كەشە, ياعني 3 مامىر كۇنى قازاقستان رەسپۋبليكاسىنىڭ ورتالىق سايلاۋ كوميسسياسى قاسىم-جومارت كەمەل ۇلى توقاەۆتى قازاقستان رەسپۋبليكاسىنىڭ پرەزيدەنتتىگىنە كانديدات رەتىندە رەسمي تۇردە تىركەپ, كانديدات كۋالىگىن ونىڭ سەنىمدى وكىلى, «Nur Otan» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆقا تاپسىردى. وسى شەشىمنەن كەيىن كانديداتتىڭ رەسپۋبليكالىق قوعامدىق شتابى قۇرىلىپ, ول زاڭعا سايكەس 11 مامىر كۇنى ساعات 18:00-دەن باستاپ جۇمىس ىستەيتىنى بەلگىلى بولدى.
بۇگىنگى بريفينگتە ماۋلەن اشىمباەۆ ورتالىق سايلاۋ كوميسسياسىنىڭ شەشىمىنەن كەيىن قازاقستان پرەزيدەنتىنىڭ كەزەكتەن تىس سايلاۋىنا «Nur Otan» پارتياسىنان كانديدات قاسىم-جومارت كەمەل ۇلى توقاەۆتىڭ رەسپۋبليكالىق قوعامدىق شتابى قۇرىلعانىن ايتتى.
– ورتالىق سايلاۋ كوميسسياسىنىڭ شەشىمىنەن كەيىن قازاقستان رەسپۋبليكاسىنىڭ پرەزيدەنتتىگىنە كانديدات قاسىم-جومارت كەمەل ۇلى توقاەۆتىڭ رەسپۋبليكالىق قوعامدىق شتابى قۇرىلدى. شتاب زاڭمەن بەكىتىلگەن ۋاقىتتان باستاپ جۇمىس ىستەيدى. رەسپۋبليكالىق قوعامدىق شتابتىڭ قۇرامىنا 187 ادام ەندى. ولار ەلىمىزگە بەلگىلى مەملەكەت جانە قوعام قايراتكەرلەرى, سونداي-اق بەلگىلى ءبىر سالادا بيىك بەلەستەردى باعىندىرعان بەلسەندى ازاماتتار. قاسىم-جومارت كەمەل ۇلى رەسپۋبليكالىق قوعامدىق شتابتى باسقارۋدى ماعان تاپسىردى, – دەدى ماۋلەن اشىمباەۆ.
رەسپۋبليكالىق قوعامدىق شتابتىڭ قۇرامىنا: حالىق قاھارماندارى: مۇحتار التىنباەۆ, باقىتجان ەرتاەۆ, قازاقستاننىڭ ەڭبەك ەرلەرى: يۆان ساۋەر, ايمان مۇساحودجاەۆا, سەرىك اقشولاقوۆ, يۋري پيا, مەملەكەت جانە قوعام قايراتكەرلەرى: كەنجەعالي ساعاديەۆ, ءادىل احمەتوۆ, سانسىزباي ەسىلوۆ, باقىتجان جۇماعۇلوۆ, حالىقارالىق سپورتتىق سايىستاردا ەلىمىزدىڭ اتىن شىعارىپ, ابىرويىمىزدى اسقاقتاتقان سپورتشىلارىمىز: جاقسىلىق ۇشكەمپىروۆ, الەكساندر ۆينوكۋروۆ, ايبەك نۇعىماروۆ, ءزۇلفيا عابيدۋللينا, ءاليا ءجۇسىپوۆا, قانات يسلام جانە دينارا سادۋاقاسوۆا, ۇكىمەتتىك ەمەس ۇيىمداردىڭ وكىلدەرى ارۋجان ساين, دينارا ءشايجۇنىسوۆا, ديانارا زاكيەۆا, بەلگىلى ونەر قايراتكەرلەرى: روزا رىمباەۆا, دوسxان جولجاقسىنوۆ, التىناي جوراباەۆا, مايرا مۇxامەدقىزى, مەيرامبەك بەسباەۆ, سامال ەسلياموۆا, ساكەن مايعازيەۆ, قىدىرالى بولمانوۆ, تامارا اسار سىندى انشىلەر مەن ارتىستەر, ال جۋرناليستەردىڭ اراسىنان دارxان قىدىرالى, نۇرتورە ءجۇسىپ, دانا نۇرجىگىت, مايا بەكباەۆا, قالقامان سارين سياقتى قالامگەرلەر مۇشە بولدى. سونداي-اق رەسپۋبليكالىق شتابتىڭ قۇرامىندا پارلامەنت دەپۋتاتتارى دا بار.
سونىمەن قاتار رەسپۋبليكالىق قوعامدىق شتابتىڭ باسشىسى العاش رەت قوعامدىق شتابتىڭ «TeamQazaqstan» جاستار قاناتى دا قۇرىلعانىن ايتتى.
– العاش رەت رەسپۋبليكالىق قوعامدىق شتابتىڭ جاستار قاناتى قۇرىلدى. وعان قايرات نۇرتاس, قۇرالاي اناربەكوۆا, اننا اليابەۆا, ايگەرىم ەسەنالى جانە تاعى باسقا بەلگىلى بەلسەندى جاستار مۇشە بولدى. جاستار قاناتى نەگىزىنەن ەلىمىزدەگى جاس بۋىنمەن جۇمىس ىستەيدى, – دەدى ماۋلەن اشىمباەۆ.
وسى رەتتە رەسپۋبليكالىق قوعامدىق شتابتىڭ قۇرامىنداعى 187 ادامنىڭ 33-ءى اتالعان جاستار قاناتىنىڭ وكىلدەرى ەكەنىن ايتا كەتكەن ءجون.
سونىمەن قاتار جيىندا بۇگىندە ەلىمىز بويىنشا 227 قوعامدىق شتاب قۇرىلعانى ايتىلدى. ونىڭ 17-ءسى – وبلىستىق, 37-ءسى – قالالىق جانە 173-ءى اۋداندىق دەڭگەيدە جۇمىس ىستەيدى. ايماقتىق جانە اۋماقتىق شتابتاردىڭ قۇرامىنا 5766 ادام ەنسە, ونىڭ 1267-ءسى جاستار قاناتىنىڭ وكىلدەرى.
ماۋلەن اشىمباەۆ اتالعان شتابتار مۇشەلەرىنىڭ ءبارى «Nur Otan» پارتياسىنان قازاقستان پرەزيدەنتتىگىنە كانديداتتىڭ سەنىمدى وكىلدەرى ەكەنىن ەرەكشە اتاپ ءوتتى.
– ەلىمىز بويىنشا قاسىم-جومارت كەمەل ۇلىنىڭ 19 500-دەن استام سەنىمدى وكىلى تىركەلدى. ولار بەلگىلى, بەلسەندى ازاماتتار, اۋىلشارۋاشىلىق ماماندارى, ۇستازدار, زيالىلار, سپورتشىلار, قۇرىلىسشىلار, مادەنيەت قايراتكەرلەرى جانە باسقا دا ماڭىزدى سالالاردىڭ وكىلدەرى, – دەدى رەسپۋبليكالىق قوعامدىق شتابتىڭ باسشىسى.
سونداي-اق ماۋلەن اشىمباەۆ ءوز سوزىندە بارلىق شتابتا كانديداتتىڭ قوعامدىق قابىلداۋ بولمەسى جۇمىس ىستەيتىنىن, وندا ازاماتتاردىڭ وتىنىشتەرى مەن ۇسىنىستارى قابىلداناتىنىن جەتكىزدى. ودان بولەك, ول رەسپۋبليكالىق قوعامدىق شتابتىڭ مۇشەلەرى 13 مامىردان باستاپ بارلىق وڭىرلەرگە شىعىپ, حالىقپەن كەزدەسەتىنىنە نازار اۋداردى.
– حالىقپەن كەزدەسۋلەردە كانديداتىمىزدىڭ سايلاۋالدى باعدارلاماسى مەن ازاماتتاردى الاڭداتقان وزەكتى ماسەلەلەر تالقىلانادى. شتابتىڭ جۇمىسى مەن ونىڭ مۇشەلەرى تۋرالى اقپاراتتاردى رەسپۋبليكالىق قوعامدىق شتابتىڭ رەسمي سايتى مەن الەۋمەتتىك جەلىلەردەگى پاراقشالارىنان دا الۋعا بولادى. اتالعان سايت پەن رەسمي اككاۋنتتار دا زاڭعا سايكەس 11 مامىردان باستاپ جۇمىس ىستەيدى, – دەدى ماۋلەن اشىمباەۆ.
سونىمەن قاتار «Nur Otan» پارتياسى توراعاسىنىڭ ءبىرىنشى ورىنباسارى پارتيا توراعاسىنىڭ تاپسىرماسىنا سايكەس سايلاۋالدىڭ ۇگىت-ناسيحات جۇمىستارىن جوعارى دەڭگەيدە, كرەاتيۆتى, ءتيىمدى, زاماناۋي تەحنولوگيالاردى قولدانىپ ناتيجەلى وتكىزۋگە دايىن ەكەنىن جەتكىزدى.
– تۇڭعىش پرەزيدەنت – ەلباسى, پارتيامىزدىڭ توراعاسى نۇرسۇلتان ءابىش ۇلى نازارباەۆ پەن مەملەكەت باسشىسى قاسىم-جومارت كەمەل ۇلى توقاەۆتىڭ تاپسىرماسى بويىنشا بۇل سايلاۋ ءادىل ءارى اشىق, قازاقستان رەسپۋبليكاسىنىڭ زاڭدارىنا سايكەس, حالىقارالىق نورمالارعا ساي, جوعارى دەڭگەيدە ءوتۋى كەرەك. پارتيامىز سايلاۋدىڭ اشىق ءارى ءادىل ءوتۋى ءۇشىن بارلىق شارالاردى جۇزەگە اسىرادى. ول ءۇشىن ءبىز ورتالىق سايلاۋ كوميسسياسىمەن, وتاندىق جانە حالىقارالىق باقىلاۋشىلارمەن, سونداي-اق, بۇقارالىق اقپارات قۇرالدارىمەن تىعىز جۇمىس ىستەۋگە دايىنبىز, – دەدى ماۋلەن اشىمباەۆ.
ءسوز سوڭىندا ول ەلىمىزدىڭ ءىرى ساياسي ناۋقاننىڭ الدىندا تۇرعانىن ايتىپ, بۇل بارشا قازاقستاندىقتار ءۇشىن جاۋاپكەرشىلىك ەكەنىن تىلگە تيەك ەتتى.
– بۇل سايلاۋ بيلىكتىڭ ساباقتاستىعىن قامتاماسىز ەتۋگە, ەلىمىزدەگى ساياسي جۇيەنى كۇشەيتۋگە, حالقىمىزدىڭ تاتۋلىعى مەن تۇراقتىلىعىن نىعايتۋعا ۇلەس قوساتىن قادام دەپ قابىلدايمىز. سوندىقتان بۇل سايلاۋدىڭ قازاقستاندى دامۋدىڭ جاڭا كەزەڭىنە الىپ شىعاتىن شارا بولارىنا سەنەمىز جانە ءبىزدىڭ پارتيامىز سول جولدا ايانباي ەڭبەك ەتەدى, – دەدى ماۋلەن اشىمباەۆ.
ءىس-شارا بارىسىندا رەسپۋبليكالىق قوعامدىق شتابتىڭ مۇشەلەرى: بەلگىلى قوعام قايراتكەرى, «ۇلتتىق عىلىمي مەديتسينالىق ورتالىق» اق باسقارما توراعاسى اباي بايگەنجين, «اتامەكەن» ۇكپ باسقارما توراعاسى, «Nur Otan» پارتياسى ساياسي كەڭەسىنىڭ مۇشەسى ابىلاي مىرزاحمەتوۆ, قوعام قايراتكەرى, قايىرىمدىلىق قورىنىڭ ديرەكتورى ارۋجان ساين جانە «Qazaqstan» ۇلتتىق تەلەارناسىنىڭ جۇرگىزۋشىسى, بلوگەر ايگەرىم ەسەنالى ءسوز سويلەپ, الداعى ساياسي ناۋقانعا تاس-ءتۇيىن دايىن ەكەندەرىن جەتكىزدى.