ماسكەۋلىك تالعامپاز كورەرمەن كونتسەرت بويى مۋزىكانتتاردى قوشەمەتكە بولەدى. ال, كەلەسى كونتسەرت 5 مامىر كۇنى سانكت-پەتەربورداعى ميحايلوۆ تەاترىندا وتەدى.
بىرەگەي گەليكون زالىنا جينالعان 500-دەن اسا تىڭدارمان شىعارماشىلىق ۇجىمنىڭ ناعىز جانكۇيەرى دەۋگە بولادى. ولار ءاربىر شىعارمانى ەرەكشە ىقىلاسپەن قابىلداپ, كوپتىڭ سۇيىكتىسىنە اينالعان «دۋدار-اي» ءانىن داۋىستاپ بىرگە ورىنداپ, حالىقتىق شىعارماعا اينالعان «سارىارقا», «اداي», «تۇركەش» كۇيلەرىن سوڭعى نوتاسىنا دەيىن تەبىرەنە تىڭدادى.
كونتسەرتتە قۇرمانعازى كۇيلەرىنەن باستاپ, قازاق,ورىس جانە شەتەل كومپوزيتورلارىنىڭ شىعارمالارى: ە.برۋسيلوۆسكي, ل.بەرنستاين تۋىندىلارى مەن قازاق–ورىس حالىق اندەرى شىرقالدى. بارلىعى 21 شىعارما ورىندالدى. وركەسترمەن بىرگە قازاق ونەر مايتالماندارى ونەر كورسەتتى. ەڭبەك سىڭىرگەن قايراتكەر, وركەستر ديرەكتورى نۇرعيسا داۋەشوۆ ماسكەۋدە ۇجىم جانكۇيەرلەرىنىڭ كوپتىگىنە سەنىمدى.
«بۇل جەردە ءبىزدى اسىعا كۇتەتىندەردىڭ بار ەكەنىن مەن جاقسى بىلەمىن. ويتكەنى, وتكەن جىلى ءبىز پاريجدە, يۋنەسكو-نىڭ شتاب-پاتەرىندە كونتسەرت قويعاندا ءبىزدى تىڭداۋ ءۇشىن فرانتسياعا ارنايى ۇشىپ كەلگەن رەسەيلىكتەرمەن كەزدەستىك. جالپى, ءبىزدىڭ ۇجىم بيىل 100 كونتسەرت بەرۋدى جوسپارلاپ وتىر. بۇل ءۇشىن بارىنشا جۇمىس ىستەپ جاتىرمىز. سەبەبى جاعداي بار, مۇمكىندىك مول. بىزگە جاقىندا جەكە كونتسەرت زالى بەرىلدى. بۇل وركەستر تاريحىنداعى ەكىنشى عيمارات. ماسكەۋدەن پەتەربورعا, ودان كەيىن پەكيندە كونتسەرت قويامىز. ايتپاقشى, قۇرمانعازى وركەسترى بۇعان دەيىن ماسكەۋدە 16, پەتەربوردا 30 جىل بۇرىن كونتسەرت بەرىپتى. تىڭدارمانعا مەرەكەلىك كوڭىل-كۇي سىيلايمىز دەگەن ۇمىتتەمىز», دەدى ول.
ماسكەۋدە وتكەن مەرەيتويلىق كونتسەرت قازاقتىڭ ەڭ تاڭداۋلى, تەرەڭ وي-تولعامدى - «كوڭىلاشار», «كوش كەرۋەن» كۇيلەرىمەن باستالدى. بۇدان ءارى كونتسەرت قايرات كاكىموۆ شىرقاعان «قىز جىبەك» وپەراسىنداعى «شەگەنىڭ تەرمەسىمەن» جالعاسىن تاپتى. اسەم ءان كورەرمەندى قازاقتىڭ سايىن دالاسىنداعى كورىنىسپەن باۋراعانداي اسەرگە بولەدى. كوركىنە اقىلى ساي سۇلۋ قىز جىبەك تۋرالى, ماحاببات ماشاقاتى جولىندا تۋىنداعان وقيعا جايلى ءان كوپتىڭ كوڭىلەنەن شىققان ەڭ ۇزدىك تۋىندى بولدى. كونتسەرت «ەدىل مەن جايىق» انىمەن اياقتالدى. سونداي-اق وتباسىلىق جۇپ ميراس پەن قۇرالاي بەكجانوۆتار ورىنداعان ا.مۇحامەدي ۇلىنىڭ «نۇر-سۇلتان» ءانى تىڭدارماننىڭ كوڭىلىنەن شىقتى.
«ماسكەۋدە كۇن سايىن ءتۇرلى كونتسەرتتەر وتەدى. ال, قۇرمانعازى وركەسترىنىڭ كونتسەرتىنە ەرەكشە كوڭىلگە كوڭىل كۇيمەن باردىم. قازاقستان ۇنەمى ەرەكشە باعدارلامالارمەن كەلەدى. بۇگىن دە ءدال سولاي. رەپەرتۋار جۇيەلى تالعاممەن تاڭدالعان. ورىنداۋشىلار كەرەمەت داۋىستى», دەيدى ماسكەۋلىك تۇرعىن بۋروۆا نادەجدا ۆاسيلەۆنا.
مۋزىكا كەشى نۇرعيسا تىلەنديەۆ پەن قۇرمانعازى كومپوزيتسياسىمەن اياقتالدى. «ماحامبەت» جانە «سارىارقا» كۇيلەرى قازاق مۋزىكاسىنىڭ تاريحىندا التىن ارىپتەرمەن جازىلعان, سازگەر جاۋىنگەر بەينەسىن بەينەلەپ, تاۋەلسىزدىك پەن ەركىندىكتى سەزدىرتەدى. تىڭدارماننىڭ ىستىق ىقىلاسى مەن زور قوشەمەتى مۋزىكانتاردى ەرەكشە كۇيگە بولەدى.