ساۋدا-ەكونوميكالىق قاتىناستاردىڭ بارلىق باعىتتارى بويىنشا قازاقستاندىق-تۇرىكمەنستاندىق ىنتىماقتاستىق پەرسپەكتيۆالارى تالقىلاندى.
پرەمەر-مينيستر قازاقستان مەن تۇرىكمەنستان اراسىنداعى ەكىجاقتى قاتىناستار تۇراقتى تۇردە دامىپ جاتقانىن اتاپ ءوتتى.
«ءبىز ساۋدا-ەكونوميكالىق بايلانىستاردىڭ تەرەڭدەي تۇسۋىنە اسا ءمان بەرەمىز. كولىك ينفراقۇرىلىمى مەن ورتاق شەكارانىڭ بولۋىن ەسكەرگەندە, ءوزارا ءتيىمدى ىنتىماقتاستىقتى ودان ءارى نىعايتۋدىڭ ۇلكەن الەۋەتى بار», — دەدى ا. مامين.
كەلىسسوزدەر بارىسىندا ەنەرگەتيكا, عارىش, اۋىل شارۋاشىلىعى سالالارىنداعى, اسكەري-ونەركاسىپتىك كەشەن, كولىك-ترانزيت دالىزدەرىن دامىتۋداعى ءوزارا ءىس-قيمىل كەلەشەگى اتالىپ ءوتتى.
«ءوزارا ساۋدا كولەمىن ەداۋىر ارتتىرۋعا قول جەتكىزۋ تۋرالى ورتاق مىندەت قويىلدى. قازاقستان بۇل مىندەتتى ىسكە اسىرۋ ءۇشىن بارلىق كۇش-جىگەرىن سالۋعا ءازىر», — دەدى اسقار مامين.
اشحابادتا پرەمەر-مينيستر اسقار مامين تمد ۇكىمەتتەرىنىڭ باسشىلارى كەڭەسىنىڭ شاعىن جانە كەڭەيتىلگەن قۇرامداعى وتىرىستارىنا قاتىستى.
دوستاستىقتاعى بيىلعى جىل تۇرىكمەنستان رەسپۋبليكاسىنىڭ توراعالىعىمەن ءوتىپ جاتىر.
تمد ۇبك وتىرىسىنا رەسەي فەدەراتسياسىنىڭ پرەمەر-ءمينيسترى د. مەدۆەدەۆ, بەلارۋس پرەمەر-ءمينيسترى س. رۋماس, ازەربايجان پرەمەر-ءمينيسترى ن. مامەدوۆ, تاجىكستان پرەمەر-ءمينيسترى ك. راسۋلزودا, وزبەكستان پرەمەر-ءمينيسترى ا. اريپوۆ, ارمەنيا ۆيتسە-پرەمەرى م. گريگوريان, قىرعىزستان ۆيتسە-پرەمەرى ج. رازاكوۆ قاتىستى.
شاعىن قۇرامدا دەلەگاتسيالار باسشىلارى تمد-داعى ەكونوميكالىق ءوزارا ءىس-قيمىلدىڭ وزەكتى ماسەلەلەرى بويىنشا پىكىر الماسىپ, ۇيىمداستىرۋشىلىق سيپاتتاعى بىرقاتار ماسەلەلەردى شەشتى.
قر پرەمەر-ءمينيسترى اسقار مامين تمد ەلدەرىنىڭ نارىقتارى قازاقستان ءۇشىن ءداستۇرلى تۇردە باسىمدىققا يە ەكەنىن اتاپ ايتتى. قازاقستاننىڭ دوستاستىق ەلدەرىمەن تاۋار اينالىمى وڭ ديناميكاعا يە جانە 2018 جىلدىڭ قورىتىندىسى بويىنشا 8,4%-عا ارتىپ, $24,3 ملرد-تى قۇرادى.
دوستاستىق كەڭىستىگىندە ساۋدا-ەكونوميكالىق قاتىناستاردى ودان ءارى ينتەگراتسيالاۋ مەن نىعايتۋ ماقساتىندا نورماتيۆتىك بازانى جەتىلدىرۋ جۇمىستارىنىڭ ماڭىزدىلىعى اتالىپ ءوتتى. تاياۋ كەلەشەكتە قىزمەتتەرمەن ەركىن ساۋدالاسۋ تۋرالى كەلىسىمگە قول قويۋ تمد ەلدەرىنە قىزمەتتەر اينالىمىن ارتتىرۋعا جول اشادى.
قر ۇكىمەتىنىڭ باسشىسى ينتەگراتسيانى دامىتۋ ارقىلى ساپالى ءوسىمدى كۇشەيتۋ شارالارىنىڭ قاتارىندا وندىرىستىك قۋاتتىلىقتار كووپەراتسياسىن, كولىك-لوگيستيكا الەۋەتىن ارتتىرۋدى, وزەكتى تسيفرلىق كۇن ءتارتىبىن قالىپتاستىرۋ, ادامي كاپيتالدى دامىتۋ, ينۆەستيتسيالىق احۋالدى جاقسارتۋدا كۇش-جىگەردى بىرىكتىرۋدى اتاپ ءوتتى.
اتقارۋشى كوميتەتكە اتالعان ۇسىنىستاردى جان-جاقتى زەردەلەپ, ولاردى ازىرلەنىپ جاتقان تمد ودان ءارى دامىتۋ تۇجىرىمداماسىنىڭ جانە 2030 جىلعا دەيىنگى كەزەڭگە تمد ەكونوميكالىق دامىتۋ ستراتەگياسىنىڭ اياسىندا قاراستىرۋ ۇسىنىلدى.
كەڭەيتىلگەن قۇرامداعى وتىرىستىڭ باستى تاقىرىپتارى يننوۆاتسيالىق ىنتىماقتاستىقتى دامىتۋ, زياتكەرلىك مەنشىك نىساندارىنىڭ قۇقىعىن قورعاۋ, كولىك-لوگيستيكالىق جانە تۋريستىك سالالاردا ءوزارا ءىس-قيمىلدىڭ تيىمدىلىگىن ارتتىرۋ, تسيفرلىق ەكونوميكانى دامىتۋ, عارىش سالاسىندا جوبالاردى ىسكە اسىرۋ بولدى.
تمد ۇكىمەتتەرى باسشىلارىنىڭ كەڭەسى وتىرىسىنىڭ قورىتىندىسى بويىنشا بىرقاتار قۇجاتتارعا:
● تمد-عا قاتىسۋشى مەملەكەتتەردىڭ ىرگەلى زەرتتەۋلەر سالاسىندا مەملەكەتارالىق قاتىناستاردى ۇيلەستىرۋ تۋرالى كەلىسىمگە;
● تمد-عا قاتىسۋشى مەملەكەتتەردىڭ مۋزەي ءىسى سالاسىنداعى ىنتىماقتاستىعى تۋرالى كەلىسىمگە;
● 2009 جىلعى 20 قاراشاداعى تمد-دا تاۋارلاردىڭ شىققان ەلىن انىقتاۋ ەرەجەلەرى تۋرالى كەلىسىمگە وزگەرىستەر ەنگىزۋ تۋرالى حاتتاماعا;
● 1999 جىلعى 8 قازانداعى ەركىن ساۋدا ايماعىن قۇرۋ تۋرالى كەلىسىمگە قاتىسۋشى مەملەكەتتەر اراسىنداعى تاسىمالداناتىن تاۋارلاردى كەدەندىك راسىمدەۋ جانە كەدەندىك باقىلاۋ ءتارتىبى تۋرالى كەلىسىمگە وزگەرىستەر ەنگىزۋ تۋرالى حاتتاماعا;
● 1999 جىلعى 4 ماۋسىمداعى تمد-عا قاتىسۋشى مەملەكەتتەردىڭ اۋماعى ارقىلى ترانزيت ءتارتىبى تۋرالى كەلىسىمگە وزگەرىستەر ەنگىزۋ تۋرالى حاتتاماعا;
● 2001 جىلعى 28 قىركۇيەكتەگى ينتەللەكتۋالدى مەنشىك نىساندارى بولىپ تابىلاتىن تاۋارلاردىڭ كەدەندىك شەكارادان وتكىزىلۋىنە كەدەندىك باقىلاۋ ەرەجەلەر تۋرالى تمد ۇكىمەتتەر باسشىلارى كەڭەسىنىڭ شەشىمىنە قول قويىلدى.
دوستاستىقتا توراعالىق ەتۋ رەسەيلىك تاراپقا اۋىستى. تمد ۇكىمەتتەرى باسشىلارى كەڭەسىنىڭ كەزەكتى وتىرىسى بيىل كۇزدە ماسكەۋدە وتەدى.