كەزدەسۋدە «عارىشتىق تەحنيكا جانە تەحنولوگيالار ينستيتۋتىن» «زەردە» ۇلتتىق ينفوكوممۋنيكاتسيالىق حولدينگى» اكتسيونەرلىك قوعامىنا بەرۋدىڭ ورىنسىزدىعى تۋرالى ماسەلە تالقىلاندى. سەناتور تالعات مۇساباەۆ وسى ماسەلەنى سەنات وتىرىسىندا بۇرىن كوتەرگەن بولاتىن.
كەزدەسۋدە بايانداما جاساعان تسيفرلىق دامۋ, قورعانىس جانە اەروعارىش ونەركاسىبى ءمينيسترىنىڭ ورىنباسارى مارات نۇرعوجين دەپۋتاتتاردى قالىپتاسقان جاعداي تۋرالى حاباردار ەتتى.
اتاپ ايتقاندا, ينستيتۋت سوڭعى ۋاقىتتا كاسىپكەرلىك قىزمەتتى ەداۋىر ارتتىرعان بولاتىن. وسىلايشا, ينفوكوممۋنيكاتسيالىق تەحنولوگيالاردى دامىتۋ جوبالارىنا قاتىستى ينستيتۋت جاڭالىقتارىنىڭ ەداۋىر بولىگى «Yellow Pages Rule» قاعيداتتارىنا قايشى كەلەدى, وعان سايكەس بيزنەس ۇسىناتىن قىزمەتتەردى مەملەكەت جۇزەگە اسىرمايدى. وسىعان بايلانىستى, مينيسترلىك باعدارلامالىق قامتاماسىز ەتۋ مەن اقپاراتتىق جۇيەلەردى ازىرلەۋ جونىندەگى ينستيتۋت جارعىسىندا بەكىتىلگەن ءىت-مىندەتتى الىپ تاستاۋدى, سونداي-اق ينستيتۋتتى «زەردە» اكتسيونەرلىك قوعامىنا بەرۋدى ۇسىنادى.
«ينستيتۋتتى «زەردە» حولدينگىنىڭ قاراماعىنا بەرۋ قازىرگى ۋاقىتتا بار ينستيتۋتتىڭ تەحنولوگيالىق جانە كادرلىق الەۋەتىن جوعالتۋعا جانە سونىڭ سالدارىنان قازاقستاننىڭ عارىش سالاسىنداعى باس عىلىمي-زەرتتەۋ ينستيتۋتىنىڭ جويىلۋىنا الىپ كەلۋى مۇمكىن», - دەپ اتاپ ءوتتى دەپۋتات ت.مۇساباەۆ. ونىڭ پىكىرىنشە, ينستيتۋتتاعى عارىش تەحنيكاسى مەن تەحنولوگيالارىن ازىرلەۋ سالاسىنا جەتەكشىلىك ەتۋ ءۇشىن «زەردە» حولدينگىندە عارىش تەحنيكاسى مەن تەحنولوگيالارىن ازىرلەۋ ماسەلەلەرىندە قۇزىرەتتى عالىمدار مەن ماماندار جوق.
كوميتەت دەپۋتاتتارى كەزدەسۋدى قورىتىندىلاي كەلىپ, ينستيتۋتتى قايتا ۇيىمداستىرۋ ونىڭ كوممەرتسيالىق قىزمەتى عارىش سالاسىنا زيان كەلتىرمەي دامۋى ءتيىس ەكەنىن اتاپ ءوتتى. بۇل ماسەلەدە ونىڭ ماقساتى - عارىش تەحنيكاسى مەن تەحنولوگياسىنىڭ جاسالۋىن عىلىمي-تەحنولوگيالىق قامتاماسىز ەتۋ بولىپ قالۋى ءتيىس, وسىعان بايلانىستى مينيسترلىككە ينستيتۋتتىڭ قولدانىستاعى قۇرىلىمىن ساقتاۋ ۇسىنىلدى.