ءبىرىنشى كەزدەسۋىندە جارىس قوجايىنى كوحەي سامبەنى 4:2 ەسەبىمەن ۇتقان قازاقستاندىق سپورتشى كيريلل گەراسيمەنكو كورەيالىق چو سىنمينمەن جولىققان بولاتىن. كيريلل 0:3 ناتيجەسىمەن جەڭىلىپ جاتىپ, ەسەپ ايىرماسىن 2:3-كە دەيىن قىسقارتا الدى. الايدا كارىس سپورتشىسى التىنشى پارتيادا تاعى دا ۇستەمدىگىن كورسەتىپ, 2:4 ەسەبىمەن جەڭىسكە جەتتى.
«ءۇشىنشى سەتتە كيريلل ءوز ويىن ورنەگىن تابا الدى. ءتورتىنشى سەتتى دە ءتاۋىر ويناعان. 0:3 ەسەبىمەن جەڭىلىپ جاتقانىنا قاراماستان, كەزدەسۋدە جەڭىسكە دە جەتۋگە بولۋشى ەدى. التىنشى پارتيادا 9:9 تەڭ ناتيجەسىندە باسىمدىلىققا يە بولعان. بىراق ساتتىلىك سەرىك بولمادى. تەننيس شارى راكەتكانىڭ قىرىنا ءتيىپ, اۋتقا ۇشىپ كەتتى. ءدال وسى ءسات ويىن تاعدىرىن شەشتى. كارىس سپورتشىسى وسال ويىنشى ەمەس. وسىدان ءبىر جارىم جىل بۇرىن كيريلل وعان 2:3 ەسەبىمەن دول بەرگەن. بۇل جولى جەڭىسكە جەتۋگە ءبىر تابان جاقىن بولدى. بىراق ساتتىلىك جەتىسپەدى», دەدى ۇلتتىق كوماندانىڭ كەڭەسشى-باپكەرى دميتري لەۆەنكو.