وڭىردە «رۋحاني جاڭعىرۋ» باعدارلاماسى اياسىندا ۇلتتىق ءان ونەرى مەن جەتىسۋدىڭ حالىق كومپوزيتورلارى شىعارمالارىن جيناقتاۋ ءىسى قولعا الىنعان بولاتىن. وقىرمان قولىنا تيگەن «جەتىسۋ ءوڭىرىنىڭ حالىق جانە حالىق كومپوزيتورلارى اندەرىنىڭ انتولوگياسى» جيناعى سونىڭ ءبىر ايعاعى. ەكى ءجۇز ەلۋ ءاننىڭ ءسوزى مەن تاريحىنان ماعلۇمات بەرەتىن انتولوگيا «قازاق حالقىنىڭ عۇرىپتىق اندەرى», «حالىق اندەرى» جانە «حالىق كومپوزيتورلارىنىڭ اندەرى» دەيتىن 3 بولىمگە جىكتەلگەن. قۇندى كىتاپتىڭ تاعى ەرەكشەلىگى – جيناقتالعان جەتىسۋ اندەرىنىڭ بارلىعى CD-ديسكىلەرگە جۇكتەلىپ, كىتاپقا قوسا تىركەلىپ وتىر.
ايتپاقشى, «جەتىسۋ ءوڭىرىنىڭ حالىق جانە حالىق كومپوزيتورلارى اندەرىنىڭ انتولوگياسى» كىتابىن باسىپ شىعارۋعا جەرگىلىكتى بيۋدجەتتەن 5 ملن تەڭگە بولىنگەن ەكەن. جيناقتىڭ العاشقى داناسىن الماتى وبلىسىنىڭ اكىمى اماندىق باتالوۆ تانىستىرىپ, «رۋحاني جاڭعىرۋ» باعدارلاماسى اياسىندا ادەبيەت پەن ونەردى قولداۋعا كوڭىل ءبولىنىپ وتىرعانىن ايتتى.
وتكەن جىلى «جەتىسۋ كىتاپحاناسى» 100 تومدىعى سەرياسىمەن 20 اۆتوردىڭ كىتابى جارىققا شىقسا, بيىل 40 كىتاپ جارىق كورمەك. ونىڭ ىشىندە جەتىسۋلىق 20 جاس اقىن-جازۋشىنىڭ تۇڭعىش كىتابى وقىرمان قولىنا تيمەكشى. سونداي-اق, ولكە تاريحىن تۇگەندەگەن 2 تومدىق «مادەني ەسكەرتكىشتەر ەنتسيكلوپەدياسى» جيناعى دا رۋحاني قازىنا قاتارىن تولتىرماق.