ءىس-شارا الاڭىندا ە. كوشەرباەۆتىڭ «Aurubis AG», «Hydro Aluminium GmbH», «Lhoist Rheinkalk GmbH», «DNV GL» جانە ت.ب. الدىڭعى قاتارلى نەمىس كومپانيالارىنىڭ باسشىلارىمەن كەزدەسۋلەرى ءوتتى. پايدالى قازبالاردى ءوندىرۋ مەن قايتا وڭدەۋ سالالارىنداعى نەمىس كومپانيالارى قازاقستان مەن ساۋدا-ەكونوميكالىق جانە ينۆەستيتسيالىق ىنتىماقتاستىقتى دامىتۋعا مۇددەلى ەكەنىن حابارلادى.
سونداي-اق ءىس-ساپار شەڭبەرىندە قازاقستاندىق ديپلوماتتىڭ ەلىمىزدىڭ اۋماعىندا بىرلەسكەن جوبالاردى جۇزەگە اسىرۋ مەن دامىتۋعا مۇددەلى نەمىس كومپانيالارى باسشىلارىنىڭ قاتىسۋىمەن كەزدەسۋلەر ورىن الدى. ولاردىڭ قاتارىندا Goldbeck Solar GmbH (فوتوەلەكترلى كۇن قوندىرعىلارىن قۇراستىرۋ), ALMiG (اۆتوماتتى اۋە سورعىلارىن جاساپ شىعارۋ), Thalheimer Transformatorenwerke GmbH (بارلىق موديفيكاتسيا ترانسفورماتورلارى), Bentec GmbH Drilling & Oilfield System (بۇرعىلاۋ قوندىرعىلارى جانە مۇناي ءوندىرىسى قۇرىلعىلارىن جاساپ شىعارۋ) جانە ت.ب. كومپانيالار بولدى.
گەرمانيا ەكونوميكاسى كۇنى الاڭىندا باۆاريانىڭ پرەمەر-ءمينيسترىنىڭ ورىنباسارى – فەدەرالدى جەرىنىڭ ەكونوميكا, جەر دامۋى جانە ەنەرگەتيكا ءمينيسترى حۋبەرت ايۆانگەرمەن كەزدەسۋ ءوتىپ, ونىڭ بارىسىندا ساۋدا-ەكونوميكالىق جانە ينۆەستيتسيالىق ىنتىماقتاستىق ماسەلەلەرى تالقىلاندى.
ح. ايۆانگەر قازاقستان مەن باۆاريا اراسىنداعى تىكەلەي ەكونوميكالىق قاتىناستاردى ورناتۋعا قىزىعۋشىلىق بىلدىرە وتىرىپ, قازاقستاندىق دەلەگاتسيانى جاقىن ارادا ميۋنحەن قالاسىنا شاقىردى.
باۆاريا ءىرى ەكونوميكالىق جانە عىلىمي الەۋەتكە يە جانە گەرمانيانىڭ 16 فەدەرالدىق جەرىنىڭ اراسىندا ەكونوميكالىق ءوسۋ قارقىنى بويىنشا كوشباسشىلاردىڭ ءبىرى بولىپ تابىلادى.