الماتى قالاسىنداعى ى.التىنسارين اتىنداعى №159 گيمنازيادا پارلامەنت ءماجىلىسى توراعاسىنىڭ ورىنباسارى, Nur Otan پارتياسى فراكتسياسىنىڭ جەتەكشىسى گۇلميرا يسيمباەۆا مەن ءماجىلىستىڭ الەۋمەتتىك-مادەني دامۋ كوميتەتىنىڭ ءتورايىمى گۇلنار يحسانوۆانىڭ قاتىسۋىمەن Nur Otan پارتياسىنىڭ 2030 جىلعا دەيىنگى باعدارلاماسىنىڭ – «ءاربىر ادام ءۇشىن قولجەتىمدى بولاشاق ءبىلىمى» اتتى ەكىنشى ماقساتىنىڭ جۇزەگە اسىرىلۋى بويىنشا دوڭگەلەك ۇستەل وتىرىسى ءوتتى.
گ.يسيمباەۆانىڭ ايتۋىنشا, پارتيا باعدارلاماسىنىڭ اتالعان ماقساتى ءاربىر ادام ءۇشىن قولجەتىمدى, بولاشاق ءبىلىمدى ۇيىمداستىرۋدى – قازاقستاندىقتاردىڭ يننوۆاتسيالىق جاڭا بۋىنىن دايىنداۋدى, ءبىلىم سالاسىنا ەڭ وزىق مامانداردى تارتۋ, ءبىلىم جۇيەسىن دامىتۋدى كوزدەيدى.
بۇگىندە Nur Otan پارتياسى ەلىمىزدەگى ءاربىر مەكتەپتە IT-سىنىپتار اشۋعا, شاكىرتتەردى كومپيۋتەرلىك باعدارلامالار جاساۋعا ىنتالاندىرۋعا, ولاردىڭ بويىنداعى تالانتى مەن ينتەللەكتۋالدىق قاسيەتتەرىن اشۋعا ءبىلىم مەكەمەلەرى ارقىلى بارلىق مۇمكىندىكتەردى جاساپ وتىر.
دوڭگەلەك ۇستەل بارىسىندا الماتىلىق ۇستازدار وزدەرىن تولعاندىرىپ جۇرگەن جاڭا وقۋ باعدارلاماسىنداعى تولىقتىراتىن ولقى تۇستارى تۋرالى, ۇشتىلدىلىكتى ەنگىزۋ, مەكتەپ وقۋشىلارىنىڭ ينتەللەكتۋالدى وي-ءورىسىن وسىرۋگە قاجەتتى مەتوديكالىق-ادىستەمەلىك وقۋ قۇرالدارىنىڭ ساپاسىن جاقسارتۋ جانە باسقا دا بىلىمگە قاتىستى وي-پىكىرلەرىن ورتاعا سالدى.
* * *ءماجىلىس دەپۋتاتتارى, Nur Otan پارتياسى پارلامەنتتىك فراكتسياسىنىڭ مۇشەلەرى يرينا ۋنجاكوۆا, ەۆگەني كوزلوۆ, ۆاسيلي ولەينيك نۇر-سۇلتان قالاسىنىڭ № 64 «اسىل-بوبەك» ارنايى بالاباقشاسىنا باردى.
دەپۋتاتتار بالاباقشا ۇجىمى مەن تاربيەلەنۋشىلەردىڭ اتا-انالارىمەن كەزدەستى.
№64 بالاباقشاعا تىرەك-قيمىل اپپاراتى بۇزىلعان, مەكتەپ جاسىنا دەيىنگى بالالار بارادى. مۇندا وسىنداي مەكتەپ جاسىنا دەيىنگى بالالارعا كەشەندى مەديتسينالىق-پەداگوگيكالىق, الەۋمەتتىك جانە پسيحولوگيالىق كومەك كورسەتىلەدى. ماماندار ەرەكشە قاجەتتىلىكتەرى بار وقۋشىلاردىڭ الەۋمەتتىك بەيىمدەلۋىنە جانە ءبىلىم بەرۋ ينتەگراتسياسىنا جاۋاپ بەرەدى.
حالىق قالاۋلىلارى بارلىق وقۋ جانە ساۋىقتىرۋ كابينەتتەرىن قاراپ, كۇندىزگى مەكتەپتىڭ ءادىسناماسى جانە كۇن تارتىبىمەن تانىستى.
* * * ال دەپۋتاتتار زاۋرەش امانجولوۆا, باقىتگۇل حامەنوۆا جانە جەكسەنباي دۇيسەباەۆ اقمولا وبلىسى تسەلينوگراد اۋدانىنا قاراستى شالقار اۋىلىنىڭ تۇرعىندارىمەن كەزدەستى.كەزدەسۋدە دەپۋتاتتار ماقساتتى الەۋمەتتىك كومەكتىڭ تاعايىندالۋى, مۇگەدەك بالا تاربيەلەپ وتىرعانداردىڭ جاردەماقىسىن كوتەرۋ, تۇرعىن ءۇي الۋ, كوپ بالالى انالارعا جاسالاتىن كومەك ماسەلەلەرى بويىنشا سۇراقتارعا جاۋاپ بەردى.
ولار ءبىرىنشى كەزەكتە ەلباسىنىڭ الەۋمەتتىك باستامالارىنىڭ جۇزەگە اسىرىلۋ بارىسى, ونىڭ ىشىندە, تۇرمىسى تومەن جانە كوپ بالالى وتباسىلاردى قولداۋ شارالارىنا ەرەكشە كوڭىل بولىنەتىندىگىن اتادى.
سونىمەن قاتار حالىق قالاۋلىلارى شالقار اۋىلدىق مەكتەبىنىڭ ۇجىمى جانە اتا-انالارىمەن بيۋدجەتتىك سالا قىزمەتكەرلەرىنىڭ جالاقىسىن كوتەرۋى, ماقساتتى الەۋمەتتىك جاردەماقىنىڭ قايتا ەسەپتەلۋى سىندى ماسەلەلەردى تالقىلادى. * * * Nur Otan پارتياسى پارلامەنتتىك فراكتسياسىنىڭ مۇشەلەرى گلەب ششەگەلسكي, ولگا شيشيگينا جانە الەكساندر سۋسلوۆ پاۆلودار وبلىسىندا ەلىمىزدە جەتەكشى مەديتسينالىق مەكەمەلەردىڭ ءبىرى سانالاتىن كارديولوگيالىق ورتالىقتىڭ جۇمىسىمەن تانىستى. قازىرگى كەزدە كارديوورتالىق زاماناۋي كارديوحيرۋرگيا مەن ينتەرۆەنتسيالىق كارديولوگيانىڭ بارلىق باعىتتارىن بىرىكتىرەدى جانە ەرەسەكتەرگە دە, بالالارعا دا كومەك كورسەتەدى. كەزدەسۋ بارىسىندا ءماجىلىس دەپۋتاتتارى ورتالىقتىڭ ءمۇمكىندىكتەرىن ەرەكشە اتاپ ءوتتى. * * * ءماجىلىس دەپۋتاتتارى, Nur Otan پارتياسى پارلامەنتتىك فراكتسياسىنىڭ مۇشەلەرى دارحان مىڭباي, ءابدىماناپ بەكتۇرعانوۆ, ساكەن قانىبەكوۆ, ءۋاليحان قاينازاروۆ, فاحريددين قاراتاەۆ شىمكەنتتە «قۇتتى مەكەن» جوباسى اياسىندا بىرقاتار الەۋمەتتىك نىساندارعا باردى. دەپۋتاتتار بادام وزەنى ارقىلى وتەتىن كوپىردىڭ قۇرىلىس جۇمىستارىمەن تانىستى.– بۇل نىسان قالا ءۇشىن عانا ەمەس, ەل ءۇشىن دە وتە ماڭىزدى. ويتكەنى كوپىر ەكى مەگاپوليستى – شىمكەنت پەن تاشكەنتتى بايلانىستىرىپ, ەكى ەل اراسىنداعى ىنتىماقتاستىقتى كەڭەيتۋگە جاعداي جاسايدى. سوندىقتان بارلىق ماسەلەلەر تەز ارادا شەشىلىپ, نىسان ءوز ۋاقىتىندا پايدالانۋعا بەرىلەدى دەگەن سەنىمدەمىز, – دەدى دارحان مىڭباي.
سونداي-اق وسى كۇنى پارلامەنتشىلەر «ساۋلە» ىقشام اۋدانىنداعى №76 مەكتەپ ۇجىمىمەن كەزدەستى. حالىق قالاۋلىلارى مەكتەپ جانىنان سالىنىپ جاتقان قوسىمشا 300 ورىندىق وقۋ عيماراتى, سپورت زالى, شەبەرحانا جانە اسحانا قۇرىلىسىمەن تانىستى.
* * * ال ءماجىلىس دەپۋتاتتارى تاراس حيتۋوۆ, سەرگەي سيمونوۆ, باقتىقوجا ىزمۇحامبەتوۆ پەن اباي تاسبولاتوۆ اتىراۋ وبلىسىنىڭ ماحامبەت اۋدانىنا باردى.سارايشىق اۋىلىندا دەپۋتاتتار «اتىراۋاگروونىمدەرى» شارۋاشىلىق قوجالىعىنىڭ ۇجىمىمەن كەزدەستى. اڭگىمە بارىسىندا شاعىن جانە ورتا بيزنەستى مەملەكەتتىك قولداۋ شارالارى تالقىلاندى.
دەپۋتاتتار سايلاۋشىلارعا تۇڭعىش پرەزيدەنت – ەلباسى نۇرسۇلتان نازارباەۆتىڭ الەۋمەتتىك باستامالارى ورىندالۋ بارىسىمەن تانىستىرىپ, ونىڭ ىشىندە از قامتىلعان جانە كوپ بالالى وتباسىلارعا قولداۋ كورسەتۋ تۋرالى ايتىپ بەردى.
* * * ءوز كەزەگىندە ءماجىلىس دەپۋتاتتارى قۇدايبەرگەن ەرجان, ميحايل چيركوۆ, كەڭەس ابساتيروۆ جانە گەننادي شيپوۆسكيح وسى كۇندەرى جۇمىس ساپارىمەن ورال قالاسىنداعى جوعارى اگروتەحنيكالىق كوللەدجگە باردى. كەزدەسۋ بارىسىندا دەپۋتاتتار 3D اقپاراتتىق ديزاين كابينەتىنىڭ جۇمىسىمەن تانىستى.سونداي-اق ءماجىلىس دەپۋتاتتارى باتىس قازاقستان مەملەكەتتىك ۋنيۆەرسيتەتىنىڭ ستۋدەنتتەرىمەن كەزدەستى.
اڭگىمە بارىسىندا ستۋدەنتتەر مەن مۇعالىمدەرگە قاتىستى وزەكتى ماسەلەلەر كوتەرىلدى. بۇل رەتتە بۇگىنگى كۇنى قوعامدا تالقىلانىپ جاتقان «مۇعالىمدەر مارتەبەسى تۋرالى» زاڭ جوباسى دا نازاردان تىس قالمادى.