كەزدەسۋ تۇركيا ءسىم باسشىسى مەۆليۋت چاۆۋشوگلۋدىڭ وسى ايدىڭ سوڭعى دەكاداسىندا جوسپارلانعان قازاقستانعا رەسمي ساپارى قارساڭىندا ءوتتى. ديپلوماتتار ەكى ەل اراسىنداعى ەكىجاقتى قارىم-قاتىناستاردىڭ نەگىزگى اسپەكتىلەرى بويىنشا «ساعاتتاردى تەڭەستىردى».
اڭگىمەلەسۋ بارىسىندا تاراپتار 2009 جىلعى قازاندا قول قويىلعان قازاقستان مەن تۇركيا اراسىنداعى ستراتەگيالىق ارىپتەستىك تۋرالى شارت تارماقتارىنىڭ ورىندالۋىن تالقىلاپ, قازاقستان-تۇركيا قاتىناستارىنىڭ ماڭىزدى قۇرامداس بولىگى ساۋدا-ەكونوميكالىق جانە مادەني-گۋمانيتارلىق ىنتىماقتاستىق بولىپ تابىلاتىنى اتاپ ءوتتى.
مينيستر تۇركيا قازاقستاننىڭ ماڭىزدى ينۆەستيتسيالىق ارىپتەسى بولىپ قالا بەرەتىنىن, ەلىمىزگە 3 ملرد اقش دوللاردان استام ينۆەستيتسيا سالعانىن جانە جاڭا جۇمىس ورىندارىنىڭ سانىن ارتۋىنا ىقپال ەتكەندىگىن اتاپ ءوتتى. ايتا كەتەرلىك جايت, ەلىمىزدىڭ ەلورداسى – نۇر-سۇلتان قالاسىنىڭ كوپتەگەن ماڭىزدى نىساندارىن تۇرىك قۇرىلىس كومپانيالارى سالعان بولاتىن.
ءسىم باسشىسى تۇرىك بيزنەسمەندەرىن تاۋ-كەن مەتاللۋرگيا, حيميا جانە جەڭىل ونەركاسىپ, ەلەكتر ەنەرگەتيكاسى, اگروونەركاسىپتىك جانە ينفراقۇرىلىمدىق سالالار جانە ت.ب. سالالارداعى بىرلەسكەن جوبالاردى جۇزەگە اسىرۋعا قاتىسۋعا شاقىردى.
تۇرىك ديپلوماتى ترانسكاسپي مۋلتيمودالدىق تاسىمالداردىڭ تابىستى دامۋى تۋرالى سونداي-اق اقتاۋ پورتىندا جۇكتەردى وڭدەۋ جانە اۋىستىرىپ تيەۋ جىلدامدىعىن ارتتىرۋ بويىنشا ودان ءارى جۇمىس ىستەۋ قاجەتتىلىگى تۋرالى اتاپ ءوتتى. تاراپتار سونداي-اق پورتتىق قىزمەتتەردى ۇسىنۋدىڭ, كەدەندىك راسىمدەردى وتكىزۋدىڭ جانە تاريفتەردى رەتتەۋدىڭ وڭايلاتىلعان تەتىگىن قۇرۋ قاجەتتىلىگىنە نازار اۋداردى. ەكى مەملەكەتتىڭ لوگيستيكالىق ۆەدومستۆولارى مەن كاسىپورىندارى اراسىندا كونسۋلتاتسيالار وتكىزۋ تۋرالى تۇسىنىستىككە قول جەتكىزىلدى.
تۇركيا قازاقستاننىڭ ساۋدا سەرىكتەستەرىنىڭ العاشقى وندىعىنا كىرۋدە. ەكى ەل اراسىنداعى تاۋار اينالىمى 2018 جىلى ءوسىپ, 2 ملرد اقش دوللارىن قۇرادى. مەملەكەت باسشىلارى اراسىندا قول جەتكىزىلگەن ۋاعدالاستىقتارعا سايكەس تاۋار اينالىمىن 5 ملرد اقش دوللارى بەلگىسىنە قول جەتكىزۋ ماقساتى قويىلعان. بۇگىنگى تاڭدا ەلىمىزدە تۇرىك كاپيتالىنىڭ قاتىسۋىمەن 1,5 مىڭنان استام كاسىپورىن جۇمىس ىستەيدى.
تۇركيا قازىرگى تۇركى مەملەكەتتەرىن بىرىكتىرەتىن تۇركىتىلدەس مەملەكەتتەردىڭ ىنتىماقتاستىق كەڭەسىنىڭ (تمىك) مۇشەسى بولىپ تابىلادى. ونىڭ باستى ماقساتى ۇيىمعا مۇشە مەملەكەتتەر اراسىنداعى جان-جاقتى ىنتىماقتاستىقتى دامىتۋ بولىپ تابىلادى. تمىك 2009 جىلى قازاقستاننىڭ تۇڭعىش پرەزيدەنتى - ەلباسى نۇرسۇلتان نازارباەۆتىڭ باستاماسىمەن قۇرىلعان. مەملەكەت باسشىلارى دەڭگەيىندەگى تمىك-نىڭ كەزەكتى 7-ءشى ءسامميتى اعىمداعى جىلدىڭ كۇزىندە ازەربايجاندا وتەدى.