«سارىارقا» گاز قۇبىرىنىڭ قۇرىلىسى تۇڭعىش پرەزيدەنت – ەلباسى ن.ءا.نازارباەۆتىڭ باستاماسىمەن قولعا الىنعانى بەلگىلى. گاز قۇبىرى قىزىلوردا – جەزقازعان – قاراعاندى – تەمىرتاۋ – نۇر-سۇلتان باعىتى بويىنشا وتەدى. وسى باعىتتا جىلىنا 2,2 ملرد تەكشە مەتر كوگىلدىر وتىن ءوتكىزىلۋگە ءتيىس. ۇزىندىعى 1061 شاقىرىمعا تەڭ. جوبا 2 ميلليون 700 مىڭ قازاقستاندىقتى گازبەن قامتاماسىز ەتۋگە مۇمكىندىك بەرەدى. مەملەكەتتىك ماڭىزعا يە قۇرىلىستىڭ بارىسىن ۇكىمەت تىكەلەي قاداعالاپ وتىرعانىن ايتا كەتەيىك.
جاقىندا قىزىلوردا وبلىسىنا جۇمىس ساپارىمەن كەلگەن «سامۇرىق-قازىنا» ۇاق» اق باسقارما توراعاسى احمەتجان ەسىموۆ قىزىلوردا وبلىسىنىڭ اكىمى قىرىمبەك كوشەرباەۆ جانە «قازمۇنايگاز» ۇك» اق باسقارما توراعاسى اليك ايدارباەۆپەن بىرگە CRC-1 دانەكەرلەۋ كەشەنىنە بارىپ, «سارىارقا» ماگيسترالدى گاز قۇبىرىنىڭ قۇرىلىسىن كوردى.
سول سياقتى «قۇتتى مەكەن» پارتيالىق جوباسى اياسىندا ورتالىق پارتيا اپپاراتى, پارتيالىق باقىلاۋ قىزمەتىنىڭ باسشىسى داۋرەن بيجۇمانوۆ پەن «قۇتتى مەكەن» پارتيالىق جوباسىنىڭ جەتەكشىسى نۇرلان بايمىرزاەۆ باستاعان ارنايى كوميسسيا ينجەنەرلىك جانە الەۋمەتتىك ينفراقۇرىلىم جۇمىستارىمەن تانىستى.– وزدەرىڭىزگە بەلگىلى, پارتيا توراعاسى Nur Otan پارتياسىنىڭ كەزەكتى ءحVىىى سەزىندە حالىقتىڭ الەۋەتىن ارتتىرىپ, اۋىلدىق ەلدى مەكەندەردىڭ ينجەنەرلىك جانە الەۋمەتتىك ينفراقۇرىلىمىن دامىتۋعا باعىتتالعان بىرنەشە پارتيالىق جوبانى جۇزەگە اسىرۋدى تاپسىردى. سونىڭ ءبىرى – «قۇتتى مەكەن» جوباسى. بۇگىن جوبا اياسىندا ايماقتىق پارتيا فيليالىنىڭ پارتيالىق باقىلاۋ كوميسسياسىمەن بىرگە «سارىارقا» ماگيسترالدى گاز قۇبىرىنىڭ قۇرىلىس-مونتاج جۇمىستارىنا, مەملەكەت قارجىسىنىڭ ءناتيجەلى جۇمسالۋىنا پارتيالىق باقىلاۋ جاساپ, جۇمىسشىلاردىڭ جاعدايىمەن تانىستىق. باستى ماقسات – پارتيا توراعاسى, تۇڭعىش پرەزيدەنتىمىزدىڭ بەس الەۋمەتتىك باستاماسىنىڭ ورىندالۋىن قاداعالاۋ. ارينە جوبانىڭ ءوز دەڭگەيىندە جۇرگىزىلىپ جاتقانى قۋانتادى. ەڭ باستىسى, جوبا ىسكە قوسىلعان ۋاقىتتا قانشاما وتباسىن كوگىلدىر وتىنمەن قامتىپ قانا قويماي, سولتۇستىك وڭىرلەردەگى ەكولوگيانى جاقسارتاتىنى انىق. مۇنى وتكەن جىلى وسى ماگيسترالدى گاز قۇبىرى جوباسىن جۇزەگە اسىرۋعا تاپسىرما بەرگەن كەزدە تۇڭعىش پرەزيدەنتىمىز ەرەكشە ماڭىز بەرىپ, اتاپ وتكەن بولاتىن, – دەدى ورتالىق پارتيا اپپاراتى پارتيالىق باقىلاۋ قىزمەتىنىڭ ينسپەكتورى, «قۇتتى مەكەن» پارتيالىق جوباسىنىڭ جەتەكشىسى نۇرلان بايمىرزاەۆ.
كۇنى بۇگىنگە دەيىن قازاقستاننىڭ ورتالىق ايماعى نەگىزىنەن كومىر تۇتىنىپ كەلدى. ەلوردامىز نۇر-سۇلتانعا جولىمىز تۇسكەندە جەلسىز كۇندەرى قالانى كوك ءتۇتىن قۇشاعىنا الىپ, وكپەسىن سىعىپ تۇراتىنىن بايقاعان ەدىك. كومىر ءتۇتىنى ەكولوگيالىق زارداپتاردى دا كوبەيتەدى. ەندى ول قاۋىپ سەيىلۋگە ءتيىس. «سارىارقا» ماگيسترالدى گاز قۇبىرى ەلىمىزگە وسىنداي يگىلىكتەردى اكەلە جاتىر.
قىزىلوردا وبلىسى