سەرىك پەن نۇرسۇلۋ تولەۋباەۆتار وتباسى قىمبات, دارحان, داۋرەن ەسىمدى ءۇش بالا تاربيەلەپ ءوسىردى. قازىر وسى ۇل-قىزدان تاراعان جانبوتا, ءدىنمۇحاممەد, يسلام, حاديشا, بەگىمسۇلۋ, رايانا ەسىمدى نەمەرە-جيەندەرىمەن ۇرپاق جالعاسىپ, ورتا تولۋدا.
ەكىباستۇزدىقتارعا ەسىمدەرى جاقسى تانىس تولەۋباەۆتار – شىعارماشىل, ونەرلى وتباسى. وتاعاسى سەرىك ايتقۇل ۇلى 1994 جىلدان ءبۇگىنگە دەيىن «بوگاتىر كومىر» جشس جول جوندەۋشى بولىپ ەڭبەك ەتەدى. ول كاسىپورىن تاراپىنان ءىىى دارەجەلى «ەڭبەك داڭقى» وردەنىمەن ماراپاتتالعان. بوساي قالعان ساتتە قولىنا دومبىرا, گيتارا اسپاپتارىن الادى.
ال وتاناسى نۇرسۇلۋ ەركەبايقىزى قالاداعى «اتامۇرا» ءمادەنيەت ورتالىعىندا 20 جىل بويى قىزمەت ەتىپ كەلەدى. نۇرسۇلۋ قوعامدىق ءومىردىڭ بەلسەندىسى, قالا اكىمىنىڭ جانىنداعى مەملەكەتتىك ءتىل ساياساتىن ودان ءارى جەتىلدىرۋ جونىندەگى جۇمىس توبىنىڭ, قوعامدىق كەڭەستىڭ جانە ىسكەر ايەلدەر اسسوتسياتسياسىنىڭ مۇشەسى.
– جاقىندا رەسپۋبليكالىق «رۋحاني قازىنا» فەستيۆالىندە «اتامۇرا» ورتالىعى «ۇزدىك مادەنيەت ءۇيى» اتالىمىنا قاتىسىپ, ءمينيستردىڭ العىس حاتىن الدى. ءبىزدىڭ ورتالىقتىڭ قالادان بولەك, 16 اۋىلدا كلۋبى بار. جىل سايىن تۇراقتى تۇردە ايتىس وتكىزەمىز. سوڭعى 3 جىلدا ايتىس رەسپۋبليكالىق دەڭگەيدە وتەدى. 13 جىل بويى «جىگىت سۇلتانىن» ۇيىمداستىرىپ كەلەمىز. وعان كىشكەنتاي كەزدەن دايىندايتىن «بالا سۇلتان» بايقاۋى بار. «رۋحاني جاڭعىرۋ», « ۇلى دالانىڭ جەتى قىرى» باعدارلامالارى بويىنشا جوبالارىمىز جەتەرلىك, – دەيدى نۇرسۇلۋ ەركەبايقىزى.
ۇلى دارحان دا اكەسىمەن بىرگە الىپ ءوندىرىس ورنىندا جۇرگىزۋشى بولىپ جۇمىس ىستەيدى. دارحان وبلىستىق «وتباسىم – وشاعىم», «التىن داۋىس», «ەكى جۇلدىز» ۆوكالدىق ءان بايقاۋلارىنىڭ جۇلدەگەرى.
ال قىزى قىمبات سەرىكقىزى – مۇعالىم, وبلىس ورتالىعىنداعى س.تورايعىروۆ اتىنداعى ۋنيۆەرسيتەتتىڭ فيلولوگيا فاكۋلتەتىن ءتامامداعان. ونىڭ كۇيەۋى داۋلەت ۆاگون دەپوسىندا – ينجەنەر-تەحنولوگ. بوس ۋاقىتىندا قاعازدان گۇلدەر جاسايدى, ءتاتتى ءبالىش پىسىرەدى. كەنجەسى داۋرەن سەرىك ۇلى نۇر-سۇلتان قالاسىندا تۇرادى. قۇرمانعازى اتىنداعى ۇلتتىق كونسەرۆاتوريانى بىتىرگەن. قازىر ەلىمىزدىڭ قارۋلى كۇشتەرى ۇلتتىق اسكەري-پاتريوتتىق ورتالىعى ورتالىق انسامبلىنىڭ كونتسەرتمەيستەرى. كەلىندەرى ەلميرا مەن زارينا دا جوعارى ءبىلىمدى ماماندار. قوس كەلىننىڭ حوببيى – ۇلتتىق سالت-داستۇرگە ساي ءساۋكەلە, كورپەشە, قۇراق كورپە, ويۋ-ورنەك تىگۋمەن اينالىسادى. ەكەۋى دە ءان ايتادى, بيسەرمەن, تاستاردان ءتۇرلى بۇيىمدار جاسايدى, گۇلدەرمەن بەزەندىرەدى.
بۇل وتباسى وبلىستىق «وتباسىم – وشاعىم» بايقاۋىنىڭ جەڭىمپازدارى اتانسا, وتباسى كۇنىنە وراي وتكەن قالالىق «قالىڭدىقتار شەرۋى» بايقاۋىندا ەكى كەلىنى ەلميرا مەن زارينا جەڭىمپاز اتاندى.
ۇلكەن نەمەرەسى جانبوتا قۇرىمباي «جۇلدىز» ۆوكالدىق توبىنىڭ, بەگىمسۇلۋ سەرىكقىزى «ءنازىك» حورەوگرافيالىق بي ۇجىمىنىڭ مۇشەسى. ۇجىممەن بىرگە رەسپۋبليكالىق, حالىقارالىق كونكۋرستاردا جۇلدەلى ورىندارعا يە بولىپ ءجۇر.
– «اتا-انانىڭ كوركەم مىنەزى – دانالىق» دەمەكشى, ۇل-قىزعا جاقسى مىنەز تاربيە ارقىلى داريدى. ادامگەرشىلىك قاتىناس, وتباسىلىق سەزىم, ەڭ الدىمەن ماحاببات پەن بورىش قۇندىلىقتارى بەرىك بولۋى كەرەك. وتباسىندا حالقىمىزدىڭ ادەت-عۇرپى مەن سالت-ءداستۇرىن ساقتايمىز. جاقسى ادەپ – جاقسى وتباسىنىڭ بەلگىسى, – دەيدى وتاناسى نۇرسۇلۋ.
وبلىس ورتالىعىندا وتكەن «مەرەيلى وتباسى» بايقاۋىنا ءوڭىردىڭ اۋىل, قالالارىنان 70-كە جۋىق وتباسى قاتىسىپ, ەرەكشە كوزگە تۇسكەن 11 وتباسى ىرىكتەلدى.
وتباسى – مەملەكەتتىڭ تىرەگى. سوندىقتان ەلىمىزدە وتباسىلارعا كوڭىل ءبولىنىپ, ونى ساقتاۋ, نەكە تىرەگىن نىعايتۋ, بالا تاربيەسىندەگى اتا-انانىڭ جاۋاپكەرشىلىگىن ارتتىرۋعا ۇلكەن قولداۋ كورسەتىلۋدە. ماقسات – ەلىمىزدە وزگەلەرگە ۇلگى بولارلىق وتباسىلاردى دارىپتەۋ, تانىستىرۋ. بۇل رەتتە ءوڭىر اتىنان رەسپۋبليكالىق «مەرەيلى وتباسى» بايقاۋىنا قاتىسۋعا جولداما العان تولەۋباەۆتار وتباسى ۇلگى الارلىق وتباسى دەۋگە ابدەن لايىق.
پاۆلودار وبلىسى