2019 جىلدىڭ ءۇشىنشى ءساۋىرى مەن ونىنشى ماۋسىم ارالىعىندا وتكىزىلگەن, ياعني تابانى كۇرەكتەي ءۇش اي جەتى كۇنگە سوزىلعان دۇبىرگە تولى جارىس سپورتتى ءبىلىم بەرۋ جۇيەسىنىڭ باستى ەلەمەنتتەرىنىڭ ءبىرى رەتىندە دامىتۋعا نەگىز قالاعانى حاق. ەكىنشىدەن, ۋنيۆەرسيادا بۇقارالىق سپورتتىڭ ءورىسىن ءوسىرۋ مەن سالاماتتى ءومىر سالتىن ورىستەتە تۇسۋگە دە جاڭاشا سەرپىن بەرگەنىن ايتۋعا ءتيىسپىز.
ۋنيۆەرسيادا ويىندارىنىڭ كەيبىر تۇرلەرى ەلىمىزدىڭ الماتى, شىمكەنت, وسكەمەن, ورال جانە تاراز قالالارىندا وتكىزىلگەنىمەن, ونىڭ نەگىزگى سالماعى اقتوبەگە تۇسكەنى تالاس تۋعىزبايدى. ايتالىق, وتكەن جىلى تالدىقورعان قالاسىندا اياقتالعان ءىح جازعى ۋنيۆەرسيادادا ەلىمىزدىڭ 52 جوعارى وقۋ ورنىنىڭ سپورتشىلارى باق سىناسا, بيىل اقتوبەدەگى ق.جۇبانوۆ اتىنداعى وڭىرلىك مەملەكەتتىك ۋنيۆەرسيتەتتىڭ بازاسىندا ءوتكىزىلگەن بايراقتى باسەكەگە جوو-نىڭ كوماندالارى قاتىسىپ, سپورتتىڭ 38 ءتۇرى بويىنشا باق سىنادى. سونداي-اق ح جازعى ۋنيۆەرسياداعا 480 كوماندادان 4025 سپورتشى قاتىسقانى اتاپ ايتۋعا تۇرارلىق. بۇل كورسەتكىش بىلتىرعى جىلمەن سالىستىرعاندا 70 پايىزعا ارتىق.
ۋنيۆەرسيادانىڭ سالتاناتتى تۇردە جابىلۋ ءراسىمى كەزىندە ءبىلىم جانە عىلىم مينيسترلىگى ۇلتتىق عىلىمي-پراكتيكالىق دەنە تاربيەسى ورتالىعىنىڭ باس ديرەكتورى سادىق مۇستافاەۆ ءسوز تيەگىن وسى ارنادان ساباقتادى. وسى ارادا جالپى كوماندالىق ەسەپتە ءبىرىنشى ورىندى ءال-فارابي اتىنداعى قازاق ۇلتتىق ۋنيۆەرسيتەتىنىڭ كومانداسى ۇتىپ العانىن ايتۋعا ءتيىسپىز. ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ كومانداسى جۇلدەلى ەكىنشى ورىندى ەنشىلەدى. ال ءۇشىنشى ورىندى ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ سپورتشى ستۋدەنتتەرى قانجىعاسىنا بوكتەردى.
سونىمەن بىرگە X جازعى ۋنيۆەرسيادا سايىستارى كەزىندە م.ح.دۋلاتي اتىنداعى تاراز مەملەكەتتىك, ق.ا.ياساۋي اتىنداعى قازاق-تۇرىك جانە س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتتەرىنىڭ كوماندالارى ءساتتى ويىن ورنەكتەرىن كورسەتە ءبىلدى. ولاردىڭ ءبارى ءبىلىم جانە عىلىم مينيسترلىگى مەن ۇلتتىق عىلىمي-پراكتيكالىق دەنە تاربيەسى ورتالىعىنىڭ قۇرمەت گرامموتالارىمەن ارنايى ماراپاتتالدى جانە كۋبوكتار مەن ەستەلىك مەدالدارعا يە بولدى.
اقتوبە قالاسىندا اياقتالعان X جازعى ۋنيۆەرسيادانىڭ جەڭىمپازدارى بيىل يتاليانىڭ نەاپول قالاسىندا وتكىزىلەتىن XXX جازعى بۇكىل دۇنيەجۇزىلىك ۋنيۆەرسياداعا قاتىسىپ ەلىمىزدىڭ نامىسىن قورعاماق.
اقتوبە