىن قولعا العان «كح ەلميرا» مەردىگەر مەكەمەسى يزرايل ەلىنەن جەتكىزىلگەن جاڭا تەحنولوگيا ارقىلى اعاشتار مەن گۇلزارلاردى تامشىلاتىپ سۋارۋ ادىسىنە كوشكەن. ماماندار اقتوبە قالاسى بويىنشا العاش رەت جۇزەگە اسىپ وتىرعان بۇل ءادىستىڭ ارتىقشىلىعى كوپ ەكەنىن ايتادى 70 مەتر تەرەڭدىككە ورناتىلعان ناسوس اۆتوماتتى تۇردە اعاشتار مەن كوگالدى شوپتەردى, ۋاقىتىلى ءارى بىرقالىپتا سۋمەن قامتيدى. سۋ تاسىعىش كولىكتەرمەن سۋارعاننان گورى, وسى ءتاسىل ارقىلى تامشىلاتىپ سۋارۋ تيىمدىرەك دەيدى ماماندار. تەحنيكا كۇنىنە 100 تەكشە مەتر سۋ شىعارۋعا قۋاتتى. اقتوبەدە الداعى ۋاقىتتا اعاش سۋارۋ مەن كوگالدى ىلعالداندىرۋ بويىنشا 8 جوبانى جۇزەگە اسىرۋ جوسپارلانىپ وتىر. ايماق باسشىسى, جاڭا ءتاسىل ۇنەمدى ءارى پايدالى بولسا, ءارى قاراي دا جۇمىستى جانداندىرۋ قاجەتتىگىن ايتتى.
«اعاشتاردى ەككەنمەن ولاردى ۋاقىتىلى كۇتىپ-باپتاۋدى ۇمىت قالدىرىپ جاتسىزدار. بۇل ءبىر جاعىنان ۇلكەن شىعىنعا ۇشىراتسا, ەكىنشى جاعىنان تۇرعىنداردىڭ نارازىلىعىن تۋدىرادى. سوندىقتان ءسۋارۋ ادىسى وسىلاي شەشىمىن تاۋىپ جاتسا, بۇل جۇمىس جالعاسىن تابۋ قاجەت», دەدى وبلىس باسشىسى.
سونىمەن قاتار,وڭداسىن ورازالين سازدى وزەنى ارناسىن كەڭەيتۋ جانە بەكىتۋ جۇمىستارىمەن تانىسىپ, قالا اكىمىنە جۇمىستى ساپالى ءارى ۋاقىتىلى جۇرگىزۋدى تاپسىردى.