قازاقستان رەسپۋبليكاسىنىڭ پرەمەر-ءمينيسترى اسقار مامين جاڭا قر ساۋدا جانە ينتەگراتسيا مينيسترلىگىنىڭ ۇجىمىنا مەملەكەت باسشىسىنىڭ جارلىعىمەن تاعايىندالعان باسشى باقىت سۇلتانوۆتى تانىستىردى.
اسقار مامين تانىستىرۋ بارىسىندا ب. سۇلتانوۆتىڭ باسشىلىق قىزمەتتەردەگى كوپ جىلدىق جۇمىس تاجىريبەسىن اتاپ ءوتتى. ول ەكونوميكا جانە بيۋدجەتتىك جوسپارلاۋ, قارجى مينيسترلىكتەرىن باسقارعان. ءتۇرلى جىلدارى پرەمەر-ءمينيستردىڭ ورىنباسارى, پرەزيدەنتتىڭ كومەكشىسى, پرەزيدەنت اكىمشىلىگى باسشىسىنىڭ ورىنباسارى قىزمەتتەرىن اتقارعان. وسىعان دەيىن نۇر-سۇلتان قالاسىنىڭ اكىمى قىزمەتىن اتقارعان.
«ب. سۇلتانوۆتىڭ جاڭا مەملەكەتتىك ورگاننىڭ جۇمىسىن ۇيىمداستىرۋعا جانە قويىلعان مىندەتتەردى ساپالى ورىنداۋعا قاجەتتى مول تاجىريبەسى بار», — دەدى ا. مامين.
قر پرەمەر-ءمينيسترى ب. سۇلتانوۆتىڭ مەملەكەت باسشىسىنىڭ ۇلكەن سەنىمىن اقتاپ, جاڭا مينيسترلىكتىڭ الدىندا تۇرعان ماڭىزدى مىندەتتەردىڭ ساپالى ورىندالۋىن قامتاماسىز ەتەتىنىنە سەنىم ءبىلدىردى.
قر ساۋدا جانە ينتەگراتسيا مينيسترلىگىنە ىشكى جانە سىرتقى ساۋدا ساياساتى, ەكسپورتتى ۇيلەستىرۋ جانە ىلگەرىلەتۋ, تەحنيكالىق رەتتەۋ جانە ستاندارتتاۋ سالاسىنداعى فۋنكتسيالار بەرىلگەن.