پەتروپاۆل قالاسىندا كونسۋلتاتيۆتىك-دياگنوستيكالىق ورتالىعى بار 500 توسەك-ورىندىق كوپبەيىندى وبلىستىق اۋرۋحانا قۇرىلىسىنىڭ جوباسى تۋرالى قۇجاتقا سولتۇستىك قازاقستان وبلىسىنىڭ اكىمى ق. اقساقالوۆ پەن «YDA Holding» تۇرىك كومپانياسىنىڭ باسقارما توراعاسى ا. حۋسەين قول قويدى. اۋرۋحانا كەشەنى 7 كوپبەيىندى, توزعان جانە بولەك-بولەك نىسانداردىڭ ورنىنا سالىناتىن بولادى.
تاعى ءبىر كوپبەيىندى اۋرۋحانا تۇركىستان قالاسىندا سالىنادى. تۇركىستان وبلىسىنىڭ اكىمى ءو. شوكەەۆ, «BI-Holding» كومپانياسى كونسورتسيۋمى باقىلاۋشى كەڭەسىنىڭ توراعاسى ا. راحىمباەۆ جانە «YDA Holding» تۇرىك كومپانياسىنىڭ باسقارما توراعاسى ا. حۋسەين 610 توسەك-ورىندىق كوپبەيىندى وبلىستىق مەديتسينالىق ورتالىق قۇرىلىسىنىڭ جوباسى بويىنشا ءوزارا ىنتىماقتاستىق تۋرالى قۇجاتقا قول قويدى. اۋرۋحانادا ونكولوگيالىق جانە كارديولوگيالىق بولىمدەر, پەريناتالدى ورتالىق, جەدەل مەديتسينالىق جاردەم ستانتسياسىن جانە ت.ب اشۋ كوزدەلگەن. نىسان قۇرىلىسىن 2022 جىلى اياقتاۋ جوسپارلانعان.
قۇرىلىسقا, ەكى مەديتسينالىق نىساندى جابدىقتاۋعا تارتىلاتىن ينۆەستيتسيالاردىڭ جالپى كولەمى 110 ملرد تەڭگەگە جۋىق سومانى قۇرايدى.
ايتا كەتەيىك, بۇل جوبالار دەنساۋلىق ساقتاۋ ينفراقۇرىلىمدارىن دامىتۋدىڭ وڭىرلىك پەرسپەكتيۆالى جوسپارلارى اياسىندا ىسكە اسىرىلادى.
ينۆەستور كومپانيانىڭ باسقارما توراعاسى ا. حۋسەين اتاپ وتكەندەي, قازاقستانداعى ينۆەستيتسيالىق احۋال قولايلى جانە ينۆەستورلار ءۇشىن جوبالاردى جۇزەگە اسىرۋىنا بارلىق جاعدايلار جاسالعان.
قابىلدانىپ جاتقان شارالار ەلىمىزدىڭ اۋرۋحانا سەكتورىنىڭ ينفراقۇرىلىمىن جاڭارتىپ, ىشكى سۇرانىستى قاناعاتتاندىرىپ, كورسەتىلەتىن مەديتسينالىق قىزمەتتەردىڭ ساپاسىن, قولجەتىمدىلىگىن جانە ۋاقىتتىلىعىن ارتتىرادى, سونداي-اق ورتالىق ازيا مەن تمد ەلدەرى ءۇشىن مەديتسينالىق تۋريزم ورتالىعىنا اينالۋعا مۇمكىندىك بەرەدى.