نەگىزىنەن اۋىل بالالارى وقيتىن ۋنيۆەرسيتەتتە تاربيە جۇمىسىنىڭ تيىمدىلىگىن ارتتىرۋ ماقساتىندا 2004 جىلدان بەرى «ولجاس سۇلەيمەنوۆ اتىنداعى الەۋمەتتىك-گۋمانيتارلىق ءبىلىم بەرۋ جانە تاربيە ينستيتۋتى» جۇمىس ىستەيدى. قايراتكەر تۇلعا وسىندا وقيتىن اۋىلدان شىققان ستۋدەنتتەرمەن ءجيى كەزدەسىپ, ءارتۇرلى مادەني-كوپشىلىك, سپورتتىق شارالارعا قاتىسىپ تۇرادى. ستۋدەنتتەرمەن كەزدەسۋلەردە كورنەكتى اقىن ادەبيەت پەن مادەنيەت, ۇلتتىق پاتريوتيزمىنە بەيبىتشىلىك ماسەلەسى, ەلىمىزدىڭ ەكولوگيالىق پروبلەمالارى جانە جوعارى وقۋ ورىندارىنىڭ حالىقارالىق ءبىلىم كەڭىستىگىنە كىرۋى تۋرالى پايىمداۋلارىمەن پىكىر الماسىپ وتىرادى.
بيىل دا ولجاس ومار ۇلى تۋعان كۇنى قارساڭىندا ءوزىنىڭ اتىمەن اتالاتىن ينتسيتۋتقا كەلىپ, ۋنيۆەرسيتەتتەگى ءار ۇلتتىڭ جاستارىنان قۇرالعان ستۋدەنتتىك «دوستىق» اسسامبلەياسى مۇشەلەرىمەن كەزدەسىپ, رۋحانيات تاقىرىبىندا اڭگىمە ءوربىتىپ, پىكىر الماستى. ونەرلى جاستار ولجەكەڭنىڭ ولەڭدەرىن ءار ۇلتتىڭ تىلىندە وقىپ, شىعارمالارىنان كومپوزيتسيالىق كورىنىستەر ۇسىنىپ, باتاسىن الدى.
بيىل ۋنيۆەرسيتەتتەگى «ولجاس سۇلەيمەنوۆ اتىنداعى گۋمانيتارلىق تاربيە, ءبىلىم بەرۋ ينستيتۋتىنا» 15 جىل تولىپ وتىر. وسى ۋاقىت ارالىعىندا ينستيتۋت كوپتەگەن رۋحاني, مادەني, سپورتتىق شارالار وتكىزىپ كەلەدى. سونىڭ ءبىرى – جىل سايىن, ءداستۇرلى تۇردە ۇيىمداستىرىلاتىن ارداگەر كوماندالار اراسىنداعى حالىقارالىق ۆولەيبول ءتۋرنيرى. بۇل جارىستارعا ولجەكەڭ ءوزى دە قاتىسىپ, جاستارعا ۇلگى كورسەتىپ كەلەدى. وسى ءىس-شارادان كەيىن ۋنيۆەرسيتەتىمىزدىڭ سپورت كەشەنىندە وتكەن ءتۋرنيردىڭ سالتاناتتى اشىلۋ راسىمىندە «ولجاس جانە ونىڭ كومانداسى» اتتى دەرەكتى فوتو, قۇجاتتارعا نەگىزدەلگەن ارنايى البوم-كىتاپتىڭ تانىستىرىلىمى بولدى. بۇل كىتاپتا ءبىز 13-ءىنشى رەت وتكىزىلىپ وتىرعان ارداگەر ۆولەيبولشىلار ءتۋرنيرىنىڭ وسى ۋاقىتقا دەيىن جەتكەن جەتىستىكتەرى مەن ءار كەزدەردەگى جارىستاردىڭ ساتتەرى بەينەلەنگەن.
شىعارماشىلىق كەزدەسۋدەن كەيىن ۋنيۆەرسيتەتتىڭ سپورت كەشەنىندە ءداستۇرلى «ولجاس سۇلەيمەنوۆ جۇلدەسى» ءۇشىن ۆولەيبولدان ارداگەر كوماندالار اراسىندا حIII حالىقارالىق تۋرنير تارتىستى ءوتتى. ءتۋرنيردى ۇيىمداستىرۋشى – ۋنيۆەرسيتەت رەكتورى, اكادەميك تىلەكتەس ەسپولوۆ.
ولجەكەڭنىڭ قول دوبى – ۆولەيبول ويىنىنا قۇمارلىعىن ءدۇيىم جۇرت جاقسى بىلەدى. اقىن ستۋدەنتتەر اراسىندا سالاۋاتتى ءومىر سالتىنىڭ ۇلگىسى دە بولۋدا. ونىڭ باستاۋىمەن ۋنيۆەرسيتەتتە ارداگەرلەردىڭ كومانداسى قۇرىلىپ, باسقا وقۋ ورىندارى مەن مەكەمەلەردىڭ كوماندالارىمەن كەزدەسۋلەر وتكىزۋ داستۇرگە اينالعان.
بيىلعى تۋرنيرگە «تاشكەنت» (وزبەكستان), «سپارتاك» (قىرعىزستان), «ارداگەر» (تۇركىستان وبلىسى), «ارداگەر» (جامبىل وبلىسى), «نوماد» (نۇرسۇلتان ق.), «جەتىسۋ» (تالدىقورعان ق.), «بايقوڭىر-قىزىلوردا» (قازاقستان-رەسەي), ەۋرازيا تەحنولوگيا ۋنيۆەرسيتەتى مەن قازاق ۇلتتىق اگرارلىق ۋنيۆەرسيتەتىنىڭ ارداگەر ۆولەيبولشىلار كوماندالارى قاتىستى.
ءۇش كۇن بويى تارتىستى وتكەن ءتۋرنيردىڭ ناتيجەسى بويىنشا ءۇشىنشى ورىندى قىرعىزستاندىق «سپارتاك» يەلەنسە, ەكىنشى ساتىعا تاراز قالاسىنان كەلگەن «ارداگەر» تابان تىرەدى. ال باس جۇلدەنى قازاق ۇلتتىق اگرارلىق ۋنيۆەرسيتەتى ولجالادى. جەڭىمپاز كوماندا قۇرامىندا تاجىريبەلى ارداگەر ۆولەيبولشىلار – ايگىلى اقىن ولجاس سۇلەيمەنوۆ (كاپيتان), الماتى وبلىسىنىڭ اكىمى, الماتى جانە الماتى وبلىسى ۆولەيبول فەدەراتسياسىنىڭ پرەزيدەنتى اماندىق باتالوۆ, قازۇاۋ رەكتورى, اكادەميك تىلەكتەس ەسپولوۆ سىندى تۇلعالار شەبەر ويىن ورنەگىن كورسەتتى.
المات ءيسادىل
سۋرەتتى تۇسىرگەن م.بوتابەكوۆ