زەرتتەۋ بارىسىندا بەلگىلى بولعانداي ابايدىڭ بي بولىپ سايلانعاندىعىنا وراي 1885 جىلعى قۇندى قۇجات تابىلىپتى. ن.ي. لوباچەۆسي اتىنداعى قازان مەملەكەتتىك ۋنيۆەرسيتەتىنىڭ كىتاپحاناسىندا ابايدىڭ قوعامداعى ارالاسقان قىزمەتتەرى جايلى قۇجات قولعا ىلىككەن. 1885 جىلى قارامولا جەرىندەگى سەزدە قابىلدانعان اراب تىلىندەگى «قاراپايىم قازاقتارعا ارنالعان كودەكس» ءبىرىنشى قۇقىقتىق قۇجاتتىڭ تۇپنۇسقاسى وسى ەكەن.
- قارامولادا بارلىعى ابايدى سەزد توراعاسى ەتىپ سايلايدى, - دەدى اباي مۋزەيى ديرەكتورىنىڭ ورىنباسارى مەيرامگۇل قايرامباەۆا, – اباي ءۇش كۇن ىشىندە زاڭعا بايلانىستى ماقالالار جازادى. قۇجات 1885 جىلى مامىردا قابىلدانىپ, ءبىر جىل وتكەن سوڭ قازان قالاسىنداعى يمپەراتور ۋنيۆەرسيتەتىنىڭ باسپاحاناسىندا شىعارىلدى.
مامانداردىڭ ايتۋىنشا, اباي دەموكرات رەتىندە قاراپايىم قازاقتاردىڭ ءومىرىن قالاي جەڭىلدەتەمىز دەگەن باعىتتا كوپتەگەن ۇسىنىستار كىرگىزگەن. بۇعان دەيىن مۋزەيدە كيريلليتسا ۇلگىسىندەگى ماشينكاعا باسىلعان كوشىرمەسى عانا بار ەكەن. بۇل 1959 جىلعى كوشىرمە. سوندىقتان دا تابىلعان تۇپنۇسقا دال زاڭدارىن زەرتتەۋگە تولىق مۇمكىندىك بەرەدى.
راۋشان نۇعمانبەكوۆا
«ەgemen Qazaqstan»
سەمەي