قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ «يگىلىك بارشاعا! ساباقتاستىق. ادىلدىك. ورلەۋ» اتتى سايلاۋالدى تۇعىرناماسى مەن «بىرگە» جالپىۇلتتىق اكتسياسىنىڭ بارىسىندا ەل ازاماتتارىنان كەلىپ تۇسكەن ۇسىنىستاردى جۇزەگە اسىرۋ جونىندەگى ءىس-قيمىل جوسپارىن بەكىتۋ تۋرالى جارلىققا قول قويدى. بۇل تۋرالى اقوردانىڭ ءباسپاسوز قىزمەتى حابارلادى.
جارلىق پرەزيدەنتتىڭ سايلاۋالدى باعدارلاماسىندا باياندالعان قازاقستاننىڭ الەۋمەتتىك-ەكونوميكالىق جانە ساياسي دامۋى جونىندەگى بارلىق مىندەتتەردىڭ ناقتى مەرزىمدەرى مەن جاۋاپتى مەملەكەتتىك ورگاندارىن كورسەتە وتىرىپ, ۋاقتىلى ورىندالۋىن قامتاماسىز ەتۋگە باعىتتالعان.
ءىس-قيمىل جوسپارىنا سوت جۇيەسىن جاڭعىرتۋ, پوليتسيا قىزمەتىنە قوعامدىق باقىلاۋدى كۇشەيتۋ, مەملەكەتتىك قىزمەتتى جەتىلدىرۋ, كۆازيمەملەكەتتىك سەكتورعا قوعامدىق باقىلاۋ مەن ەسەپ بەرۋىن كۇشەيتۋ, مونوپوليستەر تاراپىنان باسەكەگە كەدەرگىلەردى جويۋ جانە اسىرا پايدالانۋدى بولدىرماۋ, ازاماتتارعا كەپىلدى الەۋمەتتىك قولداۋ كورسەتۋدە بىرىڭعاي ستاندارتتار بەلگىلەۋ, ولاردىڭ قارجىلىق مۇددەلەرىن قورعاۋ جانە باسقا دا بىرقاتار ءىس-شارالاردى قامتىعان. كەشەندى جانە ۇزاقمەرزىمدى سيپاتتاعى ۆەدومستۆوارالىق ءىس-قيمىلدى قاجەت ەتەتىن ماسەلەلەرگە قاتىستى مەملەكەتتىك ورگاندار تاراپىنان جەكە جول كارتاسى جاسالادى. ونى ازىرلەۋگە قوعامدىق ساراپشىلار تارتىلاتىن بولادى.
بۇل قۇجاتتار مەملەكەت باسشىسىنىڭ جۇكتەگەن مىندەتتەمەلەرىنىڭ ناتيجەلى ءارى بەكىتىلگەن مەرزىمىندە ورىندالۋىن رەتتەيدى.
جوسپاردىڭ ورىندالۋىن باقىلاۋ پرەزيدەنت اكىمشىلىگىنە جۇكتەلدى.