ال جۋىردا شوتلانديا ۇكىمەتىنىڭ 2021 جىلعا دەيىن جاڭا رەفەرەندۋم وتكىزۋ تۋرالى ۇيعارىمىنا نە تۇرتكى بولدى؟ بريتاندىق The Times باسىلىمىندا شوتلانديانىڭ پرەمەر- ءمينيسترى نيكولا ستيوردجەننىڭ رەفەرەندۋمعا بايلانىستى جاڭا زاڭنىڭ 2019 جىلدىڭ سوڭىنا دەيىن قابىلداناتىندىعى تۋرالى پىكىرى جاريالاندى. ەگەر ۇلىبريتانيا ەۋروداق قۇرامىنان شىعار بولسا, شوتلاندىقتار پارلامەنتتىڭ كەلەسى سايلاۋىنا دەيىن برەكسيت پەن تاۋەلسىزدىككە بايلانىستى تاڭداۋلارىن جاساپ ۇلگەرۋلەرى ءتيىس. بۇل – «شوتلانديانىڭ تاۋەلسىز مەملەكەت رەتىندەگى ەكونوميكالىق الەۋەتىنە باعىتتالعان كامپانيا» قۇرۋعا نيەتتى ۇلتشىلداردىڭ ءۇمىتى.
ءبىر قاراعاندا بۇل ءالى دە بولسا ەۋرووداقتان تۇبەگەيلى شىقپاعان ۇلىبريتانياعا قىر كورسەتۋدىڭ دە امالى بولسا كەرەك. بيىل 29 ناۋرىز كۇنى وداقتان شىعۋدى كوكسەگەن بريتاندىقتار قازىر بەلگىلى سەبەپتەرگە بايلانىستى بۇل مەرزىمدى قازان ايىنىڭ سوڭىنا دەيىن سوزۋعا ءماجبۇر بولدى. ەۋرووداقتىڭ بارلىق ىرزىعىن كورىپ وتىرعان شوتلانديا برەكسيت شەشىمىندە ءوز ەلىنىڭ مۇددەلەرى ەسەپكە الىنباي, پىكىرلەرىنىڭ ەسكەرۋسىز قالعاندىعىنا ناليدى. سونداي-اق بريتانيا پارلامەنتى باسشىلىققا الاتىن ۆەستمينستەرلىك جۇيەنىڭ بۇزىلعاندىعىنا جانە شوتلاندياعا شاراپاتى تيمەي وتىرعاندىعىنا قىنجىلادى.
سوندىقتان دا نيكولا ستيوردجەن باسشىلىق ەتەتىن ۇلتشىلدار پارتياسى تاۋەلسىز, ەكونوميكالىق قۋاتتى مەملەكەت قۇرۋدىڭ ۇگىت-ناسيحاتىندا ايانىپ قالمايتىن سىقىلدى.
ونىڭ ۇستىنە قازىر تاۋەلسىزدىكتى اڭساعان, قولاي كورگەن شوتلاندىقتاردىڭ ۇلەسى ارتىپ كەلەدى. Panelbase ۇيىمى جۇرگىزگەن الەۋمەتتىك زەرتتەۋلەر بۇل كورسەتكىشتىڭ ازىرگە 47-53 پايىز ارالىعىندا قۇبىلىپ تۇرعاندىعىن كورسەتكەن. ال YouGov قىزمەتى شوتلانديانىڭ تاۋەلسىزدىگىن قولدايتىنداردىڭ ۇلەسى 49 پايىزعا جەتكەندىگىن حابارلادى.قالاي دەسەك تە, شوتلانديا ەۋرووداقتىڭ قۇرامىندا قالعاندى قالايدى. 2014 جىلعى رەفەرەندۋمدا ولار ۇلىبريتانيادان تاۋەلسىزدىك العان كۇندە وسى وداقتان لەزدە شىعىپ قالۋ قاۋپى تونگەندىكتەن, تاۋەلسىزدىكتەرىن تارك ەتكەن بولاتىن. ەندى بۇل وداقتان ۇلىبريتانيا شىعار تۇستا, شوتلاندىقتار ەۋروپاداعى ءارىپتەستەرىنىڭ جانىندا قالۋعا تىرىسىپ جاتىر.
ۇكىمەت باسشىسى ۇلىبريتانيا قۇرامىنان شىعۋ ۇدەرىسىنىڭ مەيلىنشە «جۇمساق» ءوتۋىن, ونىڭ ىشىندە تاۋەلسىزدىكتىڭ العاشقى جىلدارىندا شىعىستاردى قاتاڭ باقىلاۋعا الىپ, دەربەس ۆاليۋتاعا كوشۋدى كىدىرتە تۇرۋدى كوكسەيدى. بىراق شوتلانديا ۇكىمەتى رەفەرەندۋم شاقىرۋعا قۇزىرلى بولماعاندىقتان, بۇل ىسكە ساياسي پارتيالار بەل شەشە كىرىسكەلى وتىر.
ءسويتىپ ۇلىبريتانيانىڭ ەۋرووداقتان ەنشى الۋ پيعىلىنان تۋىنداعان شوتلانديانىڭ تاۋەلسىزدىككە ۇمتىلىسى – قازىر الەمدىك قوعامداستىقتىڭ ءجىتى نازارىندا.