بۇگىندە مەملەكەتتىك تۇرعىن ءۇي قورىنان باسپانا الۋعا كەزەكتە 10 544 ادام تۇر ەكەن. ونىڭ 371-ءى كوپ بالالى انالار. قازاقستان رەسپۋبليكاسىنىڭ 2019 جىل 6 مامىرداعى زاڭىنا سايكەس, الەۋمەتتىك جاعىنان از قورعالعان وتباسىلارعا ارنايى كاتەگوريا بەرىلىپ, مۇگەدەكتەر مەن ۇلى وتان سوعىسى ارداگەرلەرىمەن بىردەي دارەجەدە تۇرعىن ۇيمەن قامتىلۋىنا مۇمكىندىك بەرىلىپ وتىر. بۇل توپقا «التىن القا», «كۇمىس القا» يەگەرلەرى جاتادى. اسىرەسە مۇگەدەك بالالارى بار وتباسىلارعا ءبىرىنشى قابات ۇسىنىلعان. سەبەبى اربادا وتىراتىندىقتان, كىرىپ-شىعۋعا قولايلى بولسىن دەگەن ماقساتتا. انالاردىڭ كوبى «التىن القا», «كۇمىس القا» يەگەرلەرى دە بولعاندىقتان, بارلىعى دا پاتەرگە يە بولىپ, قۋانىشتىڭ كوز جاسى كول بولىپ توگىلدى. ءبارى دە وبلىس باسشىسىنا ءدان ريزا. بۇل پاتەرلەر وتە از تولەماقىسى بار ساتىپ الۋ قۇقىعىنسىز بەرىلگەن پاتەرلەر.
– حالىقتىڭ ءال-اۋقاتى ارقاشان باستى نازارىمىزدا, - دەدى وبلىس اكىمى دانيال احمەتوۆ, - ءبىز ەلباسىنىڭ جانە پرەزيدەنتىمىزدىڭ تاپسىرماسىنا وراي, ماڭىزدى شارۋالار اتقارىپ جاتىرمىز. ەڭ الدىمەن ءبىز حالىقتىڭ ءال-اۋقاتىن ارتتىرۋىمىز قاجەت. وسى جۇمىستار سەمەي قالاسىندا ەڭ الدىمەن اتقارىلىپ جاتقانىنا قۋانىشتىمىن. بۇل شاعىن اۋدان مەن ءۇشىن ەرەكشە. مەنىڭ ويىمشا, قاراعايلى ەتالوندىق اۋدان بولىپ, سەمەيدىڭ العا قاراي داميتىن ستاندارتتارىن قالىپتاستىرادى.
قاراعايلىداعى №34,35,36 ۇيلەر ايماقتىق تۇرعىن ءۇي باعدارلاماسى بويىنشا «فيرما «ازيا» جشس مەن «ەرتىس» اكك ارقىلى تۇرعىزىلىپ جاتىر. كىلتتەردى تابىستاعان وبلىس اكىمى تۇرعىن ۇيلەردىڭ ساپاسىنا ريزا بولدى. دانيال احمەتوۆ كوپ بالالى انالاردى جاڭا قونىستارىمەن قۇتتىقتاپ, بارلىعىنا دەنساۋلىق پەن باقىت تىلەدى. ءوز كەزەگىندە كوپ بالالى انالار اكىمگە العىس ايتىپ, جىلى لەبىزدەرىن ءبىلدىردى. جالپى, ايماق باسشىسى قاراعايلى اۋدانىندا سالىنىپ جاتقان تۇرعىن ءۇيدىڭ ساپاسىن جوعارى باعالادى.
- وسىنداي ەرەكشە سىيلىق ءۇشىن ەلباسىنا راحمەت, - دەدى كوپ بالالى انا ءبيبىجامال اپا, - بىزگە قۇرمەتپەن قارايتىنى ءۇشىن قۋانىشتىمىن. بارشاڭىزعا بەيبىت اسپان مەن اماندىق تىلەيمىن. بالالارىمىز امان بولسىن. وسىنىڭ ءبارىن ساقتايىق جانە كوبەيتەيىك. دانيال كەنجەتاي ۇلىنا قاراعايلى اۋدانىن جاڭادان سالعانى ءۇشىن ەرەكشە راحمەتىمدى ايتامىن.
راۋشان نۇعمانبەكوۆا,
سەمەي