سەناتتىڭ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ كەڭەيتىلگەن وتىرىسىندا «قازاقستان رەسپۋبليكاسى مەن ليتۆا رەسپۋبليكاسى اراسىنداعى باس بوستاندىعىنان ايىرۋعا سوتتالعان ادامداردى جانە مەديتسينالىق سيپاتتاعى ماجبۇرلەۋ شارالارى قولدانىلعان ادامداردى بەرۋ تۋرالى شارتتى راتيفيكاتسيالاۋ تۋرالى» زاڭىنىڭ جوباسى قارالدى, دەپ حابارلادى سەناتتىڭ ءباسپاسوز قىزمەتى.
شارت 2017 جىلعى 24 ساۋىردە ۆيلنيۋستە جاسالعان بولاتىن. شارتتىڭ ماقساتى – سوتتالعان ادامداردىڭ جانە مەديتسينالىق سيپاتتاعى ماجبۇرلەۋ شارالارى قولدانىلعان ادامداردىڭ ءوزدەرىنىڭ ازاماتتىعى تيەسىلى قوعامعا قايتا ارالاسۋىنا ءجاردەم كورسەتۋ.
شارتقا سايكەس تاراپتار ءبىر-بىرىنە باس بوستاندىعىنان ايىرۋعا سوتتالعان نەمەسە مەديتسينالىق سيپاتتاعى ماجبۇرلەۋ شارالارى قولدانىلعان ادامداردى بۇدان ءارى جازاسىن نە ەمدەۋىن وزدەرى ازاماتى بولىپ تابىلاتىن مەملەكەتتە وتەۋ ءۇشىن بەرۋگە مىندەتتەنەدى. قازىرگى ۋاقىتتا ليتۆادا قازاقستاننىڭ سوتتالعان ازاماتتارى جوق جانە قازاقستاندا دا جازاسىن وتەپ جاتقان لاتۆيا ازاماتتارى جوق. وسى شارتتىڭ راتيفيكاتسياسى الدىن الۋ سيپاتىنا يە.
شارتتا سوتتالعان ادامداردى جانە مەديتسينالىق سيپاتتاعى ماجبۇرلەۋ شارالارى قولدانىلعان ادامداردى بەرۋ مەن ودان باس تارتۋ ءۇشىن ناقتى نەگىزدەر كوزدەلگەن. وسى شارت بويىنشا قازاقستان رەسپۋبليكاسىنان ورتالىق مەملەكەتتىك ورگان باس پروكۋراتۋرا بولىپ تابىلادى. زاڭ جوباسى پالاتا قاراۋىنا بەرىلدى.