ءۇشىنشى مەگاپوليستەگى «تۇركىستان» سارايىندا وتكەن كەزدەسۋگە رەسپۋبليكالىق قوعامدىق شتابتىڭ شتاب جەتەكشىسى, «نۇر وتان» پارتياسى توراعاسىنىڭ ءبىرىنشى ورىنباسارى م.اشىمباەۆ باستاعان رەسپۋبليكالىق قوعامدىق شتاب مۇشەلەرى, شىمكەنت قالاسىنىڭ اكتيۆى, اكىمدىك وكىلدەرى, شىمكەنت قالاسى ءماسليحاتىنىڭ دەپۋتاتتارى, زيالى قاۋىم وكىلدەرى, مادەنيەت سالاسىنىڭ قىزمەتكەرلەرى, ۇستازدار, ستۋدەنتتەر, باق وكىلدەرى, جالپى سانى 1500-گە جۋىق ادام قاتىستى.
الدىمەن بايانداما جاساعان قوعامدىق شتابتىڭ توراعاسى ماۋلەن ساعاتحان ۇلى ق.توقاەۆتى ۇمىتكەر رەتىندە ەلباسىنىڭ ءوزى ۇسىنعانىن ايتتى. سپيكەر قاسىم-جومارت كەمەل ۇلىنىڭ قازاقستان مەن شەتەلدەگى ەڭ ماڭىزدى دەگەن لاۋازىمداردى اتقارعانىن ايتىپ, ەلدىڭ ەكونوميكالىق جانە الەۋمەتتىك تۇرعىدا دامۋىنا سىڭىرگەن ۇلەسىنە توقتالدى.
«تاۋەلسىزدىك جىلدارىندا شىمكەنتتىڭ دامۋ قارقىنى جوعارى بولدى. ەندى اراعا بىرنەشە جىل سالىپ, بۇل شاھار ءوزىنىڭ دامىعان ينفراقۇرىلىمىمەن, ءومىر سۇرۋگە قولايلى جاعدايىمەن, تەك قازاقستاننىڭ عانا ەمەس, بۇكىل ورتا ازيا مەن تمد ايماعىنداعى ەڭ ءىرى قالاعا اينالادى دەپ سەنەمىز. ول ءۇشىن كانديداتىمىزدىڭ باعدارلاماسىندا ايتىلعانداي ءبىر ورىندا تۇرماي ورلەۋ قاجەت. ال ورلەۋ اۋىلدى جەرلەردى تازا اۋىز سۋمەن قامتاماسىز ەتۋ, جولداردى جوندەۋ, ءۇش اۋىسىمدى مەكتەپتەردى زاماناۋي ءبىلىم وشاقتارىمەن اۋىستىرۋ, اپاتتى جاعدايداعى مەكتەپتەردى جابۋ سياقتى ناقتى ىستەردەن باستالادى. مۇنىڭ بارلىعى ق.توقاەۆتىڭ باعدارلاماسىندا ناقتى كورسەتىلگەن» دەدى شتاب جەتەكشىسى ماۋلەن اشىمباەۆ.
ماۋلەن ساعاتحان ۇلى قر پرەزيدەنتتىگىنە كانديدات ق.توقاەۆتىڭ سايلاۋالدى باعدارلاماسىنىڭ ءۇش نەگىزگى ۇستانىمى تۋرالى باياندادى. سونداي-اق كەزدەسۋدە ءماجىلىس دەپۋتاتى, حالىق قاھارمانى ب.ەرتاەۆ, تەلەجۇرگىزۋشى د. نۇرجىگىت, بەلگىلى قالامگەر ن. ورازالين, «ەگەمەن قازاقستان» اق پرەزيدەنتى د. قىدىرالى, قوعام قايراتكەرلەرى ق. سۇلتانوۆ پەن ز. تۇرىسبەكوۆ, «دوستىق» قاۋىمداستىعىنىڭ توراعاسى ي. حاكيمجانوۆ ءسوز الىپ, كانديداتتىڭ باعدارلاماسىنداعى نەگىزگى باسىمدىقتار مەن حالىقتىڭ الەۋمەتتىك جاعدايىن جاقسارتۋعا باعىتتالعان ناقتى ۇستانىمدارعا نازار اۋداردى.
سونداي-اق, رەسپۋبليكالىق قوعامدىق شتاب مۇشەلەرى شىمكەنت قالاسىنىڭ جاستارىمەن كەزدەستى. «كورمە» ورتالىعىندا وتكەن رەسپۋبليكالىق شتابتىڭ بەلسەندى جاستارىنان قۇرالعان «Team Qazaqstan» فورۋمىنا 3 مىڭنان اسا جاس قاتىستى.
«جاستار – ەلىمىزدىڭ بولاشاعى. جاس بۋىن مەملەكەتتىڭ دامۋىندا شەشۋشى ءرول اتقارادى. ولارعا بارلىق جاعداي جاسالۋى كەرەك. ءبىزدىڭ جاس ازاماتتارىمىز – ماقساتشىل, ەڭبەكقور, باستاماشىل. سوندىقتان دا قازاقستانىمىزدىڭ بولاشاعى زور!» - دەلىنگەن قاسىم-جومارت توقاەۆتىڭ باعدارلاماسىندا. كانديداتىمىز سىزدەرگە ۇلكەن سەنىم ارتىپ وتىر. بارلىقتارىڭىزدى 9 ماۋسىمدا سايلاۋ ۋچاسكەسىنە كەلىپ, ەل بولاشاعى ءۇشىن داۋىس بەرۋگە شاقىرامىن!» دەدى رەسپۋبليكالىق شتاب جەتەكشىسى م.اشىمباەۆ.
فورۋمعا جينالعان جاستاردىڭ الدىندا ءسوز الىپ, ەلدىڭ ەرتەڭىنە بەيجاي قاراماي, سايلاۋعا شاقىرعانداردىڭ قاتارىندا قاسىم-جومارت توقاەۆتىڭ جاقتاستارى ءمادينا سادۋاقاسوۆا, ايقىن تولەپبەرگەن, «الاش ۇلى» توبىنىڭ انشىلەرى, بەلگىلى تەلەجۋرناليست, بلوگەرلەر اسحات سادىرباي, ەرعازى ءازىمحان ۇلى جانە تانىمال اكتريسا قۇرالاي اناربەكوۆا, تەلەجۇرگىزۋشى داۋلەت بيجانوۆ سياقتى بەلسەندى جاستار بولدى. شىمكەنتتىك جاستار فورۋمدا ايتىلعان باستامالاردى قولداپ, ءوز تاراپتارىنان بەلسەندىلىك تانىتتى.
مۇنان سوڭ جەتەكشى پارتيا توراعاسىنىڭ ءبىرىنشى ورىنباسارى ماۋلەن ساعاتحان ۇلى باستاعان رەسپۋبليكالىق قوعامدىق شتاب مۇشەلەرى شىمكەنتتەگى ءىرى ءوندىرىس ورىندارىندا بولىپ, ونداعى سايلاۋشىلارمەن كەزدەستى. ءارى, 9 ماۋسىمداعى ساياسي ناۋقانعا بەلسەنە قاتىسىپ, كانديدات قاسىم-جومارت توقاەۆقا داۋىس بەرۋگە شاقىردى.