مۇنداي وقيعالار كەزىندە سول ماڭايعا كەزدەيسوق تاپ بولعان ازاماتتاردىڭ قۇربانداردى قۇتقارۋدا ايانىپ قالماسى انىق. سولاي ەتۋدە دە...
وسىنداي سىن ساعاتتارىندا العاشقى مەديتسينالىق كومەك الىپپەسىن, كەلىسسوزدەردىڭ قۇپياسىن مەڭگەرگەن, بىلەك كۇشتەرى بىلەۋلەنگەن, ۇستامدىلىق قاسيەتتەرىن بويىنا سىڭىرگەن پوليتسيا قىزمەتكەرلەرىنىڭ ەڭبەگىن ەرەكشەلەپ ايتۋعا بولادى. اسىرەسە سوڭعى كەزدەرى حالقىمىزعا مۇلدەم جات قۇبىلىس – ءوز-وزىنە قول جۇمساۋعا بەكىنگەن جانداردى قۇتقارىپ قالۋدا ىشكى ىستەر سالاسىنىڭ وكىلدەرى از ەڭبەك ءسىڭىرىپ جاتقان جوق.
وسى ءسوزىمىزدى ناقتى دەرەكتەرمەن تۇزدىقتاساق, جۋىردا اقتوبە تەمىر جول ستانساسى ماڭايىن جوسپارلى شولۋ بارىسىندا جەلىلىك پوليتسيا ءبولىمىنىڭ قىزمەتكەرلەرى شىڭعىس قامباربەكوۆ جانە جانسەرىك شاۋتەنوۆ وتپەلى كوپىردەن سەكىرۋگە وقتالىپ تۇرعان قىزدى بايقايدى. اقىرىن جاقىنداپ, جىلى سوزبەن, سۋيتسيد جاساۋعا بەكىنگەن قىزدى رايىنان قايتارۋعا پوليتسەيلەر بارىن سالادى. ءسويتىپ جاسى جيىرما ەكىگە ەندى تولعان قىز پوليتسەيلەردىڭ شەبەر پسيحولوگيالىق «شابۋىلىنىڭ» ارقاسىندا اجالدان امان قالدى. قۇتقارىلعان قىزعا ودان ءارى اقتوبە ۆوكزالىندا كاسىبي پسيحولوگتار كومەك كورسەتتى.
ال پاۆلوداردا جۇبايىمەن رەنجىسىپ, كوزىن جاسقا بۇلاعان 32 جاستاعى كەلىنشەك ومىرىمەن قوش ايتىسپاق بولىپ, ەرتىس وزەنىنىڭ جاعالاۋىنان ءبىر-اق شىققان. اششى سۋدىڭ بۋىمەن اشۋىنا توتەپ بەرە الماعان بۇل بەيباق ءىس ناسىرعا شاپقان جاعدايدا ارتىندا ءۇش بالاسىنىڭ زار يلەپ قالاتىندىعىن دا ويلاماسا كەرەك. كورەتىن جارىعى تاۋسىلماسا كەرەك, بۋىرقانعان وزەننىڭ ءۇستىندەگى كوپىردە كوز جاسىن سوراداي اعىزىپ تۇرعان كەلىنشەكتى بايقاعان اۆتوكولىك ءجۇرگىزۋشىلەرى بۇل جايتتى «رۋبەج» باقىلاۋ بەكەتىندە كەزەكشىلىك اتقارىپ تۇرعان پوليتسەيلەرگە حابارلايدى. دەرەۋ وقيعا ورنىنا جەتكەن كىشى لەيتەنانت ەربول ايعوجين كەلىنشەكتى جىلى ءسوزدەرىمەن جۇباتىپ, الداۋسىراتىپ تۇرىپ جانىنا تاياعان ساتتە كوپىردىڭ ەرنەۋىندە تۇرعان جەرىنەن موينىنان قۇشاقتاي الىپ جەرگە ءتۇسىرىپ ۇلگەرگەن.
سولتۇستىكقازاقستاندىق پوليتسيا دەپارتامەنتىنىڭ قىزمەتكەرى كىشى سەرجانت دەنيس كوماروۆتىڭ جەكسەنبىلىك كەشتەگى كەزەكشىلىكتەرىنىڭ ءبىرى ۇزاق ۋاقىت ەسىندە قالارى انىق. قىزىلجارداعى «جەڭىس ساياباعىنىڭ» اۋماعىندا قۇقىقتىق ءتارتىپتىڭ ساقتالۋىن قاداعالاپ جۇرگەن پوليتسەي سول ماڭايداعى ورىندىقتاردىڭ ءبىرىنە ۇيالى تەلەفونىن قالدىرا سالا, ەسىل وزەنىنە قاراي سۇرىنە-قابىنا ءجۇگىرگەن قىزدى بايقاپ قالادى. اياعىن جىلدامىراق باسىپ, بەيتانىس بويجەتكەننىڭ تەلەفونىن الا سالا سوڭىنان جۇگىرگەن دەنيس بيىكتىگى 25-30 مەتر جارقاباقتان سەكىرمەك بولىپ تۇرعان قىزدى كورگەندە ويى سان-ساققا جۇگىردى. مىندەت – بەيتانىس جاندى اجالدان اراشالاۋ. كاسىبي داعدى بويىنشا: «توقتاڭىز! ءسىزدىڭ اپكە, ىنىلەرىڭىز بار ما؟ ولار جايلى ويلاڭىز...», دەپ قىزدى اڭگىمەگە تارتىپ, رايىنان قايتارىپ, جاقىن كەلمەك بولادى. بىراق جاعالاۋداعى قىز پوليتسەيگە جاقىنداماۋدى بۇيىرىپ, العان بەتىنەن قايتپاۋعا بەكىنگەن. د.كوماروۆ قولىنداعى راتسيامەن اقىرىن سويلەپ, ءارىپتەستەرىن كومەككە شاقىرعان. ونى جۇبانىش سوزدەرىمەن الاڭداتا وتىرىپ, قاسىنا تاياعان ساتتە قولىنان شاپ بەرىپ ۇستاپ, قاۋىپسىز جەرگە الىپ شىعادى.
ال قىزىلوردا قالالىق پوليتسيا باسقارماسىنىڭ ۋچاسكەلىك پوليتسيا قىزمەتكەرلەرى جاسۇلان ساربالاەۆ پەن باۋىرجان الدابەرگەن «102» تەلەفونىنا «شۇعىلا» شاعىن اۋدانىندا اشىق تەرەزە جاقتاۋىندا 2-3 جاستاعى بالدىرعاننىڭ وتىرعانى تۋرالى حابارلامادان سوڭ وقيعا ورنىنا شۇعىل جەتەدى.
ايتسا ايتقانداي, اشىق تەرەزە الدىندا قاپەرسىز وتىرعان بالا قاۋىپتى سەزەتىن جاستا ەمەس ەكەن. ويلانۋعا ۋاقىت تاپشى. ج.ساربالاەۆ تەرەزەگە جاقىن تارتىلعان گاز قۇبىرىنا ءورمەلەپ شىعىپ, بالانىڭ تۇسىنا كەلگەن ساتتە ونى پاتەرگە قاراي يتەرىپ قۇلاتادى. ارينە پوليتسەيدىڭ فيزيكالىق دايارلىعىنىڭ پايداسى دا وسىندايدا تيەدى. ءىس وڭتايلى شەشىلگەننەن كەيىن ب.الدابەرگەن كورشى-كولەمدى ارالاپ, ءۇي يەلەرىن ىزدەۋگە كىرىسەدى. سويتسە بالدىرعاننىڭ اناسى جۇمىستا, ال اكەسى دۇكەنگە شىعىپ كەتكەن ەكەن.
پوليتسيا قىزمەتكەرلەرىنىڭ ءورتتىڭ كەزىندەگى كوزسىز ەرلىكتەرى دە بۇقارالىق اقپارات قۇرالدارىندا ءجيى جاريالانىپ تۇرادى. سوڭى قۋانىشقا ۇلاسقان مۇنداي وقيعالار كەزىندەگى شۇعىل شەشىمدەر مەن قۇتقارۋ وپەراتسيالارى ساناۋلى مينۋتتاردا جۇزەگە اسىرىلادى.
ال پوليتسيا قىزمەتكەرلەرى دەمالىس كەزىن ايتپاعاندا, زەينەتكەرلىككە شىققان سوڭ دا انتىنان تايمايدى. ايتالىق تاياۋدا ششۋچە قالاسىندا تۇراتىن ىشكى ىستەر سالاسىنىڭ ارداگەرى ەرجان ارعىمباەۆ تۇنگى ساعات ءۇشتىڭ شاماسىندا كورشى ۇيدەن بۋداقتاپ شىققان ءتۇتىندى بايقايدى. ساناۋلى مينۋتتار ءىشىندە قىزىل جالىن شارپي باستاعان ۇيگە جەتىپ ەسىگىن قاققانىمەن ەشكىم ەسىك اشپايدى. سودان بەت شارپىعان جالىنعا قاراماستان, تەرەزەنى سىندىرىپ ىشكە كىرىپ, كوزگە ءتۇرتكىسىز قاراڭعىدا, قاننەن-قاپەرسىز ۇيىقتاپ جاتقان ەگدە جاستاعى ەكى ادامدى سىرتقا الىپ شىعىپ ۇلگەرگەن.
باتىرىمىز كولىكتەگى پوليتسيا دەپارتامەنتىندە 20 جىلدان اسا ەڭبەك ەتىپ, ماكينكا ستانساسىنىڭ جەلىلىك پوليتسيا ءبولىمىنىڭ باستىعى لاۋازىمىنان قۇرمەتتى ەڭبەك دەمالىسىنا شىققان جان بولاتىن.
مىنە, كوپ وقيعالاردىڭ ىشىنەن بۇل دەرەكتەردى ءسۇزىپ العانداعى ماقسات بىرەۋ – ەرلىك ىستەردى ۇلگى قىلۋ, اجالدىڭ ايتىپ كەلمەيتىنىن, قاۋىپ-قاتەردىڭ توسىننان بولاتىنىن ەسكە سالۋ. ارينە پوليتسيانىڭ شىمىر جىگىتتەرىنىڭ ەڭبەكتەرى ەرەن, ولاردىڭ الدى مەملەكەتتىك ناگرادالار دا يەلەندى, بىراق قۇتقارۋشىلار ءوز ءىستەرىن ەرلىككە بالامايدى, باستىسى – ادامداردىڭ اماندىعى.