دارحان ءاسادىلوۆ, ديدار ءامىرالى, گۋزاليا گافۋروۆا, دانيار يۋلداشەۆ باستاعان قازاقستان كومانداسىنىڭ مۇشەلەرى الەم جانە ەۋروپا چەمپيونى ۋگۋر اكتاس, سالامان ەراي (تۇركيا), ەۋروپا چەمپيوناتى مەن پرەمەر-ليگا تۋرنيرلەرىنىڭ جۇلدەگەرى گابور حارسپاتاكي (ۆەنگريا), الۆين كاراكي (كوسوۆو), سونداي-اق, تايپەي, بەلگيا, سەربيا, نيدەرلاند سپورتشىلارىمەن بىرگە دايىندالۋدا.
الەمنىڭ 10 مەملەكەتىنەن كەلگەن ۇزدىك سپورتشىلار ىستانبۇلدا وتەتىن ا سەرياسىنداعى كەزەكتى پرەمەر-ليگا ءتۋرنيرىنىڭ الدىندا باس قوسقان. جارىس 17-19 مامىر كۇندەرى وتەدى.
«كوماندا مۇشەلەرىنىڭ پرەمەر-ليگا تۋرنيرلەرىنە قاتىسۋى ولاردىڭ رەيتينگتەگى جاعدايىن جاقسارتا تۇسەدى. ال الەمنىڭ ەڭ مىقتى سپورتشىلارىمەن بىرگە جاتتىعۋ جيىنىن وتكىزۋ ولاردىڭ شەبەرلىگىن ارتتىراتىنى ءسوزسىز. ونىڭ ۇستىنە, ءدال وسى جيىنعا ءبىزدىڭ سپورتشىلارمەن يىق تىرەستىرىپ جۇرگەن الەم ۇزدىكتەرى جينالعان. مۇنداي جاتتىعۋ كەزەڭدەرى قارسىلاستى تولىعىراق زەرتتەۋگە مۇمكىندىك بەرەدى» دەيدى كاراتەدەن قازاقستان كومانداسىنىڭ باس باپكەرى جاستالاپ ساناۋوۆ.