– ءبىز بىرنەشە رەت كەزدەستىك. ءسىز توراعا بولعان كەزدە ەۋروپا وداعى مەن قازاقستان اراسىندا كەڭەيتىلگەن ارىپتەستىك جانە ىنتىماقتاستىق تۋرالى كەلىسىمگە قول قويىلدى. بيىل وسى قۇجاتتى راتيفيكاتسيالاۋ ءراسىمى اياقتالادى. جالپى, قارىم-قاتىناسىمىزدىڭ كەلەشەگى جارقىن, – دەدى ەلباسى.
دونالد تۋسك نۇرسۇلتان نازارباەۆتىڭ قازاقستاندى قالىپتاستىرۋ جانە وركەندەتۋ, سونداي-اق ەلىمىزدىڭ حالىقارالىق بەدەلىن نىعايتۋ ىسىندەگى ءرولىن اتاپ ءوتتى.
– ءسىز وسى وڭىردە ەرەكشە جانە ماڭىزدى ءرول اتقاراسىز. سىزبەن جۇزدەسكەنىمە قۋانىشتىمىن. ءسىزدىڭ بيلىك ترانزيتىنە قاتىستى ويعا قونىمدى ءارى جاۋاپتى ۇستانىمىڭىزدى جوعارى باعالايمىن. مەنىڭ ويىمشا بۇكىل ەۋروپا وسى قادامىڭىزعا ءتانتى بولدى. دەموكراتيا جاعدايىندا كىمنىڭ پرەزيدەنت بولاتىنىن ءبىلۋ وڭاي ەمەس. بىراق, ءسىز ايقىنداعان باعىتتى جالعاستىرۋ ءۇشىن كانديداتىڭىزدىڭ تولىق مۇمكىندىگى بار, – دەدى ەۋروپالىق كەڭەس توراعاسى.