كىتاپتىڭ تانىستىرىلىمىنا باق باسشىلارى, ارداگەر جۋرناليستەر قاتىستى. ءىس-شارا «Egemen Qazaqstan» گازەتىنىڭ 100 جىلدىق مەرەيتويى اياسىندا ءوتىپ وتىر.
«Egemen Qazaqstan» رەسپۋبليكالىق گازەتى» اق-نىڭ باسقارما توراعاسى دارحان قىدىرالىنىڭ ايتۋىنشا, 1919-1976 جىلدار ارالىعىن قامتيتىن 5 تومدىق جيناق ازىرگە 2000 دانامەن تارالىپ وتىر.
«1919 جىلى «ۇشقىن» دەگەن اتپەن شىعا باستاعان باسىلىم ءار ءجىلدارى تۇرلى اتپەن شىقسا دا, ءتىلدىڭ, ءدىننىڭ, جەردىڭ, ەملەنىڭ ماسەلەسىن, ۇلت مۇددەسىن كوتەردى. سول تۇستاعى زيالىلاردىڭ اراسىنداعى ايتىس-تارتىس, اشارشىلىق, رەپرەسسيا, سوعىس پەن تىڭ يگەرۋ سياقتى تاريحي وقيعالاردىڭ ءبارى وسى جيناقتا قامتىلدى. قازاق تاريحىنىڭ شەجىرەشىسىنە اينالعان گازەتتىڭ بەتىندە سماعۇل سادۋاقاسوۆ, جۇسىپبەك ايماۋىتوۆ, مۇحتار اۋەزوۆ, بەيىمبەت مايلين, ساكەن سەيفۋللين, تۇرار رىسقۇلوۆ, وراز جاندوسوۆ, عابباس توعجانوۆ, عابيت مۇسىرەپوۆ سياقتى ارىستاردىڭ ءىزى قالدى. كوپ ادام ول تۇستا گازەتتى ورتالىق كوميتەتتىڭ ورگانى بولعان دەپ ويلايدى. ولاي بولماعانىنا وسى بەس تومدىقتى وقىپ كوز جەتكىزۋگە بولادى. بۇل جيناق گازەت وقىرماندارىنا عانا ەمەس, جۋرناليستيكا تاريحى مەن ادەبيەتتىڭ وتكەنىن زەرتتەپ جۇرگەن عالىمدارعا, كاسىبي تاريحشىلارعا دا تاپتىرماس قۇرال بولادى دەپ ويلايمىن», دەيدى دارحان قىدىرالى.
جيناقتا 1919 جىلدان 1970 جىلدار ارالىعىندا, «ۇشقىن» گازەتىنەن باستاپ «سوتسياليستىك قازاقستان» باسىلىمىنا جارىق كورگەن ماتەريالدار توپتاستىرىلعان. ەلىمىزدىڭ 100 جىلدىق جىلناماسىنان حابار بەرەتىن كىتاپتا الاش قايراتكەرلەرى مەن سول ءداۋىردىڭ شىندىعىن كورسەتەتىن ماقالالار تولىق قامتىلعان. وسى جىلداردا گازەت باسشىلارى مەن قىزمەتكەرلەرىنىڭ كوبى رەپرەسسياعا ۇشىراعان.
ءجۇز جىلدىق مەجەسىنە جەتكەن رەسپۋبليكالىق باسىلىم – «ەگەمەن قازاقستان» گازەتى العاش رەت ءوز وقىرماندارىنىڭ قولىنا «ۇشقىن» دەگەن اتپەن 1919 جىلعى 17 جەلتوقساندا ءتيدى. گازەت ءوز تاريحىندا «ەڭبەك تۋى», «ەڭبەكشىل قازاق», «ەڭبەكشى قازاق», كەيىننەن «سوتسيالدى قازاقستان», «سوتسياليستىك قازاقستان» اتاۋىمەن جارىققا شىقتى. ەلىمىز ەگەمەندىك العان تۇستا اتى «ەگەمەندى قازاقستان», ال 1993 جىلى «ەگەمەن قازاقستان» بولىپ وزگەردى. 2018 جىلعى ناۋرىزدان باستاپ «ەگەمەن قازاقستان» اتاۋى لاتىن قارپىندە Egemen Qazaqstan دەپ جازىلا باستادى. باسىلىمدا وتكەن عاسىردىڭ قىرقىنشى جىلدارىنا دەيىن سماعۇل سادۋاقاسوۆ, جۇسىپبەك ايماۋىتوۆ, مۇحتار اۋەزوۆ, بەيىمبەت مايلين, ساكەن سەيفۋللين, تۇرار رىسقۇلوۆ, وراز جاندوسوۆ, عابباس توعجانوۆ, عابيت مۇسىرەپوۆ, جانە باسقا دا ۇلت قايراتكەرلەرى باسشىلىق قىزمەت اتقاردى.