الماتىدا سوڭعى ءۇش جىل ىشىندە 700 مىڭعا جۋىق قالالىقتار تۇراتىن 1487 اۋلا جوندەلدى جانە اباتتاندىرىلدى. بيىلعى جىلى قالانىڭ كوپقاباتتى ۇيلەرىنىڭ 72% قامتيتىن تاعى 638 اۋلانى رەكونسترۋكتسيالاۋ جوسپارلانعان.
جاڭارعان اۋلالاردا جاڭا بالالار جانە سپورت الاڭدارى, بالالاردىڭ سپورتپەن اينالىسۋى ءۇشىن ترەناجەرلەر مەن ويىن كەشەندەرى پايدا بولۋدا. «قاۋىپسىز قالا» باعدارلاماسى بويىنشا جارىقتىڭ جاڭا دىڭگەكتەرى مەن ۆيدەوكامەرالار ورناتىلۋدا.
«مەن ءوزىم وسىنداي اۋلادا ءوستىم, العا قويعان مىندەتىم - قاراپايىم جاندارعا جاقسى جاعداي جاساۋ. ەكى جىل ىشىندە ءبىز ادامداردىڭ كوشەگە شىعۋى, بالالاردىڭ سىرتتا ويناۋى, ەرەسەك جانداردىڭ ءوزارا ارالاسۋى, قوناققا بارۋى ءۇشىن الماتىنىڭ بارلىق اۋلالارىن 100% جوندەيمىز. سوندا عانا مەنىڭ اۋلام مەن مەنىڭ قالام ەكەنىن سەزىنۋگە بولادى. «قالا ادامدار ءۇشىن» كونتسەپتسياسىنىڭ باستى ءمانى وسىندا», دەپ اتاپ ءوتتى باۋىرجان بايبەك اقساي-4 ىقشام اۋدان تۇرعىندارىمەن كەزدەسۋ بارىسىندا.
بيىلعى جىلى قالانىڭ 14 ىقشام اۋداندارىندا 456 كوشە سالىنۋدا جانە 140-تان استام كوشەگە ورتاشا جوندەۋ جۇمىستارى جۇرگىزىلۋدە. قالانىڭ شەت ايماقتارىنداعى بىرقاتار پاركتەر, سكۆەرلەر مەن جۇرگىنشى ايماقتارى اباتتاندىرىلادى. قالا كەڭىستىگىنىڭ قاۋىپسىزدىگى ءۇشىن 120-دان استام كوشەگە جاڭا LED شامدارى ورناتىلعان.