«قۇرمەتتى, ۋكراينالىقتار. سايلاۋداعى جەڭىسىمنەن كەيىن التى جاسار ۇلىم: «تەلەديداردان ەستىدىم, زەلەنسكي پرەزيدەنت دەگەندى. ەندى مەن دە پرەزيدەنتپىن بە؟» دەپ سۇرادى. قازىر ءتۇسىندىم, بۇل – اقيقات. ءارقايسىمىز پرەزيدەنتپىز. ماعان داۋىس بەرگەن 73 پايىز عانا ەمەس, ءبارىمىز 100 پايىز پرەزيدەنتپىز. بۇل – بارشامىزعا ورتاق جەڭىس, ورتاق جاۋاپكەرشىلىك», دەپ ءسوز باسىن وسىلاي وزىنە ءتان ەرەكشە ستيلمەن باستاعانىمەن, كەيىن ساياسي سالماقتى سۇراقتارعا كوشتى. ەڭ الدىمەن, ول جوعارى رادانى تاراتامىن دەپ ءمالىمدەدى. ول تۇسىنىكتى دە. سەبەبى قازىر پارلامەنتتەگى ەڭ كوپ ورىندى سايلاۋداعى قارسىلاسى پەتر پوروشەنكونىڭ پارتياسى الىپ وتىر. كەيىنگى ورىندا ەكس-پرەمەر ارسەني ياتسەنيۋكتىڭ پارتياسى. وسى ەكى بلوك پارلامەنتتەگى 450 ورىننىڭ 215-ءىن يەمدەنگەن. ياعني, ەرتەڭ زەلەنسكي قانداي دا ءبىر زاڭدى ۇسىنسا, دەپۋتاتتار وعان قارسى شىعۋى ءابدەن مۇمكىن ەدى. سول ءۇشىن زەلەنسكي پارلامەنتتى تاراتىپ, 21 شىلدەگە جاڭا سايلاۋ تاعايىندادى.
وسى بولجامدى راستاعانداي, 22 مامىر كۇنى جوعارى رادا دەپۋتاتتارى زەلەنسكي ۇسىنعان «ۋكراينانىڭ حالىق دەپۋتاتتارىن سايلاۋ» تۋرالى زاڭىنا قارسى داۋىس بەردى. جاڭا ۋكراينباسى قازىرگى پروپورتسيونالدى-ماجوريتارلى سايلاۋ جۇيەسىنەن تازا پروپورتسيونالدى جۇيەگە ءوتۋدى ۇسىندى. وعان قوسا, پارلامەنتكە پارتيالاردىڭ ءوتۋ مەجەسىن 3 پايىزعا تۇسىرمەك بولدى. الايدا جوعارى رادا بۇل ويمەن كەلىسپەدى.
ۇلىقتاۋ راسىمىندە زەلەنسكي ايتقان تاعى ءبىر ۇسىنىس جاڭا پرەزيدەنتتىڭ پورترەتىن كابينەتتەرگە ىلمەۋ بولدى. ونىڭ ورنىنا شەنەۋنىكتەرگە ءوز بالالارىنىڭ سۋرەتىن قويىپ, ءار شەشىم قابىلداعاندا سولاردىڭ كوزىنە قاراۋعا كەڭەس بەردى. كادر ماسەلەسى دە كوتەرىلدى. زەلەنسكي ۋكراينانىڭ قورعانىس مينيسترىن, باس پروكۋرورىن, قاۋىپسىزدىك قىزمەت باسشىسىن قىزمەتىنەن الۋ تۋرالى ۇسىنىس جاسادى. سەبەبى ول ءۇشىن پارلامەنتتىڭ كەلىسىمى قاجەت. الايدا بۇل تىزىمدە ۋكراينانىڭ ىشكى ىستەر ءمينيسترى ارسەن اۆاكوۆتىڭ ەسىمى اتالمادى. نەگە ەكەنى بەلگىسىز. بىراق وعان ميللياردەر يگور كولومويسكيدىڭ قاتىسى بولۋى مۇمكىن. سەبەبى وليگارح بۇعان دەيىن اۆاكوۆتى قىزمەتىندە قالدىرۋ كەرەك دەپ جۋرناليستەرگە پىكىر بىلدىرگەن. ال جاڭا پرەزيدەنت زەلەنسكيدى الگى كولومويسكي جان-جاقتى قولداپ جاتىر دەگەن اقپارات بىلتىردان بەرى تاراپ كەلەدى.
ۆولوديمير زەلەنسكي پرەزيدەنت رەتىندە ءوزىنىڭ ەڭ العاشقى مىندەتى قازىر ەلدىڭ شىعىسىندا ءجۇرىپ جاتقان سوعىستى توقتاتۋ دەپ مالىمدەدى. سىرتتاي قاراساڭىز, وتە دۇرىس, قولداۋعا لايىق ءسوز. الايدا ەكس-پرەزيدەنت پوروشەنكو سوڭعى بەس جىلدا سول سوعىستى توقتاتا المادى. ال ەندى جاڭا پرەزيدەنت بۇل ويىن قالاي جۇزەگە اسىراتىنى بەلگىسىز. سەبەبى قازىر دون جانە لۋگان ايماعى كيەۆكە باعىنبايدى, ءوزىن تاۋەلسىز رەسپۋبليكا دەپ جاريالادى. وعان قوسا, رەسەيدىڭ تولىق قولداۋىنا يە. ءتىپتى اسكەرى دە تۇر.
جالپى كەز كەلگەن پرەزيدەنتتىڭ ءوز كومانداسى, ياعني ناقتى مامانداردىڭ بولۋى اسا ماڭىزدى. سەبەبى ولار باسشىسىنىڭ ساياساتىن جۇزەگە اسىرۋشىلار. پرەزيدەنتتىڭ ابىرويى كەيدە سول ماماندارىنىڭ جۇمىس ناتيجەسىنە دە بايلانىستى. زەلەنسكي وسى اپتادا ماڭىزدى مەملەكەتتىك قىزمەتتەرگە ءوزىنىڭ بۇرىنعى ءارىپتەستەرىن تاعايىندادى. بۇرىنعى دەگەنىم «95 كۆارتال» ستۋدياسىندا بىرگە ىستەگەن ازاماتتار. ماسەلەن, پرەزيدەنتتىڭ ءبىرىنشى كومەكشىسى بولىپ سەرگەي شەفير تاعايىندالدى. ول «95 كۆارتالدىڭ» پروديۋسەرى ەدى. ال سەرگەي تروفيموۆ پرەزيدەنت اكىمشىلىگىنىڭ ءبىرىنشى ورىنباسارى اتاندى. ول دا الگى ستۋديانىڭ بۇرىنعى اتقارۋشى پروديۋسەرى بولعان. پرەزيدەنت اكىمشىلىگىنىڭ باسشىلىعىنا 42 جاسار زاڭگەر اندرەي بوگدان تاعايىندالدى. كەزىندە ادىلەت ءمينيسترىنىڭ ورىنباسارى بولعان. سايلاۋ بارىسىندا كومەكتەستى. بۇدان بولەك, جوعارىدا ايتىلعان ميللياردەر كولومويسكيدىڭ كەڭەسشىسى دە بولعان. سوعان قاراعاندا, الگى وليگارحتىڭ جاڭا پرەزيدەنتكە ىقپالى از ەمەس سەكىلدى.
ەكس-پرەزيدەنت پەتر پوروشەنكو قىزمەتىنەن كەتكەن كەزدە باسىنا قارا بۇلت ۇيىرىلە باستادى. ۋكراينانىڭ مەملەكەتتىك تەرگەۋ بيۋروسى پوروشەنكوعا مەملەكەتكە وپاسىزدىق جاسادى دەگەن ايىپ تاقتى. ياعني, بىلتىر ەكس-پرەزيدەنت كەرچ بۇعازىنا ۋكراين تەڭىزشىلەرىن ادەيى ءجىبەرىپ, رەسەيگە قارسى اسكەري جاعداي جاريالاۋىن زاڭسىز دەپ تانىپ وتىر. ايتپاقشى, ول تەڭىزشىلەر ءالى كۇنگە رەسەيدىڭ ءتۇرمەسىندە جاتىر. زەلەنسكي رەسەيدەگى بارلىق تۇتقىنداعى ازاماتتارىمىزدى قايتارامىن دەپ ۋادە بەردى. الايدا تاعى دا قالاي قايتاراتىنىن ايتقان جوق. ءماسكەۋ ولاردى وڭايلىقپەن بەرە قويماس.
كەزىندە ارمەنيادا حالىقتىڭ قولداۋىمەن بيلىككە كەلگەن نيكول پاشينياننىڭ ءتاجىريبەسىنە قاراساق, ول ەسكى پارلامەنتتى تاراتىپ, جاڭا سايلاۋدا ەلەكتوراتتىڭ 70 پايىز قولداۋىنا يە بولدى. سودان كەيىن عانا رەفورمالاردى جۇرگىزە باستادى. ۆولوديمير زەلەنسكي دە ءدال وسىلاي ىستەۋىنە تۋرا كەلەدى. قازىرگى الەۋمەتتىك ساۋالناماعا سەنسەك, ونىڭ سەريالى اتتاس «سلۋگا نارودا» پارتياسىنا حالىقتىڭ 40 پايىزى داۋىس بەرۋگە دايىن. ياعني, پرەزيدەنت وسى قولداۋدى پايدالانىپ, ءوزىنىڭ پارلامەنتتەگى جاعدايىن رەتتەپ الۋىنا مۇمكىندىك بار. قىسقاسى, ەندى الدىن الا ستسەناريى جازىلعان سەريال ەمەس, شىنايى ساياسي ءومىر باستالدى. ەكس-اكتەر, جاڭا پرەزيدەنت وعان دايىن با, جوق پا, ونى ۋاقىت كورسەتەدى.