قارجى مينيسترلىگىنىڭ مالىمەتىنشە, ەسەپتى كەزەڭدە مەملەكەتتىك بيۋدجەتكە تۇسىمدەر 3 ترلن 993 ملرد تەڭگەنى قۇرادى. شىعىستار 4 ترلن 128 ملرد تەڭگەگە اتقارىلدى. 1 مامىرداعى جاعداي بويىنشا 316 ملرد تەڭگە كولەمىندە بيۋدجەتتىك قاراجات قالدىقتارى قالىپتاستى.
«مەملەكەتتىك بيۋدجەتتىڭ كىرىستەرى بويىنشا ەسەپتىلىك كەزەڭىنىڭ جوسپارى 103,9%-عا, ونىڭ ىشىندە رەسپۋبليكالىق كىرىستەر – 100,9%-عا, جەرگىلىكتى بيۋدجەتتەر – 113,5%-عا اسىرا ورىندالدى», دەدى ءا. سمايىلوۆ.
رەسپۋبليكالىق بيۋدجەتكە 2 127 ملرد تەڭگە ءتۇستى. بۇل جوسپاردان 19 ملرد تەڭگەگە, ال بىلتىرعى جىلدىڭ ءتورت ايىنىڭ كورسەتكىشىنەن 345 ملرد تەڭگەگە ارتىق. ءوسۋ قارقىنى 119,4% قۇرادى. اسىرا ورىنداۋ نەگىزىنەن 13 ملرد تەڭگە كولەمىندەگى سالىقتىق ەمەس تۇسىمدەر ەسەبىنەن قامتاماسىز ەتىلدى.
«جەرگىلىكتى بيۋدجەتتەردىڭ كىرىستەرى 91 ملرد تەڭگەگە ارتىعىمەن ورىندالىپ, 761 ملرد تەڭگەنى قۇرادى. اسىرا ورىنداۋدىڭ جالپى سوماسىنىڭ 74 ملرد تەڭگەسى جەرگىلىكتى سالىقتارعا تيەسىلى. مەملەكەتتىك بيۋدجەت شىعىستارى 97,8%-عا, رەسپۋبليكالىق بيۋدجەت شىعىستارى – 98,3%-عا جانە جەرگىلىكتى بيۋدجەتتەر – 98%-عا اتقارىلدى», دەدى ءا. سمايىلوۆ.
قارجى ءمينيسترى اتاپ وتكەندەي, اعىمداعى جىلى وڭىرلەرگە بولىنەتىن نىسانالى ترانسفەرتتەر كولەمى 1 638 ملرد تەڭگەنى قۇرايدى. بيۋدجەتتى ناقتىلاۋ كەزىندە نىسانالى ترانسفەرتتەردىڭ سوماسى 873 ملرد تەڭگەگە ۇلعايتىلدى. ولار ازاماتتىق قىزمەتشىلەردىڭ, ونىڭ ىشىندە مۇعالىمدەردىڭ, مەديتسينا, الەۋمەتتىك سالا قىزمەتكەرلەرىنىڭ جالاقىسىن وسىرۋگە, كوپ بالالى وتباسىلارعا اتاۋلى الەۋمەتتىك كومەك شارالارىن كۇشەيتۋگە, ولارعا تۇرعىن ءۇيدى سالۋعا, «اۋىل – ەل بەسىگى», «جاس مامان» جوبالارىن ىسكە اسىرۋعا باعىتتالدى.
«ەسەپتى كەزەڭدە جەرگىلىكتى بيۋدجەتتەرگە 266 ملرد تەڭگە ءبولىندى. ونىڭ ىشىندە 13 ملرد تەڭگەسى – جاڭادان بولىنگەن قاراجاتتار اتاۋلى الەۋمەتتىك كومەككە جانە تۇرعىن ءۇي سالۋعا اۋدارىلدى. جەرگىلىكتى اتقارۋشى ورگانداردىڭ الدىن الا دەرەكتەرى بويىنشا نىسانالى ترانسفەرتتەر 96,5%-عا يگەرىلدى», دەدى ءا. سمايىلوۆ.
سونىمەن قاتار, 4 ايدىڭ قورىتىندىسى بويىنشا كامەرالدىق باقىلاۋمەن جالپى سوماسى 3 ترلن 603 ملرد تەڭگەگە 592 مىڭ مەملەكەتتىك ساتىپ الۋ پروتسەدۋرالارى قامتىلدى. 11 855 پروتسەدۋرا بويىنشا سوماسى 191 ملرد تەڭگەگە مەملەكەتتىك ساتىپ الۋ تۋرالى زاڭنامانى بۇزۋشىلىق انىقتالدى. وسى بۇزۋشىلىقتاردى جويۋ ءۇشىن مەملەكەتتىك اۋديت وبەكتىلەرىنە 11 758 حابارلاما جولداندى. ناتيجەسىندە 175 ملرد تەڭگەگە بۇزۋشىلىقتار جويىلدى.
ءا. سمايىلوۆ سونىمەن قاتار جەكەشەلەندىرۋدىڭ كەشەندى جوسپارىنىڭ ورىندالۋ بارىسى تۋرالى باياندادى. بيىل 125 نىسان ساتىلۋى ءتيىس. ەسەپتى كەزەڭدە 83 نىسان ساتىلۋعا قويىلدى. ونىڭ ىشىندە 31 ملرد تەڭگەگە 25 نىسان ساتىلدى. 58 نىسان ساتىلۋ بارىسىندا.