– قىزىم, – دەگەن ول,– ەڭ ابزالى دارىگەر بولۋ. قانشاما ادامعا قۋانىش سىيلايسىڭ. ال بالالار دارىگەرى بولساڭ, ءتىپتى جاقسى. بالادان اسقان باقىت جوق قوي.
انا ءسوزى امانات ىسپەتتى. 1986 جىلى كازگورودوك ورتا مەكتەبىن بىتىرگەننەن كەيىن تسەلينوگراد مەملەكەتتىك مەديتسينا ينستيتۋتىندا ءبىلىم الدى. وبلىستىق بالالار اۋرۋحاناسىندا تابان اۋدارماستان 18 جىل قىزمەت ەتكەننەن كەيىن ەڭبەك جولى قالالىق ەمحانادا جالعاستى. وسى جىلدار ىشىندە مول تاجىريبە جيناقتادى, ءبىلىمىن بايىتتى.
سول تاجىريبەسىنە سۇيەنگەن بالالار دارىگەرى ءاليا گاينۋتدينوۆانىڭ ايتۋىنا قاراعاندا, بالالار بويىنداعى دەرت جىل ماۋسىمىنا بايلانىستى بىردە ازايىپ, بىردە كوبەيىپ تۇرادى ەكەن. ماسەلەن, تىنىس الۋ ورگاندارى, وكپەنىڭ قابىنۋى قاقاعان قىس ايلارىندا ءجيى كەزدەسەدى. كوكتەمنىڭ دە ءوز ەرەكشەلىگى بار. كەي جىلدارى بەلگىلەنگەن ءتارتىپ بويىنشا جىلۋ بەرۋ ماۋسىمى اياقتالعانىمەن, جادىراعان جازدىڭ شۋاعىن توگۋى كەشەۋىلدەيدى. بۇل ەندى سولتۇستىك ءوڭىرگە ءتان جايت. قالا پاتەرلەرى قوڭىرجاي سالقىن بولعان سوڭ بالالار اۋرۋعا ءجيى شالدىعادى. ەندىگى ءبىر ماسەلە وسى جۇقپالى دەرت بوي كوتەرىپ, اۋرۋ بەلەڭ العان تۇستا, ونىمەن كۇرەسۋدەگى قيىندىق. ماماننىڭ ايتۋىنا قاراعاندا, بالالار دارىگەرى جەتىسپەيدى. ءارقايسىسىنىڭ جۇكتەمەسى ەكى-ءۇش ەسەدەن كەلەدى. كادر تاپشىلىعىنا نەگىزگى سەبەپ, جالاقىنىڭ جارىتىمسىزدىعى, باسپانانىڭ جوقتىعى, الەۋمەتتىك-تۇرمىستىق جاعدايدىڭ ناشارلىعى.
قازىر بالالار اراسىندا ەڭ ءجيى كەزدەسەتىن اۋرۋ ءتۇرى – تىنىس ورگاندارى ەكەن. كۇنى-ءتۇنى كوك ءتۇتىننەن ارىلمايتىن قالانىڭ اۋاسى دا كەسىرىن تيگىزىپ جاتقانى انىق. ءبىر-بىرىنە ساباقتاسىپ جاتقان قيىندىق اتاۋلىنى كەشەندى ءتۇردە شەشە الساق, كەلەر ۇرپاق دەرتتەن ادا, ءتانى ساۋ بولىپ قالىپتاسادى.
– بالعىندار – ەل بولاشاعى, بولاشاعىمىز مىقتى بولۋى ءۇشىن دە وسى باستان ۇزاق جىل بويى قوردالانىپ قالعان ماسەلەلەردى كوپ بولىپ ءبىرلەسىپ شەشۋ كەرەك,–دەيدى ءاليا گاينۋتدينوۆا,–قازىر مەملەكەت تاراپىنان جاقسى قامقورلىق جاسالىپ وتىر. ءبىزدىڭ ەمحانانىڭ جانىندا كۇندىزگى ستاتسيونار بار. ەمدەلۋى, ءدارى-دارمەگى تەگىن. اي سايىن ونداعان بالا ەمدەلىپ, قۇلان-تازا جازىلىپ شىعادى. راس, كادر جەتپەگەن سوڭ ۋاقىتپەن ساناسپاي جۇمىس ءىستەۋگە تۋرا كەلەدى. ءبىز وعان ەش رەنجىمەيمىز. ويتكەنى بالادان اسقان باقىت جوق قوي.
اقمولا وبلىسى