«ەلىمىزدە جاستار ساياساتىن جۇزەگە اسىرۋعا بەلسەندى ۇلەس قوسىپ جۇرگەن بىلىكتى جاس مامان داۋلەت كارىبەك «Nur Otan» پارتياسى جانىنداعى «Jas Otan» جاستار قاناتىنىڭ توراعاسى بولىپ سايلاندى. ونىڭ كانديداتۋراسىن «Jas Otan» جاستار قاناتى ورتالىق كەڭەسىنىڭ وتىرىسىندا كەڭەس مۇشەلەرى ءبىراۋىزدان قولدادى.
داۋلەت 2017 جىلدان بەرى «Jas Otan»-نىڭ اتقارۋشى حاتشىسى رەتىندە ناتيجەلى ەڭبەك ەتىپ, تاباندىلىعىمەن تانىلعان مامان. سونىڭ ناتيجەسىندە «دارىن» مەملەكەتتىك سىيلىعىنىڭ لاۋرەاتى اتانىپ, «Nur Otan» پارتياسى ساياسي كەڭەسىنىڭ مۇشەسى بولىپ سايلاندى.
تاياۋدا عانا وتكەن پارتيامىزدىڭ كەزەكتەن تىس XIX سەزىندە ەلىمىزدىڭ جاستارى اتىنان ءسوز سويلەپ, بىرقاتار تىڭ باستامالار ۇسىندى. سوندىقتان داۋلەتتى جاڭا قىزمەتىمەن قۇتتىقتاي وتىرىپ, ونىڭ وزىنە جۇكتەلگەن مىندەتتى مۇلتىكسىز ورىندايتىنىنا سەنىم بىلدىرەمىن», - دەپ جازدى ماۋلەن اشىمباەۆ.
ونىڭ اتاپ وتۋىنشە, وسى ۋاقىتقا دەيىن «Jas Otan»-نىڭ توراعاسى بولىپ كەلگەن دانيار سۇندەتباەۆ شەتەلدە ءبىلىمىن جەتىلدىرۋ تۋرالى شەشىمىنە بايلانىستى بۇل قىزمەتتەن ءوز ەركىمەن بوساتىلدى. ول توراعالىق ەتكەن ەكى جىلدا پارتيانىڭ جاستار قاناتى جاڭا دەڭگەيگە كوتەرىلىپ, وتاندىق جاس بۋىننىڭ ناعىز ورتالىعىنا اينالعان. وسى كەزەڭدە «Jas Otan»-نىڭ IV سەزى ءوتىپ, جاستار قاناتىنىڭ ورتالىق كەڭەسى جاساقتالعان.
«ەندى ساناۋلى كۇندەردەن كەيىن پرەزيدەنت سايلاۋىنىڭ ۇگىت-ناسيحات جۇمىستارى باستالادى. وسى اۋقىمدى ءارى ەل دامۋىنداعى ماڭىزدى كەزەڭدە پارتيامىزبەن بىرگە «Jas Otan» جاستار قاناتىنا دا زور جاۋاپكەرشىلىك جۇكتەلىپ وتىر. سەبەبى پارتيا تاجىريبەسىندە العاش رەت پرەزيدەنت سايلاۋى كەزىندە كانديداتىمىزدىڭ رەسپۋبليكالىق قوعامدىق شتابىمەن بىرگە ونىڭ جاستار قاناتى دا قۇرىلادى. سوندىقتان پارتيامىزدىڭ جاستار قاناتىنا وسى سەنىمدى ابىرويمەن اقتاپ, ەل دامۋى جولىندا ەسەلى ەڭبەك ەتۋىنە تىلەكتەستىگىمدى بىلدىرەمىن», - دەپ اتاپ وتەدى ول.