سپورتتىق گيمناستيكادان قازاقستان كومانداسىنىڭ مۇشەسى, گيمناستيكالىق ات سناريادىندا سىنعا تۇسەتىن ناريمان كۋربانوۆ Olympic.kz سايتىنا شاعىن سۇحبات بەردى. ناريماننىڭ ايتۋىنشا, بيىلعى ماۋسىم ءوزى ويلاعانداي ءساتتى باستالماعان.
«ناۋرىز ايىندا وتكەن الەم كۋبوگى كەزەڭىندە 4-ءشى ورىن العانىمدى بىلەسىزدەر. الايدا, مۇنى ايتارلىقتاي جاقسى ناتيجە دەۋگە بولمايدى. ۋاقىت وتكەن سايىن تاعى ءبىر قاتە تابامىز, كولدەنەڭ ماسەلەلەر شىعادى الدان. الايدا, مۇنىڭ ءبارى الەم چەمپيوناتى سىندى ءىرى جارىستا ەمەس, وعان دەيىن انىقتالعانى دۇرىس بولدى. قازان ايىندا گەرمانيادا وتەتىن ليتسەنزيالىق الەم چەمپيوناتىنا ءبارىمىز قىزۋ دايىندالىپ جاتىرمىز. بۇگىندە وزىمىزگە دەگەن سەنىم ارتتى, العا قويعان ماقساتتى ورىندايمىز دەگەن ۇمىتتەمىز.
جاقىندا حالىقارالىق فەدەراتسيا ماعان الەمدىك دەڭگەيدەگى سپورتشىلارعا بەرىلەتىن توسبەلگىنى جولداپتى. بۇل ماعان قوسىمشا كۇش بەرىپ, العا جەتەلەيدى», - دەيدى ناريمان.
ناريمان كۋربانوۆ ماۋسىم ايىندا سلوۆەنيادا وتەتىن الەم كۋبوگى كەزەڭىنە دايىندالۋدا.