«وزدەرىڭىزگە بەلگىلى, مەملەكەت باسشىسى قاسىم-جومارت توقاەۆ انت بەرۋ راسىمىندە تۇڭعىش پرەزيدەنت - ەلباسى نۇرسۇلتان نازارباەۆقا «قۇمەتتى سەناتور» مارتەبەسىن بەرۋ جونىندە ۇسىنىس جاساعان بولاتىن. مەملەكەت باسشىسىنىڭ ۇسىنىسىن قولداي وتىرىپ, سەنات بيۋروسىنىڭ مۇشەلەرى «قۇمەتتى سەناتور» مارتەبەسى تۋرالى ەرەجە بەكىتتى. ەرەجەگە سايكەس, «قۇرمەتتى سەناتور» مارتەبەسىن بەرۋ جونىندە شەشىم سەنات وتىرىسىندا قابىلدانادى» دەپ ءتۇسىندىردى سەنات توراعاسى داريعا نازارباەۆا.
ءوز كەزەگىندە سەناتور تالعات مۇساباەۆ قازاقستان پارلامەنتاريزمىن دامىتۋ ۇدەرىسى ەلباسىنىڭ اقىلعا سالىنعان ساياسي ستراتەگياسىنىڭ ناتيجەسى بولىپ وتىرعانىن اتاپ ءوتتى.
«بيلىكتىڭ بارلىق تارماقتارى اراسىندا تەپە-تەڭدىك جۇيەسىن قۇرۋ ارقىلى ەل پارلامەنتى تەك زاڭ شىعارۋ تەتىگىنە عانا ەمەس, مەملەكەتتىڭ ورنىقتى دامۋىنا باعىتتالعان ماقساتتارىنا دا جاۋاپ بەرەتىن بەدەلدى مەملەكەتتىك ورگان بولدى. سوندىقتان نۇرسۇلتان ءابىش ۇلى نازارباەۆقا «قۇرمەتتى سەناتور» مارتەبەسىن بەرۋ تۋرالى ۇسىنىلعان يدەيانى ۋاقىتىلى جانە دۇرىس دەپ سانايمىن» دەدى ت. مۇساباەۆ.
قازاقستان رەسپۋبليكاسى تۇڭعىش پرەزيدەنتى - ەلباسىنىڭ دەموكراتيالىق, زايىرلى, قۇقىقتىق جانە الەۋمەتتىك مەملەكەت رەتىندە كونستيتۋتسيالىق-قۇقىقتىق نەگىزدەرىن قالىپتاستىرۋداعى, سونداي-اق وتاندىق پارلامەنتاريزمدى ورنىقتىرۋداعى جانە دامىتۋداعى سىڭىرگەن تاريحي ەڭبەگىن, كونستيتۋتسيانى, ادامنىڭ جانە ازاماتتىڭ قۇقىقتارى مەن بوستاندىقتارىن قورعاۋدى, قوعامنىڭ بىرلىگىن قامتاماسىز ەتۋگە, ەلدىڭ ستراتەگيالىق دامۋ باعدارىن ايقىنداۋعا قوسقان اسا زور ۇلەسىن مويىنداي وتىرىپ, قر پارلامەنتى سەناتى ەلباسى نۇرسۇلتان نازارباەۆقا «قۇرمەتتى سەناتور» مارتەبەسىن بەرۋ تۋرالى شەشىمدى قابىلدادى.
«بۇگىن ءبىز تاريحي شەشىم قابىلدادىق. تاۋەلسىز قازاقستاننىڭ نەگىزىن قالاۋشى قر تۇڭعىش پرەزيدەنتى نۇرسۇلتان ءابىش ۇلى نازارباەۆقا «قۇمەتتى سەناتور» مارتەبەسىن بەرۋ - ەلباسىنىڭ جاڭا قازاقستاندى قالىپتاستىرۋ مەن دامىتۋعا قوسقان تاريحي ۇلەسى مەن قازاقستان قوعامىن توپتاستىرۋعا سىڭىرگەن وراسان زور ەڭبەگىنە بەرىلگەن ءادىل باعا مەن قۇرمەت دەپ سانايمىن», - دەدى سەنات سپيكەرى د. نازارباەۆا.