قازاقستان رەسپۋبليكاسىنىڭ پرەمەر-ءمينيسترى اسقار مامين ەكولوگيا, گەولوگيا جانە تابيعي رەسۋرستار جاڭا مينيسترلىگىنىڭ ۇجىمىمەن كەزدەسۋدە قر پرەزيدەنتىنىڭ جارلىعىمەن ۆەدومستۆو ءمينيسترى بولىپ تاعايىندالعان ماعزۇم مىرزاعاليەۆتى تانىستىردى.
ەكولوگيا, گەولوگيا جانە تابيعي رەسۋرستار مينيسترلىگىنە قورشاعان ورتانى قورعاۋ, تابيعي رەسۋرستاردىڭ ۇتىمدى پايدالانىلۋىن قاداعالاۋ, گەولوگيا جانە مينەرالدى-شيكىزاتتىق بازانى قايتا ءوندىرۋ وكىلەتتىكتەرى, سونداي-اق, قاتتى تۇرمىستىق قالدىقتاردىڭ اينالىمى, سۋمەن جابدىقتاۋ جانە سۋ تارتۋ, ورمان شارۋاشىلىعى ماسەلەلەرى بەرىلدى.
ا. مامين م. مىرزاعاليەۆتىڭ بىلىكتى مامان, تاجىريبەلى باسشى ەكەنىن اتاپ ءوتتى. ول مۇناي-گاز سالاسىندا جۇمىس ىستەگەن, «قازمۇنايگاز» ۇك توراعاسىنىڭ ورىنباسارى, مۇناي جانە گاز ۆيتسە-ءمينيسترى قىزمەتتەرىن اتقارعان. قازىرگى تاڭعا دەيىن ەنەرگەتيكا ۆيتسە-ءمينيسترى لاۋازىمىن اتقاردى.
«پرەزيدەنت سىزگە, وتە ماڭىزدى باعىتتى باسقارۋدى جانە جاڭا مەملەكەتتىك ورگاننىڭ جۇمىسىن ۇيىمداستىرىپ, العا قويىلعان مىندەتتەردى ورىنداۋدى سەنىپ تاپسىردى», — دەپ قر پرەمەر-ءمينيسترى اسقار مامين, بارلىق ۇيىمداستىرۋ ماسەلەلەرىن جەدەل شەشۋدى جانە جۇمىسقا كىرىسۋدى تاپسىردى.