تەرگەۋ كوميتەتى شەرەمەتەۆو اۋەجايىندا ورتەنگەن Sukhoi Superjet 100 ۇشاعىنىڭ بورتىندا بولعان 78 ادامنىڭ 37-ءسى ءتىرى قالعانى تۋرالى ءمالىم ەتتى. بۇل جايلى جۋرناليستەرگە جەكسەنبى كۇنى تك رەسمي وكىلى سۆەتلانا پەترەنكو ايتتى دەپ حابارلايدى تاسس.
«ماسكەۋ-مۋرمانسك باعىتىندا رەيستى ورىنداعان اۋە لاينەرىنىڭ بورتىندا ەكيپاج مۇشەلەرىن قوسقاندا 78 ادام بولعان. قازىرگى ۋاقىتتا تەرگەۋ بارىسىندا انىقتالعان دەرەك بويىنشا ولاردىڭ 37-ءسى ءتىرى قالعان.
ماسكەۋدەن مۋرمانسك قالاسىنا اتتانعان «اەروفلوت» اۋە كومپانياسىنىڭ Sukhoi Superjet 100 ۇشاعى جەكسەنبى كۇنى كەشكە شەرەمەتەۆو اۋەجايىنا شۇعىل قايتىپ ورالدى, اۋەدە 28 مينۋت ۇشقان ۇشاق اۋەجايعا قاتتى قونعان. اۋا رايىنىڭ قولايسىزدىعىنا بايلانىستى ۇشاقتى ەكىنشى تالپىنىستان سوڭ عانا قوندىرۋعا مۇمكىندىك تۋدى. ۇشاقتىڭ تاعاندارى سىنىپ, قوزعالتقىشتارى ورتەنگەن.