2018 جىلعى رەسپۋبليكالىق بيۋدجەتتىڭ ورىندالۋى تۋرالى بايانداي وتىرىپ, قر پرەمەر-ءمينيسترىنىڭ ءبىرىنشى ورىنباسارى – قارجى ءمينيسترى ءاليحان سمايىلوۆ 2018 جىلدىڭ بيۋدجەتتىك ساياساتى مەملەكەتتىك قارجىنىڭ تۇراقتىلىعىن نىعايتۋعا جانە ەكونوميكانى ودان ءارى دامىتۋعا باعىتتالعانىن اتاپ ءوتتى.
بيۋدجەت قاراجاتتارىن جۇمساۋدىڭ باسىم باعىتتارى — ەكونوميكانىڭ ناقتى سەكتورىن قولداۋ, جۇمىس ورىندارىن ساقتاۋ جانە الەۋمەتتىك سالانى دامىتۋ بولدى. 2018 جىلدىڭ قورىتىندىسى بويىنشا ەكونوميكا ءوسىمى 4,1% قۇرادى. بيۋدجەتكە 8,8 ترلن تەڭگە ءتۇسىم ءتۇستى. شىعىستار بويىنشا ورىندالۋدىڭ جوعارى پايىزى قامتاماسىز ەتىلدى – 99,8%.
«بيۋدجەتتىڭ الەۋمەتتىك باعىتتىلىعى ساقتالدى. اتالعان ماقساتتارعا بارلىق شىعىنداردىڭ جارتىسىنا جۋىعى پايدالانىلدى, ياعني بۇل – 4,3 ترلن تەڭگە. الەۋمەتتىك كومەك پەن الەۋمەتتىك قامسىزداندىرۋعا 2,6 ترلن تەڭگە ءبولىندى. بيۋدجەتتەن 3 ملن 530 مىڭ ادامعا زەينەتاقى مەن جاردەماقىلار تولەندى», — دەدى ءا. سمايىلوۆ.
وتىرىس بارىسىندا قر پارلامەنتى سەناتىنىڭ دەپۋتاتى س. پلوتنيكوۆ, قر پارلامەنتى ءماجىلىسىنىڭ دەپۋتاتى ق. جاباعيەۆ مەملەكەتتىك باعدارلامالاردى ىسكە اسىرۋ, رەسپۋبليكالىق بيۋدجەتتى اتقارۋ, سونداي-اق, وتاندىق اۆتوونەركاسىپتى دامىتۋ ماسەلەلەرىن قوزعادى.
قر پرەمەر-ءمينيسترى ا. مامين بيۋدجەتتى جوسپارلاۋدىڭ تيىمدىلىگىن ودان ءارى ارتتىرۋ جانە تولىقتاي يگەرۋدى قامتاماسىز ەتۋ ماقساتىندا وسى جىلدىڭ سوڭىنا دەيىن ەنگىزىلەتىن بىرقاتار رەفورما دايىندالىپ جاتقانىن اتاپ ءوتتى.
اۆتوونەركاسىپتى دامىتۋعا قاتىستى, قر ۇكىمەتىنىڭ باسشىسى وسى جىلدىڭ بەس ايىنىڭ قورىتىندىسى بويىنشا اۆتوونەركاسىپتىڭ 46%-عا وسكەنىن مالىمدەدى. بۇگىندە اۆتوونەركاسىپ سالاسى قازاقستاندا ەكونوميكانىڭ نەگىزگى درايۆەرىنە اينالۋدا. وتكەن جىلى 30 مىڭعا جۋىق اۆتوكولىك شىعارىلدى, بيىل 50 مىڭنان استام اۆتوكولىك شىعارۋ كوزدەلگەن.
2021 جىلعا قاراي جەرگىلىكتەندىرۋ دەڭگەيىن 50% دەيىن جەتكىزۋ جۇمىستارى جۇرگىزىلۋدە. اۆتونەسيەلەندىرۋ اياسىندا قولجەتىمدىلىكتى ارتتىرۋ ماقساتىندا وتكەن جىلى 3 مىڭعا جۋىق اۆتوكولىك قارجىلاندىرىلدى.
بيىل ۇلتتىق بانكپەن بىرلەسىپ نەسيەلەندىرۋ كولەمىن 15 مىڭ اۆتوموبيلگە دەيىن جەتكىزۋ جوسپارلانعان. وتاندىق اۆتوموبيلدەردى ساتىپ الۋ بويىنشا نەسيەلەندىرۋ كولەمى بەس ەسەگە ارتتىرىلادى.
«بۇل ءوندىرىستى دامىتۋ ءۇشىن ءتيىستى سەرپىن بەرەدى, ال قازاقستان ازاماتتارى اۆتوكولىك ساتىپ الۋ ءۇشىن جەڭىلدىكپەن قارجى قۇرالىنا يە بولا الادى. بۇل جەردەگى ديناميكا جاقسى, ونى ارتتىراتىن بولامىز», — دەپ جاۋاپ بەردى پرەمەر-مينيستر.
وتىرىس سوڭىندا پرەمەر-مينيستر ا. مامين دەپۋتاتتارعا بىرلەسكەن ءتيىمدى جۇمىسى, ۇكىمەتتىڭ 2018 جىلعى رەسپۋبليكالىق بيۋدجەتتىڭ ورىندالۋى تۋرالى ەسەبىن تىڭداۋ بويىنشا اشىق ءارى سىندارلى ۇسىنىستارى ءۇشىن العىس ءبىلدىردى.
«دەپۋتاتتار كوتەرگەن بارلىق ساۋالدار, ەسكەرتۋلەر مەن ۇسىنىستار بويىنشا ناقتى جۇمىستار ۇيىمداستىرىلادى. قاجەتتى شارالار شۇعىل قابىلدانادى», — دەدى ا. مامين.
سونىمەن قاتار قر پارلامەنت پالاتالارىنىڭ بىرلەسكەن وتىرىسىندا 2018 جىلعى رەسپۋبليكالىق بيۋدجەتتىڭ ورىندالۋىن باقىلاۋ جونىندەگى ەسەپ كوميتەتىنىڭ ەسەبى جاريالاندى.
ەسەپ كوميتەتىنىڭ توراعاسى ناتاليا گودۋنوۆا 2018 جىلى رەسپۋبليكالىق بيۋدجەتتىڭ ورىندالۋى ۇكىمەتتىڭ پارلامەنت پەن ەسەپ كوميتەتىنىڭ وتكەن جىلعى ۇسىنىستارىن ەسكەرۋمەن بيۋدجەت پروتسەسىندە جۇرگىزگەن اۋقىمدى وزگەرىستەرىنىڭ اياسىندا وتكەنىن ايتتى.
«وتكەن جىلعى قاراستىرۋ قورىتىندىسى بويىنشا ەسەپ كوميتەتىنىڭ ۇكىمەت پەن مەملەكەتتىك ورگاندارعا بەرگەن ۇسىنىستار قاتارىنان 72%-ى ىسكە اسىرىلعان جانە ورىندالۋ ساتىسىندا, بۇل بيۋدجەتتىڭ ورىندالۋى بويىنشا جاعدايدى جاقسارتۋعا سەپتىگىن تيگىزدى. بيۋدجەتكە 2 ەسە از تۇزەتۋلەر ەنگىزىلدى, بيۋدجەت قاراجاتىن ءتيىمسىز پايدالانۋ 4 ەسەگە دەرلىك تومەندەدى, وڭ ديناميكا نىعايدى», — دەدى ن. گودۋنوۆا.