– مەنىڭ 6 بالام بار. وبلىس ورتالىعىن ايتپاعاندا, اۋداندىق اۋرۋحاناعا اپارۋعا مۇمكىندىك بولا بەرمەيدى. بۇگىن مىنە, اۋىلىما كەلگەن بىرنەشە بىلىكتى دارىگەردىڭ قابىلداۋىندا بولدىق, – دەيدى گۇلستان نەيفەلد.
اۋىل دارىگەرى ەرسىن راحيموۆانىڭ ايتۋىنشا, بەرەگوۆوە اۋىلدىق اۋماعىنا قارايتىن جاڭابەت, جاسقايرات, وسمارىج, زەلەنايا روششا, ىنتالى اۋىلدارىندا 1800 ادام تۇرادى. اۋىلداعى دارىگەرلىك امبۋلاتوريادا 1 جالپى تاجىريبە ءدارىگەرى, 1 اكۋشەر جانە بالالار كابينەتىنىڭ مەدبيكەسى جۇمىس ءىستەيدى.
ال «الەۋمەتتىك مەديتسينالىق ساقتاندىرۋ قورى» اق فيليالىنىڭ ديرەكتورى ايدار سەيىتقازينوۆتىڭ ايتۋىنشا, مەديتسينالىق قىزمەتتەردى ساتىپ الۋعا بولىنگەن قاراجات امبۋلاتورلىق-ەمحانالىق كومەكتى دامىتۋعا باعىتتالدى. ءوڭىردە مەملەكەتتىك تاپسىرىس بويىنشا تەگىن مەديتسينالىق كومەك كورسەتەتىن ۇيىمدارعا 37,5 ملرد تەڭگە ءبولىنگەن. قور 2019 جىلعا مەملەكەتتىك كەپىلدىك اياسىندا تەگىن كورسەتىلەتىن مەديتسينالىق كومەك ءتۇرلەرىن ساتىپ الدى. بيىل مەديتسينالىق قىزمەتتەردى ساتىپ الۋعا وتكەن جىلمەن سالىستىرعاندا بيۋدجەتتەن 5 پايىزعا ارتىق قارجى بولىنگەن.
جۋىردا وڭىرگە جۇمىس ساپارىمەن كەلگەن دەنساۋلىق ساقتاۋ ءمينيسترى ەلجان ءبىرتانوۆ قالقامان اۋىلىنداعى دارىگەرلىك امبۋلاتوريا جۇمىسىمەن تانىسىپ, تۇرعىنداردىڭ سكرينينگتەن قالاي ءوتىپ جاتقانى تۋرالى سۇراعان-دى. دارىگەرلىك امبۋلاتوريانىڭ باس دارىگەرى قۋات جيەنباەۆتىڭ ايتۋىنشا, 3 مىڭنان استام تۇرعىنعا العاشقى مەديتسينالىق-سانيتارلىق كومەك كورسەتەتىن وسى جەردە تۇرعىندار نەگىزگى كلينيكالىق ساراپتامالاردى تاپسىرىپ, ەلەكتروكارديوگرافيالىق زەرتتەۋ مەن سكرينينگتەن دە وتە الادى. كۇندىزگى ستاتسيونار, ەكى رەانيموبيلى بار جەدەل جاردەم پۋنكتى جۇمىس ىستەيدى.
دەنساۋلىق ساقتاۋ ءمينيسترى ە.ءبىرتانوۆ اۋىل تۇرعىندارىنىڭ سكرينينگتىك تەكسەرۋدەن قالاي ءوتىپ جاتقانىنا باسا نازار اۋدارعانى, دارىگەرلەردىڭ ەمدەلۋشى تۇرعىنداردى «ىزدەپ» كەلۋلەرى – دەنى ساۋ قوعام قۇرۋ, سالاماتتى ءومىر سالتىن ساقتاۋعا دەگەن ۇلكەن جاۋاپكەرشىلىك.ال وبلىستىق اۋرۋحانانىڭ №1 مامانداندىرىلعان بريگاداسى العاشقى كۇنى قوس اۋداندا 3 مىڭنان استام اۋىل تۇرعىنىن تەكسەرۋدەن وتكىزدى. ياعني, «مەديتسينا جاقىن!» «ءدارىگەر جانىڭىزدا!» اتتى دەنساۋلىق ساقتاۋ باستاماسى اۋىلداعى ءاربىر تۇرعىن ءۇشىن قولجەتىمدى بولدى.
دارىگەرلەر الدىمەن ايەلدەردىڭ دەنساۋلىعىنا كوپ كوڭىل ءبولۋدە. كەيبىر تۇرعىندارعا تولىق تەكسەرۋدەن ءوتۋ ءۇشىن وبلىستىق اۋرۋحاناعا جولداما بەرىلدى.
شارا بارىسىندا دارىگەرلەردىڭ قابىلداۋىنان بولەك, تۇرعىندارعا «الەۋمەتتىك مەديتسينالىق ساقتاندىرۋ قورى» اق وبلىستىق فيليالىنىڭ ماماندارى ەلىمىزدە 2020 جىلدىڭ قاڭتارىنان باستاپ جۇمىس ىستەيتىن جاڭا جۇيە حالىققا تەگىن مەديتسينالىق كومەك ۇكىمەت بەكىتكەن كەپىلدى تەگىن مەديتسينالىق كومەك كولەمى ءتىزىمىنە سايكەس كورسەتىلەتىنى جايلى ءتۇسىندىرىلدى. پاۆلودار وبلىسى